ახალი სასწავლო წელი უკვე დაიწყო. ლანჩხუთის მუნიციპალიტეტის სკოლებში სასწავლო პროცესი უმტკივნეულოდ მიმდინარეობს, თუ არ ჩავთვლით იმ ფაქტს, რომელზეც აქცენტს საკრებულოს ყოფილი წევრი ამირან გიგინეიშვილი აკეთებს.
ირკვევა, რომ სოფელ ეწერის საჯარო სკოლის შენობა ავარიულ მდგომარეობაშია და იქაურ პედაგოგებსა და მოსწავლეებს ახალი სასწავლო წლის დაწყება ისევ სხვა სკოლის შენობაში, მეორე ცვლაში მოუწიათ. რის გამოც, როგორც გიგინეიშვილი წერს, მოსწავლეებს არაერთი დისკომფორტი ექმნებათ კლასგარეშე საქმიანობის კუთხით.
“ეწერის სკოლის შენობის დაზიანების შესახებ გაზაფხულზე გავიგეთ. საშიშიაო და ბავშვები მეორე ცვლაში სოფელ ნინოშვილში გადაიყვანეს. ახლა სექტემბრის ბოლოა და შენობას არავინ შეხებია სარემონტოდ. შესაბამისად, მეორე ცვლის გამო შეუძლებელი გახდა ბავშვის ტარება სპორტზე, ხატვაზე, ნებისმიერ სხვა წრეზე, რაც არის ლანჩხუთში. შეუძლებელი გახდა რეპეტიტორთან ბავშვის ტარება, რომ უმაღლეს სასწავლებელში ჩაბარება შეძლოს (არავინ თქვას, ურეპეტიტოროდ ვინმე ჩააბარებსო!). კითხვა რესურსცენტრს, სკოლის დირექციას, დაინტერესებულ მხარეებს, მერს, საკრებულოს, მაჟორიტარ დეპუტატს, პარლამენტის მაჟორიტარს _ სანამდე იქნება ასე?” _ მიმართავს კითხვის ადრესატებს ამირან გიგინეიშვილი.
გიგინეიშვილის პასუხად სოფლის მაჟორიტარი ელისო ჭიჭინაძე განმარტავს, რომ უახლოეს ხანში იგეგმება სკოლის შენობის დემონტაჟი და მის ნაცვლად ბავშვებს ახალი, თანამედროვე სტანდარტების შესაბამისი საუკეთესო სკოლა ექნებათ.
“ბავშვები გადაყვანილები არიან მიმდებარე სკოლაში მეორე ცვლაში. შეკეთებას აღარ ექვემდებარება ეწერის სკოლა, ამიტომ მოხდება მისი დემონტაჟი, რომელიც დაიწყება უახლოეს ხანში (შესაბამისი პროცედურებია გასავლელი) და ბავშვებს ექნებათ საუკეთესო სკოლა. ცოტა ხნით მოგიწევთ დისკომფორტთან შეგუება, მალე იქნება ახალი და კარგი სკოლა”, _ განმარტავს სოფლის მაჟორიტარი.
საკითხთან დაკავშირებით უფრო კონკრეტული ინფორმაციისთვის “გურია ნიუსი” ლანჩხუთის საგანმანათლებლო რესურსცენტრის ხელმძღვანელს ნინო ჩიტაძეს დაუკავშირდა.
ჩიტაძის თქმით, სკოლის დემონტაჟის თაობაზე დასკვნა, რამდენიმე თვის წინ, სამხარაულის ექსპერტიზის ბიურომ დადო და ახლა ჯერი დემონტაჟის პროექტის მომზადებაზეა, რის შემდეგაც ახალი პროექტის შესაბამისად სკოლის მშენებლობა დაიწყება:
“სადღაც ივლისის ბოლოს გახდა ჩვენთვის ცნობილი სამხარაულის ექსპერტიზის ბიუროს დასკვნით, რომ შენობა დასაშლელია.
ეს შენობა საკმაოდ რთულ ვითარებაში იყო და ბავშვების იქ გაჩერება საშიში გახლდათ, რადგან ჩავარდნილია იატაკი, ჭერიდან კი ბათქაში ცვივა. შესაბამისად, მოსწავლეების უსაფრთხოებიდან გამომდინარე, მანამ, სანამ სამხარაულის დასკვნა ჩამოვიდოდა, მოხდა მოსწავლეების გადაყვანა ალტერნატიულ შენობაში. სამხარაულის ბიურომ დადო დასკვნა, რომ შენობა იმდენად ამორტიზირებულია, მთლიანად უნდა დაიშალოს და აშენდეს ახალი. შესაბამისად, სკოლას დაწერილი აქვს განცხადება და პროექტი უნდა მომზადდეს დემონტაჟზე, ესეც სამხარაულის ბიუროს მიერ. ამ პროექტის მომზადების მერე მოხდება სკოლის დემონტაჟი და ახალი პროექტი დამტკიცდება. აქედან გამომდინარე, ზუსტ დროს, თუ როდისთვის იქნება მზად ახალი სკოლა, ჯერჯერობით, ვერ ვასახელებთ. ბავშვები გადაყვანილები არიან უახლოეს სასწავლო დაწესებულებაში, მთელ სკოლას ემსახურება ტრანსპორტი”, _ გვითხრა ლანჩხუთის რესურსცენტრის ხელმძღვანელმა.
ავტორი
