ესპანეთის ქალაქ ბარსელონაში დატრიალებულ ტრაგედიას სამტრედიელი ორი ძმის სიცოცხლე ემსხვერპლა.
ოთხსართულიან საცხოვრებელ კორპუსში გაჩენილი ხანძრის შედეგად დაიღუპნენ ძმები, 27 წლის გიორგი და 22 წლის საბა მატარაძეები.
,, გურია ნიუსი” დაუკავშირდა ესპანეთში მცხოვრებ, წარმოშობით სამტრედიელ მოქალაქეს, რომელმაც მომხდარის შესახებ დაწვრილებითი ინფორმაცია მოგვაწოდა.
წყაროს თქმით, სამტრედიელი ძმები ესპანეთში სამუშაოდ, დაახლოებით, ორი თვის წინ ჩავიდნენ. ქალაქ მადრიდის სანტა კოლონეს უბანში, ოთხსართულიანი საცხოვრებელი კორპუსის მესამე სართულზე ცხოვრობდნენ. მეორე სართულზე ესპანელები ცხოვრობდნენ, ხოლო პირველ სართულზე ცხოვრობდა შავკანიანი მამაკაცი ოჯახთან ერთად. ეს უკანასკნელი უნებართვოდ იყო შეჭრილი, რომელსაც დროთა განმავლობაში, სასამართლოს გზით დაატოვებინეს საცხოვრებელი სახლი. განაწყენებულმა შავკანიანმა მამაკაცმა, შურისძიების მიზნით, შუაღამისას, როცა შენობაში მყოფებს ეძინათ, პირველ სართულზე გააჩინა ხანძარი. კვამლის შედეგად მეორე სართულზე მცხოვრები ესპანელი ქალი გაიგუდა. მესამე სართულზე ერთმა ბიჭმა გაიღვიძა, რომელმაც დანარჩენებიც გააღვიძა. ის ბიჭი გადარჩა, მაგრამ, საუბედუროდ, ვერ გადარჩნენ სხვები. მათ შორის სამტრედიელი ძმები. გიორგი ხანძრის შედეგად დაიწვა, საბა კი გაიგუდა. დაღუპულია კიდევ ერთი, მაროკოელი მოქალაქე.
გარდაცვლილები ამდროისთვის ვალდებრონის საავადმყოფოში ჰყავთ მოთავსებულები.
სრულიად სამტრედია შეძრა ამ ტრაგედიამ. სოციალურ ქსელში ადამიანები დადებითად ახასიათებენ ახალგაზრდებს, გულისტკივილს გამოხატავენ ძმები მატარაძეების ტრაგიკულად დაღუპვის გამო და ოჯახს სამძიმარს უცხადებენ.
ავტორი
