დღეს, ოზურგეთის მუნიციპალიტეტის საკრებულოს სხდომაზე, პირველ საკითხად განიხილეს: „ოზურგეთის მუნიციპალიტეტის საკრებულოს „ერთიანი ნაციონალური მოძრაობის“ ფრაქციის თავმჯდომარის გადაყენების, წევრის გარიცხვის და ახალი თავმჯდომარის არჩევის შესახებ“, _ ცნობად მიღების შესახებ.
საკითხის ირგვლივ, იურიდიულ საკითხთა კომისიის თავმჯდომარემ, საკრებულოს წევრმა ეროდი გორდელაძემ ისაუბრა:
_ 2017 წლის 29 აპრილს, ფრაქცია “ერთიანი ნაციონალური მოძრაობის” წევრმა, მიხეილ გოგოტიშვილმა ოფიციალურად გააკეთა განცხადება, „ერთიანი ნაციონალური მოძრაობის“ დატოვების თაობაზე. ფრაქციის დანარჩენი წევრების მიერ მოწვეული იქნა ფრაქციის სხდომა, სადაც იმსჯელეს გოგოტიშვილის მიერ გაკეთებული განცხადების თაობაზე, რის შემდეგაც მიიღეს გადაწყვეტილება გოგოტიშვილის ფრაქციის თავმჯდომარეობიდან გადაყენების თაობაზე. ფრაქციის ახალ თავმჯდომარედ არჩეული იქნა ამავე ფრაქციის წევრი დავით მჟავანაძე, _ თქვა მან.
საკრებულომ საკითხის ცნობად მიღებას მხარი დაუჭირა.
როგორც „გურია ნიუსთან“ ენმ-ოს ფრაქციის წევრმა, დეპუტატმა ბესო ქათამაძემ განაცხადა, მიხეილ გოგოტიშვილმა სრულიად მოულოდნელად გადადგა ეს ნაბიჯი.
_ მე საღამოს, მედიასაშუალებებით გავიგე, რომ პარტია დატოვა და „ევროპულ საქართველოს“ შეუერთდა. „ევროპული საქართველო“ კი არის ბიძინა ივანიშვილის მითითებების შემსრულებელი. ამ ტანდემის სურვილია, დაშალოს „ერთიანი ნაციონალური მოძრაობა“. თუმცა, ჩვენ გვემატება ახალი ხალხი, წესიერი, ცნობილი, პროფესიონალიზმით ცნობილი სახეები, რომლებსაც მივიღებთ პარტიაში, შემდეგ კი ადგილობრივი თვითმმართველობის არჩევნებშიც წარვადგენთ კანდიდატურებს, როგორც გამგებლის, ისე მერის პოზიციაზე. ხალხი ყველაფერს ხედავს და მომავალშიც დაინახავს. ჩვენ ვძლიერდებით, ბიძინასთან ტანდემი აქვს „ევროპულ საქართველოს“, მასთან არიან შეკრული, თუმცა მაინც ვერ დაშლიან ერთიან ნაციონალურ მოძრაობას, _ თქვა მან.
საკრებულოს ფრაქცია „ერთიანი ნაციონალური მოძრაობის“ ახალ თამჯდომარეს, დავით მჟავანაძეს განსხვავებული აზრი აქვს გოგოტიშვილის წასვლის შესახებ:
_ მიხეილ გოგოტიშვილი რომ აპირებდა პარტიის დატოვებას, ვიცოდი. ჩვენ გვქონდა კონსულტაცია. ვურჩიე, რომ ეს არ იქნებოდა მომგებიანი სვლა, თუმცა მან ასე აირჩია და ჰქონდა ამის უფლება, _ გვითხრა მჟავანაძემ.
