სამი ვერსიაა – ან გაგიჟდა, ან შანტაჟის ქვეშ არის, ან რადიკალურ ამომრჩეველზე “ჩალიჩობს”. ბოლო ორი შეიძლება ერთმანეთთან იყოს კავშირში, შეიძლება – არ, – ამის შესახებ “გირჩის” ლიდერმა იაგო ხვიჩიამ განაცხადა.
მისივე თქმით, ერთ-ერთ ვერსიაში შეიძლება “ქართული ოცნება” ხელშემწყობად მოიაზრებოდეს.
“რამდენიმე ვერსიაა ალეკოს მხრიდან ამ ქმედების ჩადენის: პირველი ვერსიაა, რომ ალეკო დათვრა, ქართულ “ჯიგრულ” “პონტში”, სიმთვრალეში გაურისკავს ხალხს ამ ქვეყანაში. თუ შენ გაბრაზდი, მიხვდი, რომ ქართველებს ამდენი რამე დაუშავა ამ სასამართლომ და მურუსიძემ, რა შუაშია მისი კანცელარია? დარწმუნებული ვარ, გახსნის მერე იქ არ იქნება ნამყოფი მურუსიძე. თუ იქ შეაღწიე, თუ იქ ბენზინი მოასხი, ერთი “სპიჩკის” გაკვრა რა გახდა, პირობითად, თუ მთვრალი ხარ და იქამდე თუ მიაღწიე. მე ამას ნეიტრალურად ვაფასებ.
თუ პირობითად, მართლა რაღაცის დაზიანება გინდა და თან 10-წლიანი რაღაცით რისკავ, ხომ შეიძლება, რომ უფრო კარგად დააზიანო, კანცელარიაში სამი ცალი კომპიუტერი რას დაუშავებს ელექტრონული სისტემის პირობებში სასამართლოს? მაგრამ, ვინაიდან დათვრა კაცი და მთვრალი ბოლომდე არ არის ხოლმე ადეკვატური, ეპატიოს ამ ვერსიისთვის. თუმცა, რომ გამოფხიზლდა, მეორე დღესაც თქვა, რომ არ ვიყავი მთვრალიო, ამიტომ, ეს ვერსია უნდა გამოირიცხოს.
მეორე ვერსია არის შანტაჟი – ვინმე ხომ არ აშანტაჟებს და მე ვფიქრობ, რომ ეს არის ყველაზე სერიოზული ვერსია ალეკო ელისაშვილის საქმეში. შეიძლება აშანტაჟებენ, ასე მოიქეცი შენ, თორემ ჩვენ რაღაცას ვიზავთ და ასე რომ მოიქცევი შენ, ჩვენ ამას გამოვიყენებთ იმისთვის, რომ მერე გამოვა, პირობითად, ბატონი პარლამენტის თავმჯდომარე და იტყვის, რომ აი, ნახეთ ტერორისტულ აქტს გვიწყობდა ევროკავშირი და მისი მეგობრები – ბრიუსელი, ალდე და ასე შემდეგ.
მესამე ვერსიაა – შენ “ჩალიჩობ” იმისთვის, რომ რადიკალური ოპოზიციური ნიშა, რაც მიშას უჭირავს ხელში და მაგიტომაც გამოეხმაურა მიშა, იმიტომ, რომ უგრძნო ინსტინქტმა, რომ ეს მის ამომრჩეველზე ღიტინია, რასაც ალეკო აკეთებს, ერთი მხრივ და შენ გინდა, რომ ამ რაღაცაში რადიკალური ოპოზიციური ამომრჩეველი მიიმხრო და აკეთებ რადიკალურ გიჟობას, რომელიც რადიკალურ ამომრჩეველს უყვარს და რომელსაც დაგიფასებენ. შეიძლება შენ გესმის, რომ ამით ფილტრავ შედარებით ნორმალურ ხალხს, არ მომცე ხმაო, მაგრამ რადიკალ ამომრჩეველზე, რომელსაც უნდა, რომ რაღაც გაანადგუროს, გადაწვას, მიუხედავად იმისა, რომ არაფერ შუაში არ არის სასამართლოს კანცელარიის შენობის გადაწვა, ეგრე შეგიძლია ნებისმიერი სახელმწიფო უწყება დაწვა, მნიშვნელობა არ აქვს, მაგრამ ხალხს აჩვენო, რომ შენ ხარ ისეთი ნაღდი ოპოზიციონერი, რომელიც მზად არის კანცელარიაში შევარდეს, იჯაჯგუროს, ნავთი მოასხას და შემდეგ ჩაჰბარდეს პოლიციას და ისევე ჰქონდეს იმედი, რომ ხალხი ამას “შეჭამს”, იმიტომ, რომ წინა არჩევნებზეც “უჭამია”, იმის წინა არჩევნებზეც და გგონია, რომ ეს სულ გაგივა. ამას შეიძლება “ქოცებიც” უწყობდნენ ხელს”, – განაცხადა იაგო ხვიჩიამ.
ალეკო ელისაშვილს გამოძიება ტერორისტული აქტის ჩადენის მცდელობას ედავება. გამოძიების ინფორმაციით, ელისაშვილმა დილის 4 საათზე, ნიღბით, იარაღით, საბრძოლო მასალით და სხვა ნივთებით, ჩაქუჩით ჩაამსხვრია მინა და სასამართლოს შიდა სივრცეში შეაღწია, დაასხა აალებადი ნივთიერება და ხანძრის გაჩენა სცადა. ასევე, სცემა მანდატურს, დაკავების პროცესში კი წინააღმდეგობას უწევდა მანდატურებს და ცდილობდა იარაღის ამოღებას.
