გასულ კვირას, ჩოხატაურის მუნიციპალიტეტის საკრებულოს სხდომაზე, მუნიციპალიტეტის გამგეობის შესყიდვების სამსახურის უფროსმა ვლადიმერ გოგიბერიძემ 2016 წელს გახორციელებული სახელმწიფო შესყიდვების ანგარიში წარმოადგინა.
ვლადიმერ გოგიბერიძის თქმით, შესყიდვები მუნიციპალიტეტის სახელმწიფო შესყიდვების გეგმის შესაბამისად გახორციელდა და უზრუნველყოფილი იყო ფულადი სახსრების რაციონალური ხარჯვა: “მუნიციპალიტეტის საჭიროებისთვის აუცილებელი საქონლის, მომსახურების და სამუშაოს შესყიდვის პროცესში ჩვენმა სამსახურმა ხელი შეუწყო ჯანსაღი კონკურენციის განვითარებას. უზრუნველყოფილი იყო სახელმწიფო შესყიდვების გახორციელების დროს შესყიდვაში მონაწილეების მიმართ სამართლიანი და არადისკრიმინაციული მიდგომა, ამაღლდა მუნიციპალიტეტის მიერ გახორციელებული შესყიდვების საჯაროობის დონე, რამაც საზოგადოებაში ხელი შეუწყო ჩვენს მიერ გახორციელებული შესყიდვების მიმართ ნდობის ჩამოყალიბებას. დაცული იყო ყველა გახორციელებული შესყიდვის გამჭვირვალობა,” _ აღნიშნა ვლადიმერ გოგიბერიძემ და კონკრეტულ პროექტებზეც ისაუბრა.
მისი ინფორმაციით, 2016 წელს ადგილობრივი ბიუჯეტით 676 332 ლარის შესყიდვა გახორციელდა, ხოლო სახელმწიფო ბიუჯეტით _ 6 754 017 ლარის შესყიდვა.
_ დადებული იქნა 282 ხელშეკრულება. აქედან, გამარტივებული შესყიდვით _ 228 ხელშეკრულება, გამარტივებული ელტენდერით _ 36 ხელშეკრულება, ელექტრონული ტენდერით _ 12 ხელშეკრულება, კონსოლიდირებული ტენდერით _ 6 ხელშეკრულება, _ თქვა გოგიბერიძემ დეპუტატებისთვის ანგარიშის ჩაბარების დროს.
გამგეობის შესყიდვების სამსახურის უფროსის ინფორმაციით, სულ ჩატარდა 76 ტენდერი, მათ შორის: 36 გამარტივებული ელექტრონული ტენდერი, 12 ელექტრონული ტენდერი, რომელთაგან უარყოფითი შედეგით დასრულდა 4, არ შედგა 18 და შეწყდა 6 ტენდერი. გოგიბერიძის თქმით, ტენდერებიდან გამოთავისუფლებულმა ეკონომიამ ადგილობრივ ბიუჯეტში შეადგინა 27 531,50 ლარი.
_ ჩოხატაურის მუნიციპალიტეტს 2016 წელში სახელმწიფო ბიუჯეტით გამოეყო 6 754 017 ლარი: 2016 წლის 4 თებერვლის #175 განკარგულებით გამოყოფილი იყო 2 377 721 ლარი, რომელზეც გაფორმდა 11 ხელშეკრულება 1 172 396 ლარზე, საიდანაც თანადაფინანსების 5% _ 58 619,8 ლარი დაფინანსებულია ადგილობრივი ბიუჯეტიდან. ფაქტობრივად, აღნიშნული განკარგულებიდან ხელშეკრულებებზე გაიხარჯა 113 776,2 ლარი, ტენდერებიდან გამოთავისუფლებულმა თანხამ კი შეადგინა 150 434 ლარი, რომელსაც გამოაკლდა ტენდერის ჩატარების საფასური _ 575 ლარი და სრული ეკონომია დარჩა 149 859 ლარი, _ აღნიშნა გოგიბერიძემ.
მისივე ინფორმაციით, სახელმწიფო ბიუჯეტიდან სოფლის მხარდაჭერის პროგრამის ფარგლებში 630 263 ლარი იყო გამოყოფილი, რომლითაც გაფორმდა 54 ხელშეკრულება 592 328,8 ლარზე.
გოგიბერიძის ანგარიშის თანახმად, 2016 წლის 18 ივლისის #1340 განკარგულებით, სტიქიის შედეგების სალიკვიდაციო ღონისძიებების გახორციელების თაობაზე ჩოხატაურის მუნიციპალიტეტს გამოეყო 223 140 ლარი. გაფორმდა 5 ხელშეკრულება 222 901 ლარზე.
ამავე დღეს, მთავრობამ, ამავე სამუშაოსთვის კიდევ ერთი _ #1533 განკარგულება გამოსცა და ჩოხატაურის მუნიციპალიტეტს გამოეყო 902 600 ლარი, რომელზეც გაფორმდა 14 ხელშეკრულება 901 935 ლარზე.
