71 წლის პენსიონერი ქალბატონი, ცავლინა აფხაზავა ოზურგეთში, ჭავჭავაძის ქუჩაზე, ერთოთახიან ბინაში ცხოვრობს.
_ყურიდან ყურში არ გაიგონება ჩემი გასაჭირის ამბავი. საქართველოში ვინმეს ნახავთ ჩემნაირ სასოწარკვეთილს? არის ვინმე ჩემნაირი უბედური დედა და ქალი? სამი ავადმყოფი შვილის პატრონი ვარ და ელემენტარულ დახმარებას ვითხოვ. თუ ოდესმე ვინმე დამხმარებია მთავრობიდან, უმადური არასდროს ვყოფილვარ. ისიც ვიცი, რომ ჩემნაირი მდგომარეობის მქონე ქალს, რა უნდა დაეხმარო, რომ უშველო? მაგრამ უსაშველოს არაფერს ვითხოვ. ერთ პატარა სამეურნეო ნაკვეთზე, პატარა გადახურული ფაცხა მინდა, რომ მუშაობის დროს შევისვენო, თოხი და ბარი შევინახო და ჩემი მწვანილეულობა მაინც მქონდეს, რომ ბორში უპოვართა სასადილოდან არ ვზიდო, _ ტირილით გვიამბობს ქალბატონი.
ცავლინა აფხაზავას მდგომარეობის შესახებ, ოზურგეთში კარგად იციან. მას სამი შვილი ჰყავს, 53 წლის გიორგი, 50 წლის დავითი და 44 წლის შაქრო. სამივეს ჯანმრთელობის პრობლემები აქვს. ქალბატონ ცავლინას საკვები უპოვართა სასადილოდან მოაქვს. ახლა კი ითხოვს კუთვნილ პატარა ნაკვეთზე, სადაც ბოსტნეული მოჰყავს, პატარა ქოხი დაუდგან.
_უბრალო გადახურული ქოხი მინდა, რომ დავისვენო, სამუშაო იარაღები დავალაგო. თუნდაც მეორადი მასალით რომ დამეხმარონ. სამ კვადრატულ მეტრამდე ფართის მეტი არც დაგვჭირდება. ჯერჯერობით ვერ მივაღწიე იმას, რომ მიმიღონ. საკრებულოს თავმჯდომარის პირველი მოადგილე აღმოჩნდა ერთი ადამიანი, ლავრენტი ბიგვავა, რომელმაც მომისმინა. დამპირდა, შენს დახმარებას ვეცდებიო. თუმცა ისიც მითხრა, რომ მას ფუნქციურად ეს არ ევალება და ძალიან შეწუხდა. ჩემთვის არართხელ საკუთარი ჯიბიდანაც გაუწევიათ ოზურგეთის მერიაში დახმარება. მე უმადური არ ვარ, მაგრამ ეს ნუთუ შეძლებელია, ამ საქმეში დამეხმარონ? ღმერთმა ჩემსავით ნურავის გაუჭირვოს…არც არავინ მეგულება, _ ატირებული საუბრობს და ამბობს იმასაც, რომ ნურავინ გამიმტყუნებთ, თუნდაც რომელიმე პარტია, პირი, შინაური თუ უცხოელი დახმარებას თუ შემომთავაზებს, უარი რომ არ ვთქვაო.
„გურია ნიუსის“ კითხვაზე, მიმართა თუ არა მან ოზურგეთის მუნიციპალიტეტის მერიას ოფიციალურად, განცხადებით, თქვა რომ ის ხშირად დადის და იქ და ვერ მოახერხა პირველ პირებთან შეხვედრა.
ჩვენ დავუკავშირდით მუნიციპალიტეტის მერიის პრესსამსახურს და გვითხრეს, რომ ქალბატონმა ცავლინა აფხაზავამ განცხადებით უნდა მიმართოს მუნიციპალიტეტის მერიას და უყურადღებოდ არ დატოვებენ.
ვრცლად ცავლინა აფხაზავას უმძიმესი მდგომარეობის შესახებ მალე გიამბობთ.
ავტორი
