ლანჩხუთის საკრებულოს ბოლო სხდომაზე მუნიციპალიტეტის პირველმა პირმა, ზაზა ურუშაძემ დეპუტატებს გასული წლის მთავარი საფინანსო დოკუმენტის ანგარიში წარუდგინა, სადაც ვრცლად ისაუბრა გახორციელებულ ინფრასტრუქტურულ თუ სხვა მნიშვნელოვან პროექტებზე. მისი თქმით, ძირითადი ვალდებულებები, რაც მუნიციპალიტეტს ჰქონდა აღებული, შესრულებულია.
„ბოლო წლებში ჩვენთან, დაახლოებით, 30 მილიონი ლარის მობილიზება მოხდა ინფრასტრუქტურის მხრივ. ოთხი მუნიციპალიტეტი გვისწრებს მხოლოდ, ესეც იმიტომ, იქ ლანჩხუთთან შედარებით დიდი ქალაქები ფიგურირებს“, _ აღნიშნა საკუთარი მოხსენებისას ზაზა ურუშაძემ, რომელმაც შედარება წინა ხელისუფლების მმართველობის პერიოდთანაც გააკეთა.
„ნაციონალების“ დროს რვა მილიონი იყო შემოსული ამ კუთხით და სხვაობას კი უნდა ხედავდეთ. 2013 წელს, როცა მე გავხდი გამგებელი, ბიუჯეტი მილიონ 400 ათასი ლარი იყო, ახლა კი გაორმაგებულია. თან ეს იმ პირობებში, როცა ლანჩხუთში არც საწარმო გახსნილა და არც ფაბრიკა-ქარხნები. ეს არის სწორედ სწორი მენეჯმენტის დამსახურება. გამგებლის ფუნქციაა, რაც შეიძლება მეტი ფული მოიზიდოს“.
ეს სიტყვები გამგებელმა იმ დეპუტატთა გასაგონად განაცხადა, ვინც სწორედ მენეჯმენტს უწუნებდა მას.
„ურუშაძის მოხსენების შემდეგ ყოფილი გამგებელი, გია გოგუაძე დაინტერესდა, თუ ვინ უნდა აგოს პასუხი ბიუჯეტის არასწორ დაგეგმვაზე, რამაც, საბოლოოდ, გეგმის შეუსრულებლობა გამოიწვია.
„მესამედ ვისმენთ თქვენგან ბიუჯეტის ანგარიშს და არცერთი არ იყო შესრულებული. ყოველთვის წლის ბოლოს ბიუჯეტში იყო სეკვესტრი და ყოველთვის მოდიოდა მთავრობის დახმარება სარეზერვო ფონდიდან. განცხადებებს როცა აკეთებთ, რომ ჩემი დამსახურებაა სამ მილიონამდე რომ გაიზარდა ბიუჯეტიო, თქვენი სამწლიანი გამგებლობის პერიოდში გადახედეთ ბიუჯეტს და თუნდაც ერთი საკრებულოს სხდომა დამისახელეთ, სადაც, გარდა ინფრასტრუქტურული შემოსავლებისა, ადგილობრივი შემოსავლებით გაზრდილა ბიუჯეტი. იქნებ მითხრათ, ვინ არის პასუხისმგებელი ბიუჯეტის არასწორად დაგეგმვასა და ხარჯვითი ნაწილის ვერშესრულებაზე?“_ იკითხა გოგუაძემ, თუმცა, ურუშაძისთვის გაუგებარი დარჩა რა პასუხისმგებლობის აღებაზეა საუბარი, როცა ბიუჯეტის შევსებას, სულ რაღაც, 1,4% დააკლდა.
ამ სხდომაზე გამგებელს კვლავ შეახსენეს, რომ გამგეობასა და საკრებულოში ინტერნეტისა და ქსეროქსის პრობლემაა მოსაგვარებელი, ხოლო საკრებულოს თავმჯდომარის სამსახურებრივი ავტომანქანა გამოუსადეგარია – „ეს მანქანა სანამ უნდა იყოს ქუჩის ქალივით ხან ერთი ქუჩის კუთხეში აყუდებული და ხან მეორე ქუჩის. არ შეიძლება მისი შეცვლა?!“ _ იკითხეს დეპუტატებმა.
უცნობი დარჩა, რა ვერდიქტს გამოუტანენ საკრებულოს კუთვნილ მანქანას, თუმცა, გაირკვა, რომ ინტერნეტის პრობლემა გამგეობა-საკრებულოს მალე მოუგვარდება, რადგან ტენდერი უკვე გამოცხადებული ყოფილა.
შუხუთის ადმინისტრაციული ერთეულის წარმომადგენელი საკრებულოში, აკაკი იმნაიშვილი სოფლის ყოფილი კულტურის სახლის შენობის ბედით დაინტერესდა, რაზეც გამგებელმა განმარტა, ეს შენობა აღდგენას აღარ ექვემდებარება.
