„ნაციონალური მოძრაობის“ ლანჩხუთის ოფისში, „ოცნების“ მერობის კანდიდატის ალექსანდრე სარიშვილის წარდგენის ღონისძიებაზე მმართველი გუნდის მხრიდან გაკეთებული განცხადებების საპასუხოდ, პრესკონფერენცია გაიმართა.
ზემონახსენებ ღონისძიებაზე ალექსანდრე სარიშვილმა საკუთარ გამოსვლაში აღნიშნა, რომ 2012 წელს „ოცნებამ “ ნულიდან დაიწყო ქვეყნის განვითარება.
„2012 წელს ჩვენ, ფაქტობრივად, ნულიდან დავიწყეთ ქვეყნის განვითარება. განვახორციელეთ უამრავი სოციალური, ეკონომიური, კულტურული თუ ინფრასტრუქტურული პროექტი. ყველა მიმართულებით ხელშესახებ პროგრესს მივაღწიეთ და ჩვენი ლანჩხუთი გავხადეთ უფრო მეტად განვითარებული“, _ თქვა ალექსანდრე სარიშვილმა თავის გამოსვლაში.
ოცნების მხრიდან გაკეთებულ განცხადებებს კი ოპოზიციაში უსინდისო ტყუილს უწოდებენ და საპასუხო განცხადებებსაც აკეთებენ ამის საპასუხოდ.
ენმ-ის ადგილობრივი ორგანიზაციის ლიდერი კახა ასკურავა „ოცნების“ მერობის კანდიდატს იმ აუდიტის დასკვნას ახსენებს, რომელიც ზაზა ურუშაძის გამგებლობის პერიოდს ეხება.
„ბატონ სარიშვილს ეტყობა, ისე ძალიან უნდა უფროსობას ასიამოვნოს და კოჭი გაუგოროს, რომ თავადაც ვერ ხვდება, რას ლაპარაკობს. მაინტერესებს იმ პერიოდს რას უშვება, ზაზა ურუშაძე გამგებელი რომ იყო, თავად კი საკრებულოში „ოცნების“ სახე იყო და კომისიას ხელმძღვანელობდა?! ურუშაძის გამგებლობის პერიოდზე აუდიტის დასკვნა სწორედ სარიშვილის მერობის დროს დაიდო. როცა უკვე მერ სარიშვილს ვკითხე, თუ რას აპირებდა ამ აუდიტის დასკვნასთან დაკავშირებით, პასუხად მივიღე, რომ პროკურატურაში გადააგზავნა დასკვნა. ჰოდა, ახლა ვკითხავდი _ ზაზა ურუშაძის გამგებლობის ხანას რას უშვება?! მისავე ნათქვამს თუ დავერწმუნებით, ვისი საქმეც პროკურატურაში გადააგზავნა. იმ ნულიდან დაწყებულიდან „delete“-ს უკეთებს იმ პერიოდს?! თუ პასუხისმგებლობას იღებს საკუთარ თავზე?! ისიც მაინტერესებს, თურქეთში რომ იმყოფებოდა ვითომ ინვესტიციების მოსაზიდად, ის ინვესტიციები სადაა ჩადებული?!“ _ თქვა ასკურავამ გამართულ პრესკონფერენციაზე.
ასკურავას თანაგუნდელმა გია გოგუაძემ დეტალურად შეახსენა „ოცნების“ მერობის კანდიდატს და ლანჩხუთის მოქმედ მერს ალექსანდრე სარიშვილს „ნულიდან დაწყებული საქმეების“ მაგალითები. ვერც გია გოგუაძემ აუარა გვერდი ზაზა ურუშაძის გამგებლობის პერიოდს და გარკვეული პარალელიც გაავლო სარიშვილის მხრიდან გაკეთებულ განცხადებასა და ურუშაძის გამოსვლებს შორის.
„2013 წელს, იმ მოწვევის საკრებულოში მაშინდელმა გამგებელმა ზაზა ურუშაძემ გააკეთა განცხადება, რომ წინა ხელისუფლებას ერთი კილომეტრი გზა არ აქვს დაგებული, მაშინ, როცა თავად სახლში შუხუთი-აცანა-მამათის 18-კილომეტრიანი ახლად გაკეთებული გზით დადიოდა. მხარის ადმინისტრაციაში კი _ ლესა-ნინოშვილი-ოზურგეთის 24-კილომეტრიანი ბეტონის გზით. როცა საკრებულოს სხდომაზე მოვთხოვე განმარტება გაეკეთებინა, თუ რა არ არის გაკეთებული, ურუშაძემ სხდომა მიატოვა, შემდეგ კი საკუთარ კაბინეტში, რამდენიმე დეპუტატთან საუბარში ასე თქვა _ „რა ვქნა, ზევიდან მაქვს დავალებული ყოველდღიურად ვაკეთო განცხადებები, რომ წინა ხელისუფლების პერიოდში არაფერი გაკეთებულა“. ამიტომ მენიშნა გუშინდელი სარიშვილის განცხადებაც.