სტიქიის შედეგების სალიკვიდაციოდ ჩოხატაურის მუნიციპალიტეტმა თანხა 2016 წლის 28 ივლისის #1409 განკარგულებითაც მიიღო 748 000 ლარი. გოგიბერიძის თქმით, აღნიშნული განკარგულებით გაფორმდა 23 ხელშეკრულება 746 975 ლარზე.
_ 2016 წლის 21 მარტის #485 განკარგულებით (ადგილობრივი თვითმმართველი ერთეულებისთვის სტიქიის შედეგების სალიკვიდაციოდ ზოგიერთი ღონისძიების გახორციელების თაობაზე) გამოყოფილი თანხაა 1 872 293 ლარი, რომელზეც გაფორმებულია 2 ხელშეკრულება. აღნიშნულ განკარგულებაზე ტენდერიდან გამოთავისუფლებული თანხა _ 172 293 ლარი 2016 წლის 16 სექტემბერს #1899 განკარგულებით (ჩოხატაურის მუნიციპალიტეტის მიერ გასახორციელებელი ღონისძიებების შესახებ) მიიმართა 8 ივლისს მუნიციპალიტეტის ტერიტორიაზე მომხდარი სტიქიური მოვლენების შედეგების სალიკვიდაციო ღონისძიებებისთვის საჭირო სარეაბილიტაციო სამუშაოებისა და მასთან დაკავშირებული საპროექტო მომსახურებაზე. აღნიშნული განკარგულებით, გაფორმდა 8 ხელშეკრულება _ 171 887,69 ლარზე, _ აღნიშნა ვლადიმერ გოგიბერიძემ და სატენდერო კომისიაზეც ისაუბრა:
_ ტენდერების ჩატარებას უზრუნველყოფდა გამგებლის ბრძანებით შექმნილი სატენდერო კომისია 5 წევრით და 4-კაციანი აპარატის შემადგენლობით. ჩატარდა სულ 228 სხდომა.
ხელშეკრულების პირობების შესრულებას და მიღება-ჩაბარებას, მომსახურებისა და სამუშაოს კუთხით, უზრუნველყოფდა გამგებლის ბრძანებით შექმნილი ინსპექტირების ჯგუფი, რომლის მიერ ადგილზე გახორციელდა შესყიდვების ინსპექტირება და ხელშეკრულების პირობების შესრულებისთვის საჭირო ღონისძიებების გახორციელება. მუნიციპალიტეტის მიერ დადებული ხელშეკრულებებიდან, დღეის მდგომარეობით, დაუსრულებელია ხელშეკრულებით გათვალისწინებული ოთხი სამუშაო. აღნიშნულ ხელშეკრულებებს ინსპექტირების ჯგუფის დასკვნის საფუძველზე გაუგრძელდათ შესრულების ვადები, _ აღნიშნა გოგიბერიძემ.
მისივე ინფორმაციით, ინსპექტირების ჯგუფის მიერ საჯარიმო სანქცია დაერიცხა 10 მიმწოდებელს, “შავ სიაში” განთავსებული იქნა 2 მიმწოდებელი:
_ შესრულებულ მომსახურებასა და სამუშაოებზე შედგა იქნა მიღება-ჩაბარების აქტები და ექსპერტიზის დასკვნები, გაცემული ლევან სამხარაულის ექსპერტიზის ბიუროს ან აკრედიტირებული საექსპერტო ორგანოების მიერ. დასკვნების საფუძველზე ჩანს, რომ სამუშაოების შესრულების ხარისხი არის დამაკმაყოფილებელი, _ აღნიშნა საკრებულოს სხდომაზე შესყიდვების სამსახურის უფროსმა.
გოგიბერიძის თქმით, 2016 წელში სახელმწიფო შესყიდვები გახორციელდა სახელმწიფო შესყიდვების კანონის შესაბამისად მონეტარული ზღვრების სრული დაცვით:
_ კანონში ცვლილებების შესაბამისად შესყიდვები ხორციელდებოდა სახელმწიფო შესყიდვების სააგენტოს ყველა რეკომენდაციის გათვალისწინებით, დანერგილი იქნა შესყიდვების გახორციელება აუქციონის გარეშე, რამაც კიდევ უფრო გამჭვირვალე გახადა შესყიდვების გახორციელება. საქართველოს მთავრობასთან არსებული საჯარო სამსახურის ბიუროს მოთხოვნის შესაბამისად ყველა თანამშრომელმა გაიარა ტესტირება სახელმწიფო შესყიდვების სააგენტოში და მიიღეს შესაბამისი სერთიფიკატები. სამსახური კონსულტაციას უწევს მუნიციპალიტეტის ტერიტორიაზე არსებულ საბიუჯეტო ორგანიზაციებს.
მუნიციპალური შესყიდვებისა და მატერიალურ-ტექნიკური უზრუნველყოფის სამსახური აქტიურად არის ჩართული სახელმწიფო შესყიდვების სააგენტოსთან კანონშემოქმედებით ღონისძიებებში _ ჩვენს მიერ სააგენტოში წარდგენილი იქნა 18 წინადადება სახელმწიფო შესყიდვების კანონთან მიმართებაში. დავესწარით ახალი კანონის პროექტის განხილვის პროცესს, სადაც ჩვენს მიერ დაყენებული რამდენიმე წინადადება ასახვას ჰპოვებს ახალ კანონში, _ თქვა გოგიბერიძემ.
