საქართველოს ეროვნული გუნდისა და „ვალენსიას“ კარის დარაჯი გიორგი მამარდაშვილი ზედიზედ მეორედ ამჟამინდელი გუნდის ძირითად შემადგენლობაში მოხვდა.
ბილბაოს „ატლეტიკმა“ ესპანეთის თასის პირველ ნახევარფინალურ შეხვედრაში „ვალენსიას“ უმასპინძლა და შეხვედრა ფრედ 1:1 დასრულდა. სტუმართა კარს ქართველი მეკარე იცავდა. ბასკებმა ანგარიში 37-ე წუთზე გახსნეს, მამარდაშვილს რაულ გარსიამ გაუტანა. „ვალენსიამ“ წონასწორობა 65-ე წუთზე აღადგინა. უგო დურომ მასპინძლებს გაუტანა და მატჩის საბოლოო ანგარიშიც დააფიქსირა. „ატლეტიკმა“ გიორგი მამარდაშვილის კარის მიმართულებით 10-ჯერ დაარტყა, თუმცა კარში ბურთი მხოლოდ 2-ჯერ წავიდა. მამარდაშვილმა ერთი ბურთი ვერ მოიგერია, ხოლო 31-ე წუთზე ინიაკი უილიამსის დარტყმა კუთხურზე გადააგდო.
„ვალენსია“ ესპანეთის თასის საპასუხო მატჩს 3 მარტს გამართავს და ფინალში გასვლას ეცდება.
მატჩის შემდეგ 21 წლის ქართველი მეკარის თამაში ესპანურმა გამოცემამ „AS“ შეაფასა:
„როცა ბურთი ფეხებთან ჰქონდა, რაღაც ეჭვები გააჩინა. დიახაბის ზედმეტად ძლიერი პასის შემდეგ, ბურთი ვერ გააჩერა და ის კარს სასწაულებრივ ასცდა. თუმცა, ძალიან კარგი იყო მაღალ ბურთებსა და კარის ხაზზეც, სადაც მან ახლო ძელთან ინიაკი უილიამსის ძლიერი დარტყმა დაბლოკა“.
გუშინ გამოცემამ „ESPN“ საინტერესო ცნობა გაავრცელა. დიდია ალბათობა, რომ „მანჩესტერ იუნაიტედთან“ რალფ რანგნიკის კონტრაქტი, რომელიც სეზონის დასრულებისთანავე იწურება, აღარ გაგრძელდეს. ვინ შეიძლება შეცვალოს გერმანელი „პროფესორი“? აღმოჩნდა რომ „იუნაიტედის“ ხელმძღვანელთა სიაში პირველ ნომრად ლუის ენრიკეა – 51 წლის სპეციალისტი, რომელიც ამჟამად ესპანეთის ნაკრების მთავარი მწვრთნელია.
მაგრამ ჩნდება ერთი გონივრული კითხვა? როგორ გამოვა „მანჩესტერ იუნაიტედთან“ თანამშრომლობა, როდესაც ესპანეთის ეროვნულ გუნდს მიმდინარე წლის ნოემბერ-დეკემბერში მსოფლიოს ჩემპიონატი ელოდება? ის, რომ ლუის ენრიკე ნაკრებს დატოვებს და ივნისიდან ქალაქ მანჩესტერში გადაბარგდება, ცოტა არ იყოს, არარეალურია.
„მანჩესტერ იუნაიტედის“ პორტუგალიელი თავდამსხმელი კრიშტიანო რონალდოს შვილმა, კრიშტიანო რონალდო უმცროსმა კი „იუნაიტედთან“ თავისი პირველი კონტრაქტი გააფორმა. სუპერვარსკვლავის შვილი მანჩესტერული კლუბის 12-წლამდელთა გუნდის წევრი გახდა.
მამის მსგავსად, უმცროსი რონალდოც 7-ნომრიანი მაისურით ითამაშებს. აქამდე ის „მანჩესტერ იუნაიტედის“ აკადემიაში ირიცხებოდა, უფრო ადრე კი, ტურინის „იუვენტუსის“ აკადემიაში იყო, რადგან უფროსი რონალდოც იქ თამაშობდა.
ამ სასიამოვნო ფაქტს უფროსი რონალდო შემდეგნაირად გამოეხმაურა.
„100 პროცენტით დარწმუნებული ვარ, რომ ჩემნაირი ფეხბურთელი გახდება. რა თქმა უნდა, ბევრ რამეს ვასწავლი, მაგრამ საბოლოო ჯამში ყველაფერი თვითონ უნდა გადაწყვიტოს. რასაც არ უნდა აკეთებდეს, ჩემი მხარდაჭერა არასდროს მოაკლდება. თუმცა, რა თქმა უნდა, ძალიან მინდა, რომ ფეხბურთელი გამოვიდეს და დიდი ფეხბურთი ითამაშოს. ვფიქრობ, ამისათვის ყველა მონაცემი ხელს უწყობს.”
რამდენიმე დღის წინ რუსეთში ამაზრზენი და გულისამრევი „სპორტული სანახაობა“ გაიმართა. რუსულ ოქტაგონზე 240-კილოგრამიანი მამაკაცი გრიგორი ჩისტიაკოვი ქალთან აჩხუბეს – 29 წლის ალექსანდრა სტეპაკოვასთან, რომელიც 59 კილოგრამს იწონის.
საბედნიეროდ, ეს უთანასწორო ჩხუბი სისხლიანი ნოკაუტით არ დასრულებულა. მიუხედავად ბევრი დარტყმის მიღებისა, სტეპაკოვამ შეძლო და ბრძოლა მხოლოდ ქულებით წააგო.
ასეთი სამარცხვინო დაპირისპირება რუსულ ოქტაგონზე პირველი შემთხვევა არ არის. 2020 წლის დეკემბერში დარინა მაძიუკი, რომელიც 63 კილოგრამს იწონის, 240-კილოგრამიან მამაკაცს, იგივე გრიგორი ჩისტიაკოვს დაუპირისპირდა და დაამარცხა. დარინა პროფესიონალი მებრძოლი გახლდათ. ჩისტიაკოვი კი ბლოგერი გახლავთ და „Youtube“-ზე 120 000 აბონენტი ჰყავს.
მაშინ ბრძოლა 90 წამი გრძელდებოდა. გრიგორიმ დარინას თავიდანვე შეუტია, მაგრამ მაძიუკმა თავი გაითავისუფლა და გაცილებით მძიმე მეტოქე თავში დარტყმების შედეგად დააგდო. „ვარჯიშს ვიწყებ და ვეცდები, ცხოვრების უფრო ჯანმრთელი სტილი მქონდეს,“ – განაცხადა დამარცხებულმა იმ „ისტორიული“ ბრძოლის შემდეგ.
ალბათ ყოველგვარი კომენტარი ზედმეტია…
[sexy_author_bio]