ამ ნულიდან დაწყებული ქვეყნის განვითარების მაგალითად კი ვეტყვი, რომ ჯაპანა-გრიგოლეთის 360 მილიონიანი 42-კილომეტრიანი ავტობანი დავტოვეთ, რომელიც ჩვენი ხელისუფლების პერიოდში უნდა ჩაბარებულიყო 2016 წელს. მაშინ ჩვენ, პროექტის შეთანხმების პერიოდში, რამდენიმე კერძო მოსახლესთან შეხვედრა მოგვიწია და ხელისუფლებამ ერთ კვ.მეტრში გადაუხადა 12 ლარი. ამ ხელისუფლების პერიოდში კი სამი ლარი გადაუხადეს მოსახლეობას. დღეს ხაჯალია-გრიგოლეთის მონაკვეთი დახურულია უხარისხოდ შესრულებული სამუშაოების გამო. შემსრულებელ ჩინურ კომპანიას კი პასუხს ვერ სთხოვენ, რადგან თანამდებობიდან გაშვებული მაღალჩინოსნები ყველა იქაა დასაქმებული, თან მაღალი ანაზღაურებით. ასევე, ლანჩხუთი-ხაჯალიის მონაკვეთზე, რომელიც იტალიურმა კომპანია „ტოდინმა“ მოიგო, სამუშაოები გაჩერებულია და ათეულობით მილიონ დოლარს ედავება სახელმწიფოს. ამ დროს კი ამ უპრინციპო და მორჩილმა ადგილობრივმა ხელისუფლებამ გააკეთა პოლიტიკური ავტობანი, რომელიც ქალაქში შემოდის და პირველი საჯარო სკოლის ათასი მოსწავლის სიცოცხლეს საფრთხეს უქმნის, არაერთი ავარია მოხდა. კიდევ ერთი მაგალითი ნულიდან დაწყებულის _ როცა ჩვენი ხელისუფლება 2003 წელს მოვიდა სათავეში, ლანჩხუთის ბიუჯეტი სამასი ათასი ლარი იყო, 2012 წელს კი რვა მილიონიანი ბიუჯეტი დავტოვეთ. წინა ხელისუფლების მოსვლისას საჯარო მოხელეების ხელფასები იყო 50-18 ლარი, ჩვენ კი _ 2600-დან 700 ლარამდე დავტოვეთ. 2013 წელს პრეზიდენტმა მიშა სააკაშვილმა ხელფასები რომ გაზარდა, მოსულ ახალ ხელისუფლებას უარი არ უთქვამს გაზრდილი ხელფასები ჯიბეში ჩაედო, არადა, გამგეობის კართან სააკაშვილის იმპიჩმენტისთვის ხელმოწერებს აგროვებდნენ. ყველამ იცის, რომ სახელმწიფო სამსახურებში 50 ლარზე მეტი ხელფასი არ ყოფილა; პენსია რვა ლარი იყო, ჩვენმა ხელისუფლებამ კი მოსვლისთანავე გაყინული ხელფასები და პენსიები დაარიგა. სამარცხვინოა, სარიშვილმა ნულიდან დაწყებულ განვითარებაზე ილაპარაკოს“, _ თქვა გია გოგუაძემ ალექსანდრე სარიშვილის მიერ გაკეთებული განცხადების პასუხად.
გია გოგუაძე პარლამენტის თავმჯდომარის, კახა კუჭავასა და პრემიერ ღარიბაშვილის მიერ გაკეთებულ განცხადებებსაც შეეხო და მათაც სამარცხვინო უწოდა.
„სირცხვილია პარლამენტის თავმჯდომარის მხრიდან იმის თქმა, რომ ლანჩხუთის „გურია“ წარმატებით გამოდის, მაშინ, როცა შვიდ მილიონად მესამე ლიგიდანაც ვარდება. კუჭავამ ისიც არ იცის, რომ კლუბი დამოუკიდებელი იურიდიული პირია და საფეხბურთო ბავშვთა აკადემიასთან კავშირი არ აქვს. სამარცხვინოა ღარიბაშვილის განცხადებაც, თითქოს ლანჩხუთში 300 ჰექტარზეა მოცვი გაშენებული, მაშინ, როცა მაქსიმუმ, 15-20 ჰექტრამდეა გაშენებული“.
ოპოზიციის კრიტიკა პარლამენტარ ხატია წილოსანის მიერ გაკეთებულმა იმ განცხადებამაც დაიმსახურა, სადაც წილოსანმა „ოცნების“ პერიოდში გურიის განვითარებაზე გააკეთა აქცენტი.
წილოსანის თქმით, გურიის განვითარებისთვის ყველაზე მეტი რამ სწორედ „ქართული ოცნების“ ხელისუფლებაში ყოფნის დროს გაკეთდა.
„ბატონმა ბიძინა ივანიშვილმა გააკეთა უნიკალური პარკი შეკვეთილში, უნიკალური შესაძლებლობები მისცა ამ რეგიონს განვითარებისთვის. ვითარდება კურორტი ბახმარო, გომისმთა“.
ოპოზიციის შეფასებით კი ყველაფერი პირიქითაა.
„იმისთვის რომ ბიძინა ივანიშვილს ასიამოვნო, ის განცხადება, რაც ხატია წილოსანმა გააკეთა, სამარცხვინოა. ცხრა წელია ბახმაროში მაღალჩინოსნების ნებართვით მიდის უკანონო მშენებლობები და ჩოხატაურის მუნიციპალიტეტი ბიუჯეტში ეძებს თანხას, რომ გამოაცხადოს ტენდერი უკანონო მშენებლობების დემონტაჟისთვის“, _ თქვა გოგუაძემ და სამარცხვინო უწოდა მმართველი გუნდის მხრიდან ლანჩხუთში, მერობის კანდიდატის წარდგენის ღონისძიებაზე გაკეთებულ განცხადებებს.
[sexy_author_bio]
