სამტრედია” მომავალ წელსაც უმაღლეს ლიგაში იასპარეზებს

დღეს საფეხბურთო კლუბ ,,სამტრედიის” ფეხბურთელებმა წლის შემაჯამებელი თამაში გამართეს საგარეჯოში, სადაც ,,გარეჯთან” ანგარიშით 3:1 წააგეს. მართალია, ,,სამტრედია” გასვლით შეხვედრაში დამარცხდა, თუმცა, ფლეი აუტის ორმატჩიან დაპირისპირებაში საშინაო თამაში 6 დეკემბერს, სამტრედიაში 4:1 ანგარიშით მოგებული ჰქონდა. საერთო ჯამში, 5:4 იმარჯვეს და კლუბმა ეროვნულ ლიგაში ასპარეზობის უფლება შეინარჩუნა. ,,სამტრედია” მომავალ წელსაც უმაღლეს ლიგაში ითამაშებს, იქ, სადაც მისი ადგილია.

ფაქტობრივად, ჩვენ რა მიზანიც დავისახეთ აწ უკვე გასულ სეზონში, კლუბის შესაძლებლობებისა და მაღალი კონკურენციის გათვალისწინებით, სწორედ ეს მიზანი იქნა მიღწეული. ვფიქრობ, ,,სამტრედია” მომავალ წელს უფრო გაძლიერებული შემადგენლობითა და მაღალი ადგილებისათვის იბრძოლებს”. – მედიასთან კომენტარში აღნიშნავს ,, სამტრედიის” ფეხბურთელი, თორნიკე ახვლედიანი.

გასვლით თამაშს და ეროვნულ ლიგაში დარჩენას სოციალური ქსელიდან დღესვე გამოეხმაურნენ საგარეჯოში საგულშემატკივროდ ჩასული სამტრედიელი ფანები და კახელებს მასპინძლობა დაუწუნეს:,,ის, რისთვისაც მთელი წელი ვიბრძოდით, რისთვისაც ერთ მუშტად შეკრულნი, გუნდი და ფანები მიზნისკენ ვისწრაფოდით, რისთვისაც ბევრი გამარჯვება,ბევრი მარცხი და ბევრი ემოცია გამოვიარეთ, მაგრამ რწმენა და გამარჯვებულის მენტალიტეტი არასდროს დაგვიკარგავს, ჩვენ ერთმანეთს პირობა მივეცით რომ ამ გუნდს ლიგა 1-ში დავტოვებდით და ეს სიტყვა ყველამ ერთად შევასრულეთ.

ერთმანეთისთვის გავლილი 600 კილომეტრი, არა სტუმართმოყვარე დახვერდა ქალაქში შესვლის წამიდან (რაც კახელებს არ სჩვევიათ) თამაშის მსვლელობისას დიდი ნერვიულობა, დაძაბულობა, მაგრამ ბრძოლაში გამარჯვება, ზეიმი, ბევრი ლუდი, მაგარი ფანობა და მოზღვავებული ემოცია, ეს ყველაფერი ჩვენ განვიცადეთ, მაგრამ ვბრუნდებით გამარჯვებულები და პატარა საფეხბურთო ქალაქში მოგვაქვს ლიგა 1-ის საგზური. გილოცავთ, ყველას, ამ გამარჯვებას, ვინც გვგულშემატკივრობდით და ვისაც ჩვენი გამარჯვების გჯეროდათ.

მადლობა ,,ჯუნგლებს” მხარდაჭერისთვის და გვერდით დგომისთვის( იღბლიანი ბარაბანია ) მადლობა ბიჭებს ბრძოლისთვის. გპირდებით, შემდეგი წლიდან უფრო ძლიერები დავბრუნდებით ერთმანეთისთვის.”