„სპეციალისტების დასკვნა არსებობს, რომ იგი ექსპლუატაციისთვის გამოუსადეგარია, არ არსებობს არმატურა და სხვა რამ, რაც შენობის მდგრადობას ხელს შეუწყობს. ინფრასტრუქტურის მინისტრსაც კი შეხვდი ამის თაობაზე, გავაცანი არსებული მდგომარეობა და შევთავაზე, რომ გვინდა ამ შენობის დემონტაჟი და მის ნაცვლად სპორტდარბაზის აშენება, რაზეც თანხმობა მივიღე. თუმცა, შემდეგ თქვენ მოხვედით ჩემთან და მოსახლეობის ხელწერები მომიტანეთ, რომ არ გინდათ ამ შენობის დანგრევა. შენობა ამორტიზირებულია და მისი აღდგენა შეუძლებელია, 1934 წელსაა აშენებული“, _ თქვა ურუშაძემ, თუმცა პასუხი მიუღებელი დარჩა იმნაიშვილისთვის.
„ეს შენობა გასული საუკუნის 60-იან წლებშია აშენებული და სოფლისთვის უნიკალურია. მე-12 საუკუნის ძეგლების აღდგენა–რესტავრირება ხდება და ამას ვერ შეინარჩუნებთ?! უბრალოდ, არ გინდათ და ეს არის სიმართლე. შეთანხმებულები ვიყავით, რომ სამხარაულის ექსპერტიზის ბიურო მოგვეწვია, მითხარით, ვის შეამოწმებინეთ?! ტყუილია ეს ყველაფერი“, _ ცხარობდა შუხუთის მაჟორიტარი, რომელიც გამგებლისგან პასუხსაც ითხოვდა კითხვაზე _ რა დაპირება ვერ შეასრულა ბიძინა ივანიშვილმა.
„საკრებულოს ერთ–ერთ სხდომაზე განაცხადეთ, რომ მე კი არა, ყველა დაპირება ბიძინა ივანიშვილმაც ვერ შეასრულაო. მაინტერესებს, რას დაჰპირდა ბატონი ბიძინა ხალხს და რა ვერ შეასრულა. გამეცით ამ კითხვაზე პასუხი“, _ რამდენჯერმე ჰკითხა აკაკი იმნაიშვილმა გამგებელს, მაგრამ პასუხი ვერ მიიღო. სამაგიეროდ, გამგებელმა გუნდური თანადგომა დაუწუნა დეპუტატს და ჩავლილი თვითმმართველობის არჩევნები შეახსენა,
„სიმართლე ისაა, რომ თქვენ თვითმმართველობის არჩევნებზე მე მხარს არ მიჭერდით, მიუხედავად იმისა, რომ „ქართული ოცნების“ მიერ იყავით დასახელებული სოფლის მაჟორიტარად“.
საპასუხოდ იმნაიშვილმა საკრებულოს წევრების ნაწილსა და ჟურნალისტებს საარჩევნო ბიულეტენისთვის გადაღებული ფოტო აჩვენა _ „აქ კარგად ჩანს, თუ ვინ შემოვხაზე. ეს ფოტო გამგებელსაც ვაჩვენე და კარგად იცის, რომ ხმა მას მივეცი, ახლა კი საუბრობს მხარს მე არ მიჭერდიო. აგერაა ფაქტი, მეტი რა ენით ვისაუბრო“, _ დასძინა მან.
საკრებულოს წევრმა დარეჯან ბურჭულაძემ კი ზაზა ურუშაძეს ის პრობლემა შეახსენა, რაც გრიგოლეთის პლაჟზე ექმნებათ დამსვენებლებს.
„ე.წ. ბახმაროს დასახლებაში პლაჟზე გასასვლელი, ფაქტობრივად, აღარ არის, ყველაფერი ისეა გადაღობილ-გადმოღობილი. ამ პრობლემაზე საუბრისას ერთმა ჩემმა კოლეგამ ფაქტებით საუბარი მირჩია და აი, ფაქტებიც, ფოტოები გადავუღე იქაურობას. მაინტერესებს, მე ან ვინმე ჩემმნაირმა რიგითმა ადამიანმა ერთი მეტრი მიწაც რომ შემოღობოს პლაჟზე, აპატიებს ვინმე? რატომ აძლევთ მაშინ იმ ხალხს უფლებას, თვითნებურად დაისაკუთრონ პლაჟი?“ _ იკითხა ბურჭულაძემ, რაზეც ურუშაძისგან პასუხად მიიღო, რომ მისი გამგებლობის პერიოდში იქ არ გაცემულა მიწა კერძო საკუთრებაში.
საბოლოოდ, დეპუტატთა შეფასებით, გამგებლის მიერ წარმოდგენილი გასული წლის ბიუჯეტის ანგარიშმა ხუთბალიანი შეფასებიდან სამი ქულა მიიღო.
„ჯამში ჩვენ მიერ დაგეგმილ ბიუჯეტში დაგვაკლდა, დაახლოებით, ნახევარი მილიონი ლარი. ქებათა ქება ეკუთვნის გამგეობის საფინანსო სამსახურს, რომ ჩვენს მიერ არასწორად დაგეგმილი ბიუჯეტი 98%-ით შესრულდა. მადლობა ლაშხიას და მის გუნდს. მოკლედ, ბიუჯეტის შესრულება დამაკმაყოფილებლად შეფასდა, ანუ სამიანი დავწერეთ“, _ ფრაქციათა კოალიციის სახელით განმარტა დეპუტატმა გიორგი ჩახვაძემ.
