თავიდან იყო დიდი, უხეში ტყავისა და ბეწვისგან შეკერილი ტომრები, ან, უბრალოდ, ყუთები. შემდეგ კი უფრო უზარმაზარი სამგზავრო სკივრები, რომლებსაც ეტლებზე საზღვაო ბაგირებით ამაგრებდნენ. მოგზაურობის მოყვარულს თან უმძიმესი ტვირთი უნდა ეთრია.
1837 წელს საფრანგეთში პირველი რკინიგზა გაიხსნა. მაშინვე გაჩნდა მოთხოვნილება „პორტატულ ბარგზე“, ანუ სამგზავრო ჩანთაზე.
ამ ღირსშესანიშნავ მოვლენამდე ორი წლით ადრე, ვინმე ლუი ვიტონმა, ბიჭუნამ საფრანგეთის პროვინციიდან, მუშაობა დაიწყო მესიე მარშალის სამგზავრო სკივრების მანუფაქტურაში. ვიტონს ახალ-ახალი იდეები მოსდიოდა და ძალიან ლამაზ, მინიატურულ სკივრებს ქმნიდა, შლაპების ყუთების მონარჩენი მასალებისგან.
ნაპოლეონ მესამის ცოლმა, იმპერატრიცა ევგენიამ, შემთხვევით ნახა ვიტონის ნახელავი და, ისე მოეწონა, ახალგაზრდა კაცი თავის პირად „მესკივრედ“ დანიშნა. უკვე ერთი წლის შემდეგ, დედოფლის დახმარებით, ვიტონმა შეძლო საკუთარი საქმის წამოწყება.
1858 წელს მან პირველი ბრტყელი ჩემოდანი გამოიგონა. მისი კარკასი ხითა და რკინით შეიქმნა, რომელზეც წყალგაუმტარი ქსოვილი გადააკრეს. სიახლე მაშინვე პოპულარული გახდა. ვიტონს შეკვეთები ზღვასავით დაატყდა თავს. უკვე მისმა ვაჟმა, ლუისმა, 1896 წელს, მიმბაძველებისგან თავის დასაცავად, შექმნა სპეციალური ქსოვილი მონოგრამებით. რომელიც დღესაც „ლუის ვიტონის“ მოდის სახლის სავიზიტო ბარათია. ასე რომ, მსოფლიო ჩემოდნებს სწორედ ამ ცნობილი ბრენდის მამას – ვიტონს უნდა უმადლოდეს.
ლუი ვიტონმა 1901 წელს შექმნა ულტრამსუბუქი, პატარა ჩემოდანი, ხოლო 1905 წელს – ქალის პირველი ხელჩანთა. მასვე ეკუთვნის საბეჭდი მანქანის ტრანსპორტირებისთვის სპეციალური შალითის დიზაინი, რომელმაც დღის სინათლე 1924 წელს იხილა.
ავტორი