აღსანიშნავია, რომ მის მიერ წარმოდგენილ ანგარიშზე, რომელსაც თან ჩაშლილი პროექტებიც ახლა, ამჯერად, კითხვები მხოლოდ ოპოზიციას არ გასჩენია.
საკრებულოს თავმჯდომარის მოადგილე ვლადიმერ სიხარულიძე დაინტერესდა, რომელი ნორმატიული აქტის საფუძველზე გამოაცხადეს სოფლის პროგრამის პროექტებიდან გაკეთებული ეკონომიის _ 35 ათასი ლარის სამუშაოებზე ტენდერი. სიხარულიძე, ასევე, დაინტერესდა, რომელი კანონის საფუძველზე გამოცხადდა ტენდერი დღგ-ს გარეშე, როცა საკრებულომ თანხა სწორედ დღგ-ს ჩათვლით ჩასვა.
_ შევამოწმოთ, ჩემი კალკულატორი არ მუშაობს თუ შენი კომპიუტერი?! გავიგე, რომ ზღაპრებს მიყვები, მაგრამ ის მითხარი, რომელი კანონის საფუძველზე გამოაცხადე ტენდერი დღგ-ს გარეშე, როცა ბიუჯეტში ეს გათვალისწინებული გვქონდა? _ მიმართა სიხარულიძემ გოგიბერიძეს.
შესყიდვების სამსახურის უფროსმა სიხარულიძეს კანონიდან ის განმარტებები ჩამოუთვალა, რომლის საფუძველზეც შესყიდვები განახორციელეს, რაც სიხარულიძისთვის დამაკმაყოფილებელი არ აღმოჩნდა და გოგიბერიძეს მოუწოდა, “ლექციების კითხვა დაესრულებინა”:
_ ლექციების წასაკითხად არავის მოუწვევიხართ და ტრენინგებს ნუ ატარებთ აქ! რაც თქვენ გააკეთეთ, ეს საკრებულოს აგდებაა, _ აღნიშნა სიხარულიძემ, რაზეც გოგიბერიძემ უპასუხა, რომ განმარტებები სწორედ კანონიდან გამომდინარეობს და ტრენინგები აქ არაფერ შუაშია.
_ მე ვაყენებ საკითხს, რომ ამ თემის განხილვა გადავდოთ 12 აპრილამდე და როცა გამგებელი მობრძანდება აქ ანგარიშის ჩასაბარებლად, ეს საკითხიც მაშინ გავიაროთ. მანამდე კი, თუ არ გაქვთ ნორმატიული აქტი, რასაც მე გთხოვთ, ან გააკეთეთ ან გაამზადეთ, _ თქვა სიხარულიძემ.
დეპუტატისა და შესყიდვების სამსახურის უფროსის დებატები კარგა ხანს გაგრძელდა, რომლის დროსაც შესყიდვების სამსახურის უფროსს გაახსენდა, რომ სოფლის პროგრამების თანხიდან გაკეთებული ეკონომია _ 27 700 ლარი, საკრებულოს თანხმობით გადაიტანეს სხვა მუხლში.
სიხარულიძისთვის არც ეს პასუხი აღმოჩნდა დამაკმაყოფილებელი და გოგიბერიძეს კონკრეტული დოკუმენტის წარმოდგენა მოთხოვა. ამის გამო, საკრებულოს თავმჯდომარემ, ზაალ მამალაძემ, საკითხის განხილვა გადაიტანა და გოგიბერიძეს სთხოვა, დეპუტატებისთვის მოთხოვნილი დოკუმენტი შემოეტანა. გოგიბერიძემ საკრებულოზე განხილული დოკუმენტი წარმოადგინა, თუმცა, სიხარულიძემ ეს არგუმენტად მაინც არ მიიღო და განხილვა, ლამის პიროვნულ დაპირისპირებაში გადაიზარდა, რომელშიც სხვა დეპუტატებიც ჩაერთნენ და საბოლოოდ, სიტუაცია საკრებულოს თავმჯდომარემ განმუხტა _ მისი გადაწყვეტილებით, საკითხი მომდევნო სხდომაზე განიხილება.
მანამდე კი, ამ თემაზე, კომისიების და ფრაქციის თავმჯდომარეებთან ერთად, გამგეობის შესაბამისი სამსახურების მონაწილეობით ზაალ მამალაძის კაბინეტში იმსჯელებენ.
_ არ შეიძლება ასე მოქცევა საკრებულოს სხდომაზე. ეს არ არის პიროვნული დაპირისპირების ადგილი. ვისაც ეს საკითხი გაინტერესებთ, მობრძანდით ჩემთან და ერთად განვიხილოთ ყველა დეტალი, _ მიმართა დეპუტატებს ზაალ მამალაძემ.
თემის განხილვა დღეს არის ჩანიშნული.
