დღეს, ოზურგეთის მუნიციპალიტეტის საკრებულოს მორიგ სხდომაზე „ ოზურგეთის მუნიციპალიტეტის გამგეობის ინფრასტრუქტურის, არქიტექტურის და ქონების მართვის სამსახურის მიერ, 2016 წელში გაწეული მუშაობის შესახებ“, ანგარიში, ამავე სამსახურის უფროსმა გოჩა აბაშმაძემ წარადგინა. როგორც მან დეპუტატებს მოახსენა, 2016 წელს, ბრძანებით, საქართველოს რეგიონებში განსახორციელებელი პროექტების ფონდიდან გამოყოფილია სამი მილიონ 753610 ლარი. ადგილობრივი ბიუჯეტის თანადაფინანსების გათვალისწინებით სულ შესრულებული თუ შესასრულებელი სამუშაოების ღირებულება შეადგენს სამი მილიონ 951173 ლარს.
გოჩა აბაშმაძემ ჩამოთვალა იმ სოფლების სია, სადაც 2016 წლის დეკემბრამდე შესრულდა ან შეწყდა ინფრასტრუქტურული სამუშაოები. მაგალითად, სოფელ ნაგომარში საავტომობილო გზის რეაბილიტაციის პირველი ეტაპი _ 940 კმ-იანი გზის მონაკვეთისა, შეწყვეტილია სამუშაოთა არაჯეროვანი შესრულების გამო. ასევე, იგივე მიზეზებით შეწყვეტილია ვაკიჯვარი-(ფამფალეთი)- მთისპირის და მაკვანეთის საავტომობილო გზის რეაბილიტაცია. უმეტესი ნაწილი კი ინფრასტრუქტურული სამუშაოებისა, (საბავშვო ბაღების მშენებლობა, გზების რეაბილიტაცია თუ საავტომობილო გზების ასფალტ-ბეტონის საფარით მოწყობის პირველი ეტაპი), დასრულებულია.
როცა შესრულებული სამუშაოების შესახებ საუბრობდა, გოჩა აბაშმაძეს შეეპასუხა სოფელ ნასაკირალის დეპუტატი, „ნაციონალური მოძრაობის“წარმომადგენელი ბესო ქათამაძე. მან საყვედური გამოთქვა იმის გამო, სტიქიით დაზარალებულ 14 სოფელს შორის არ აღმოჩნდა ნასაკირალი, სადაც დაზიანდა მილ-ხიდები.
„ასევე ამ სოფელში დაუსრულებელია სტადიონი, რომელიც მისივე თქმით, დასრულებულად ჩაიბარეს, დახარჯულია 26 ათასი ლარი. _სტადიონზე კი წყალი დგას, შიგ ღორები დადიან, ამძვრალია ხალიჩა, _ თქვა ქათამაძემ.
ამ განცხადების გაკეთების შემდეგ, გოჩა აბაშმაძე გაბრაზდა და ქათამაძეს სიცრუეში დასდო ბრალი:
„სტადიონის მშენებლობა დეკემბერში დასრულდა და აქამდე რატომ არ თქვი, თუ მოსაწონი არ იყოო. თქვენს დროს რას აკეთებდით? წამოდით და ნახეთ, რამდენი სამუშაოა ჩატარებული, არ გვძინავს, 24 საათის განმავლობაში დავრბივართ, _ უთხრა მან ქათამაძეს.
დეპუტატმა ბონდო ღლონტმა კი, ასე ახსნა ქათამაძის გამოსვლა: „მთავარია, ბესომ ეკრანზე დააფიქსირა თავისი გამოსვლა“.
როგორც ცნობილია, ოზურგეთის მუნიციპალიტეტში საკრებულოს სხდომების ტრანსლირება ხდება.
