ფასის ზრდის ტენდენცია, განსაკუთრებით, საკვებ პროდუქტზე, კვლავ გრძელდება. რაც უფრო შემპარავია ეს პროცესი, მით უფრო აქტიურად, გაღიზიანებული საუბრობს ხალხი.
ოზურგეთში, ქალაქში, სოფლებსა თუ ნებისმიერ ტრანსპორტში, ადამიანები განსაკუთრებით პურის ფქვილის და ქატოს ფასის ზრდის გამო არიან შეწუხებულნი.
_ ქატო როგორ გაძვირდა ასე? 20-კილოგრამიანი ტომარა 35 ლარი ღირს. რა უნდა ვქნა?! ავდგები, ამ შემოდგომაზე გავყიდი ძროხებს და ის იქნება! ვის ვედავო ან გამოვა რაიმე? _ გვეუბნება სოფელ ქაქუთის მკვიდრი სერგო ბოიაჯანი.
დღეისთვის, ოზურგეთში 25 კგ. რაოდენობის უმაღლესი პურის ფქვილი 52 ან 53 ლარი ღირს. როგორც რამდენიმე თვის წინ ვარაუდობდნენ, ერთი ტომარა 50 კგ. წონის პურის ფქვილი უკვე 103 ან 104 ლარი ღირს. ასევე მომატებულია ქატოს, შავი პურის ფქვილის, ხორბლის ფასი.
_ მომატებას გააჩნია! რა უბედურებაა ეს! ჯერ ის არ გვჯეროდა, რომ ამბობდნენ, ერთი ტომარა ფქვილი 100 ლარი გახდებაო. ახლა ვხედავთ, რომ გადააჭარბა 100 ლარს. ამბობენ, რომ კიდევ უფრო გაიზრდება ფასი და უკვე აშკარაა, რომ ასეც იქნება. რა უნდა ვქნათ?! ნელ-ნელა, ალბათ, ხალხი სოფლებში შინაური ფრინველისა და ცხოველის მოვლა-პატრონობას დაანებებს თავს, რომ საკუთარი ლუკმა პურის შეძენა მოახერხოს. ჩამოვედით დღეს ქალაქში, სიმინდი და ხორბალი უნდა გვეყიდა. 2 ლარი ღირს ერთი კილოგრამი. ქატოს ვიყიდი-მეთქი და მთლად სასწაული _ 22-კილოგრამიანი ტომარა 52 ლარი ღირს. ცოტა შენაცვლებას ვაკეთებდით, ქათმებს ვაჭმევდით. ახლა სიმინდზე უფრო გაძვირებულია, მგონი, _ გვეუბნებიან ნატანებელი ლაურა ხომერიკი და მაყვალა ნაკაიძე.
ჭანიეთის მკვიდრი დიტო ხურციძე ამბობს, რომ წელს ყანის დათესვას, მიუხედავად აგრობარათების სახით დახმარების გადმოცემისა სახელმწიფოს მხრიდან, მოსახლეობის 25%-იც ვერ მოახერხებს:
_ ყველამ იცის, როგორ გაიზარდა ყველაფრის ფასი. წინა წლებში, გასაჭირის მიუხედავად, ყანებს ნისიად ხნავდნენ და თესავდნენ. შემდეგ თხილის სეზონსა და შემოდგომაზე ხდებოდა გადახდა. ახლა ნისიად უკვე არავინ გენდობა, იმხელა გაჭირვებაა ხალხში, _ ამბობს ის.
დიტო ხურციძე გვიამბობს ერთი ფაქტის შესახებ, როცა გასულ წელს, ერთ მარტოხელა ქალბატონს მოუჭრეს მსხმოიარე სიმინდის ყანა, მოპარეს სიმინდი და ჩალა.
_ ყველამ იცის, ლიხაურის ფართობში, ქალს, რომელმაც ძლივს მოახერხა ყანის დათესვა, სასუქის ყიდვა და გათოხნა, მოტეხვამდე ცოტა აკლდა, ისე მოპარეს. ყანაში ისე მოჭრეს, ერთი ღერიც არ იყო დარჩენილი. თან ეს ფართობი ოზურგეთი-ბათუმის გზის გასწვრივ მდებარეობს. წელს უარესი ამბავი იქნება. ვინც დათესავს, მოსავლის აღების დროს, უნდა უყარაულოს ფართობს, _ ამბობს ხურციძე.
პურპროდუქტებისა და ფქვილეულზე ფასის ზრდის პარალელურად, ოდნავ დაიკლო შაქრის ფასმა _ ახლა ერთი კილოგრამი შაქარი, საშუალოდ, 2.65 ლარი ღირს.
ოზურგეთის მუნიციპალიტეტში არსებობს ყველაზე დიდი საბითუმო საწყობი-მაღაზია, სადაც მომხმარებელს შესაძლებლობა აქვს, შედარებით ნაკლებ ფასად შეიძინოს პროდუქტი.
_ ადრე კი დავდიოდით იქ. ორ-სამ ტომარას რომ იყიდი, თან ათიოდე ლარით ნაკლებად, კი ღირს. თუმცა, წელს არ წავსულვართ. ჯერ ერთი, ყველანაირი მარცვლეულის და ფქვილის ფასმა მოიმატა. თან საწვავი ისეა გაძვირებული, რომ წახვიდე, უფრო წაგებული დარჩები, _ ამბობენ “გურია ნიუსთან” მომხმარებლები.
ფასების ზრდის პარალელურად, უფრო მეტად სტიქიურად და სრული კანონდარღვევით ხდება გარე ვაჭრობა _ ოზურგეთის ქუჩებში, ტროტუარებზე არსებული მდგომარეობა ვერანაირ კრიტიკას ვერ უძლებს.
_ რას გვერჩით, თავი დაგვანებეთ, იქნებ, პურის ფული მაინც ვიშოვოთ! _ ბრაზობენ გარე მოვაჭრეები, სოფლებიდან ჩამოსული ქალბატონები, რომლებსაც პირდაპირ ტროტუარებზე აქვთ დალაგებული ყველი, ფქვილი, სხვადასხვა ბოსტნეულის ნერგები, მეორადი ტანსაცმელი, ხილი…
ოზურგეთის ზედამხედველობის სამსახურში, სადაც ჯერ კიდევ არ დასრულებულა რეორგანიზაცია და თავისი გაჭირვებიათ, მოკლედ გვპასუხობენ, რომ ყველაფერს მიხედავენ.
ამასობაში კი, ქალაქის ცენტრალური ქუჩების ტროტუარებზე, შესაძლოა, მავთულები გაჭიმონ და სკამლოგინებიც ჩაამწკრივონ სხვადასხვა ტანსაცმლის გადმოსაფენად თუ ნივთების დასალაგებლად. როგორც ეს გასულ წლებში ხდებოდა, რაზეც “გურია ნიუსი” არაერთხელ წერდა.
ავტორი
