“ყველამ იცის, რომ მარტოხელა კაცი ვარ. ახლა ღამეს საავადმყოფოში ვათევ, საკრებულოს თავმჯდომარის რეკომენდაციით, წუხელ, მაგალითად, “მიმღებში” მეძინა. როდემდე შეიძლება ასე ქუჩაში ვიყო?! ან თავშესაფარში გადამიყვანონ ან ქირავნობის პროგრამაში ჩამსვას მერიამ”, _ ამბობს ლანჩხუთელი თენგიზ მენაბდე, რომელიც საკუთარ გასაჭირზე სასაუბროდ რედაქციაში გვეწვია.
თენგიზ მენაბდის თქმით, წლებია დახმარების პირობას აძლევენ, თუმცა, უშედეგოდ:
“ნიგვზიანში ჩემი სახლი, რომელიც თითქმის ერთი საუკუნის წინაა აშენებული, ავარიულ მდგომარეობაშია და შიგ ღამის გათევა შეუძლებელია. სახურავიდან წლებია წყალი ჩამოდის და ყველაფერი დამპალია, არც იატაკი უვარგა და არც _ ჭერი.
2012 წლიდან მოყოლებული ვითხოვ დახმარებას, თუმცა, უშედეგოდ. ერთხელ დამეხმარნენ მხოლოდ, ბესო ტაბიძის შუამდგომლობით, რომელიც მაშინ სოფლის მაჟორიტარი იყო _ სახლის გადასახურად 42 ცალი ალუმინის ფირფიტა გამომიყვეს. ეს იყო და ეს, მეტი არაფერი მიმიღია. უსახსრობის გამო ვერ შევძელი სახლის გადახურვა, საჭირო ხის მასალა ვერ შევიძინე და ეზოში დაწყობილი ის ალუმინის ფირფიტებიც მომპარეს _ 11 ცალი დამრჩა მხოლოდ. ამითაც შეიძლებოდა, რომ პატარა “კუხნა” სახლი გადამეხურა და ღამის გასათევი მაინც მქონოდა, მაგრამ დახმარებაზე უარი მითხრეს.
პენსია მედიკამენტების საყიდლადაც არ მყოფნის. სოციალურ დახმარებას კი არ მაძლევენ, შვილები გყავს და იმათ გარჩინონო. შვილები მართლაც მყავს, ოღონდ ჩემთან არც ერთი არ ცხოვრობს.
ყველამ იცის, რომ მარტოხელა კაცი ვარ. ახლა ღამეს საავადმყოფოში ვათევ, საკრებულოს თავმჯდომარის რეკომენდაციით, წუხელ, მაგალითად, “მიმღებში” მეძინა. როდემდე შეიძლება ასე ქუჩაში ვიყო?! ან თავშესაფარში გადამიყვანონ ან ქირავნობის პროგრამაში ჩამსვას მერიამ.
მაქვს დაწერილი განცხადება თავშესაფარში გადაყვანის თაობაზე, თუმცა, მითხრეს, პირველ ჯერზე უარი მივიღეთ და ახლა კიდევ გვაქვს მოთხოვნა გაგზავნილი შესაბამის სტრუქტურაშიო. მერის მოადგილეს, გოგი ფაცურიასაც გავაცანი ჩემი პრობლემები, დამპირდა დაგეხმარები, თუ თავშესაფარში არ მოხერხდა შენი გადაყვანა, ქირავნობის პროგრამაში ჩაგსვამთო, მაგრამ ახლა მერიის შენობაში აღარ მიშვებენ _ როგორც კი გამოვჩნდები, მაშინვე დაცვა გადამიდგება წინ“, _ ამბობს ჩვენთან საუბრისას თენგიზ მენაბდე.
ლანჩხუთის მუნიციპალიტეტის მერის პირველი მოადგილის გოგი ფაცურიას თქმით, თენგიზ მენაბდის პრობლემების მოსაგვარებლად ხელისუფლება ყველაფერს აკეთებს და მუნიციპალიტეტის ხელმძღვანელობას მის მიმართ უყურადღებობაში ადანაშაულებს.
“პირადად მაქვს მენაბდის საკითხთან დაკავშირებით კომუნიკაცია სოციალური სააგენტოს ლანჩხუთის განყოფილების უფროსთან. თავშესაფარში გადაყვანასთან დაკავშირებით ერთხელ უკვე გადაიგზავნა შესაბამის უწყებაში ამ ბენეფიციარის მონაცემები, თუმცა, უარი მივიღეთ. ამის შემდეგ ხელახლა გადაიგზავნა და ვნახოთ, რა პასუხი მოვა იქედან“, _ გვითხრა ფაცურიამ.
მისივე თქმით, უკიდურეს გაჭირვებაში მყოფ მენაბდეს ადმინისტრაციულ შენობაში შესვლაზე პრობლემა არასდროს შექმნია:
_ არც მე და არც მერს არ გვაქვს ვინმესთან კომუნიკაციის პრობლემა, მათ შორის არც მენაბდესთან, რომელსაც არაერთხელ შევხვდი პირადად და ვესაუბრე. დაცვასაც არ აუკრძალავს ვინმესთვის შენობაში შემოსვლა და გადაადგილება. უბრალოდ, თენგიზ მენაბდე სისტემატურად მოდის მერიაში, აქ ყველა კარგადაა ინფორმირებული მის პრობლემებთან დაკავშირებით, მათ შორის დაცვის თანამშრომლებიც. რახან ჯანმრთელობის გამო მას გადაადგილება უჭირს, მერიაში მისი მორიგი ვიზიტისას დაცვის ერთ–ერთი თანამშრომელი თავად ამოვიდა ჩემთან, რომ გაეგო, რაიმე სიახლე ხომ არ იყო თავშესაფართან დაკავშირებით. ეს იყო და ეს, მეტი არაფერი, _ ამბობს მერის მოადგილე და განმარტავს, რომ მენაბდის ქირავნობის პროგრამაში ჩართვა მისი სტატუსის გამო ვერ ხერხდება:
_ მას ჰყავს შვილები, რაც წინააღმდეგობას ქმნის, რომ ამ პროგრამით მოსარგებლე გახდეს, _ აღნიშნა გოგი ფაცურიამ.
ლანჩხუთის მერიის პრესასთან ურთიერთობის განყოფილების ხელმძღვანელის, მაკა სულაბერიძის ინფორმაციით, ადგილობრივმა ხელისუფლებამ თენგიზ მენაბდეს ორჯერ უკვე გაუწია დახმარება:
“სოციალური პროგრამის შესაბამისად, შარშან და მიმდინარე წელს მას 150-150 ლარის ღირებულების მედიკამენტები გადაეცა. რაც შეეხება თავშესაფარში გადაყვანას, ჩვენი ინფორმაციით, ბენეფიციარის მონაცემები სოციალური სააგენტოს ლანჩხუთის განყოფილების მიერ გადაგზავნილია შესაბამის სტრუქტურაში, ველოდებით პასუხს“, _ გვითხრა სულაბერიძემ.
