გასული კვირის მიწურულს გაერთიანებული ოპოზიციის მერობის საერთო კანდიდატმა ლანჩხუთში ლია მუხაშავრიამ ოპონენტები დებატებში მონაწილეობის მისაღებად მიიწვია. თუმცა, აღმოჩნდა, რომ მისი ეს შეთავაზება გაუზიარებელი დარჩა ოპონენტთა მხრიდან.
ჩაშლილი დებატების პასუხად მუხაშავრიამ პრესკონფერენცია გამართა.
„დასანანია, რომ ჩემს ოპონენტებს არ ეყოთ ჩემთან დებატების გამართვის გამბედაობა, მიუხედავად იმისა, რომ ერთი ბატონი ალექსანდრე სარიშვილი მოქმედი მერია და ვალდებულია, ანგარიში ჩააბაროს განვლილი საქმიანობის შესახებ თავის ამომრჩევლებს, მით უფრო, რომ ისევ აპირებს გახდეს ლანჩხუთის მერი. ხოლო ბატონ კალანდარიშვილს ამ დებატებში მონაწილეობით ადვილად შეეძლო დაერწმუნებინა ამომრჩეველი საკუთარ უპირატესობაში. მაგრამ, ვაი, რომ არც პირველს _ სარიშვილის აღმოაჩნდა პასუხისმგებლობა და არც მეორეს _ გამბედაობა ამისათვის“, _ თქვა ლანჩხუთში ოპოზიციის მერობის საერთო კანდიდატმა.
პრესკონფერენციისას მუხაშავრიამ მმართველი პარტია ადმინისტრაციული რესურსის გამოყენებაშიც დაადანაშაულა და თქვა, რომ საჯარო მოხელეები პირდაპირ არიან ჩართული საარჩევნო კამპანიაში.
„ოპოზიციაში მრავალი საჩივარი შემოდის. სამწუხაროდ, ისევ გრძელდება ადმინისტრაციული რესურსის გამოყენება და ის საჯარო მოხელეები, რომლებიც არ იმყოფებიან შვებულებაში, სამუშაო საათებში პირდაპირ ახორციელებენ წინასაარჩევნო აგიტაცია-პროპაგანდას. ჩვენ თითოეული მათგანი ვიცით ინდივიდუალურად და თითოეულ მათგანზე გვექნება სათანადო რეაგირება“, _ აღნიშნა მუხაშავრიამ.
მმართველი პარტიის მხრიდან ადმინისტრაციული რესურსის გამოყენების თემა პრესკონფერენციისას უფრო განავრცო ენმ-ის ადგილობრივმა ლიდერმა კახა ასკურავამ და კონკრეტული სახელი და გვარები დაასახელა იმ საჯარო მოხელეების, ვინც, მისი თქმით, წინასაარჩევნო კამპანიაშია ჩართული კანონის უგულვებელყოფით.
„სამსახურის უფროსები ასრულებენ პირდაპირ „ოცნების“ კოორდინატორის ფუნქციას. მათ აქვთ აღებული კონკრეტული სოფელი, სადაც ისინი ხელმძღვანელობენ საარჩევნო კამპანიას. ასეთია ინფრასტრუქტურის სამსახურის უფროსი ლევან ჩხაიძე, ზედამხედველობის სამსახურის უფროსი თენგიზ ხელაძე, რომლის შვილიც ოლქშია დასაქმებული და მერიის პიარი მაკა სულაბერიძე, რომელიც უკვე დაჯარიმდა კიდეც კანონის დარღვევისთვის 500 ლარით. პრაქტიკულად, ზღვარი აღარ არსებობს, იმ შენობიდან, სადაც, თავის დროზე, „ქართული ოცნების“ დროშა გადმოფინეს, ახლა „ოცნების“ შტაბშია გადმობარგებული“, _ თქვა ასკურავამ.
„გურია ნიუსი“ პოზიციის დასაფიქსირებლად ოპოზიციის მხრიდან ბრალდების ადრესატებს დაუკავშირდა.
თენგიზ ხელაძე კატეგორიულად უარყოფს მსგავს ფაქტს და ამბობს, რომ არანაირად არაა ჩართული წინა საარჩევნო კამპანიაში.
„გამორიცხულია მსგავსი რამ. ვერავის, ვერც ერთ ოჯახს ვერ ნახავთ, რომ თენგო ხელაძე მათთან მისულიყოს და ხმის მიცემა ეთხოვოს, თანამშრომლებისთვისაც არასდროს მიკადრებია მსგავსი რამ. გამორიცხულია, თუ მიცნობთ ასეა ნამდვილად“, _ გვითხრა ზედამხედველობის სამსახურის უფროსმა.
წინასაარჩევნო კამპანიაში მონაწილეობას, ასევე, არ ადასტურებს მერიის ინფრასტრუქტურის სამსახურის ხელმძღვანელიც.
„არც ოფიციალურად და არც არაოფიციალურად არასდროს არ ვყოფილვარ კოორდინატორი. ეტყობა ოპოზიციას შეეშალა, მეორე ლევან ჩხაიძეა არის და ის ნამდვილადაა კოორდინატორი, ეტყობა შეეშალათ“, _ გვითხრა ლევან ჩხაიძემ.
მისი მისამართით გაჟღერებული ბრალდებები არც მერიის პრესასთან ურთიერთობის განყოფილების ხელმძღვანელმა მაკა სულაბერიძემ დაადასტურა. მისი თქმით, მცდარია ინფორმაციაც 500-ლარიანი ჯარიმის თაობაზეც.
„არასწორი ინფორმაციაა. მე, პირადად, არანაირად არ ვერევი წინა საარჩევნო კამპანიაში. ივლისის ბოლოს გამოვედი შვებულებიდან, იქედან მოყოლებული ვარ სამსახურში და ვასრულებ ჩემზე დაკისრებულ სამსახურებრივ მოვალეობას. ჯარიმის თაობაზეც ინფორმაციაც არასწორია“, _ გვითხრა მაკა სულაბერიძემ.
[sexy_author_bio]
