ავთანდილ თავბერიძე ქალაქ სამტრედიის პირველი საჯარო სკოლის მეთერთმეტე კლასის წარჩინებული მოსწავლეა.
მან, ცოტა ხნის წინ, გაცვლითი პროგრამის ფარგლებში, ,,სთარ აკადემიის” მიერ გამოცხადებულ კონკურსს მიიღო მონაწილეობა, სადაც გაიმარჯვა კიდეც.
ავთანდილ თავბერიძე იმყოფებოდა შვეიცარიაში დეიდასთან სტუმრად, მანამდე კი დარეგისტრირებული იყო ზემოაღნიშნულ კონკურსში მონაწილეობის მისაღებად. შეიძლება ითქვას, პირდაპირ აეროპორტიდან მივიდა გამოცდაზე. ჩააბარა ყველა საგანში კომპლექსური გამოცდა და ყველა საგანში მაღალი ქულები მიიღო, რითაც მოიპოვა ამერიკაში სწავლის უფლება.
,,ათუკა ჩვენი სკოლის მეთერთმეტე კლასის წარჩინებული მოსწავლეა. მან ცხრა კლასი დაამთავრა ათებზე და პერსონალური კომპიუტერი აიღო წარჩინებული სწავლისთვის. ამ ეტაპზე თავისი შედეგებით არის ათოსანი მოსწავლე. ძალიან წარმატებულია, უამრავ პროექტში ღებულობს მონაწილეობას, არის თვითმმართველობის აქტიური წევრი, გამოირჩევა ზრდილობიანი ყოფაქცევით, თავმდაბალი და გულთბილი ახალგაზრდაა.”- ,, გურია ნიუსთან” კომენტარში ასე ახასიათებს წარმატებულ მოსწავლეს ქალაქ სამტრედიის პირველი საჯარო სკოლის დირექტორი, ხათუნა ფაილაძე.
ავთანდილ თავბერიძე ამერიკაში სასწავლებლად აგვისტოში გაემგზავრება; იცხოვრებს ერთ-ერთ მიმღებ ოჯახში და სექტემბრიდან მაისის ჩათვლით ისწავლის საშუალო საფეხურის დამამთავრებელ კლასში. ამ დროისთვის ჯერ არ არის ცნობილი, თუ რომელ შტატში ისწავლის; მაისში დაუბრუნდება მშობლიურ, ქალაქ სამტრედიის პირველ საჯარო სკოლას. ხოლო სამომავლოდ დაგეგმავს, სად გააგრძელებს უმაღლესი განათლების მიღებას.
ავტორი
