საქართველოს საკალათბურთო ნაკრების წევრი სანდრო მამუკელაშვილი კარიერას „სან ანტონიო სპურსში“ გააგრძელებს. „მილუოკიდან“ გათავისუფლებულმა მოთამაშემ ახალი კლუბი ორ დღეში იპოვა.
NBA-ს 5-გზის ჩემპიონი მიმდინარე სეზონში სუსტად ასპარეზობს. ლეგენდარული მწვრთნელის, გრეგ პოპოვიჩის ხელმძღვანელობით „სპურსს“ წლევანდელ რეგულარულ ჩემპიონატში 16 გამარჯვება და 47 მარცხი აქვს და ბოლოსწინა, მე-14 ადგილზე იმყოფება.
მამუკელაშვილი „სან ანტონიოში“ 54-ნომრიანი მაისურით ითამაშებს. „სპურსი“ 5 მარტს „ჰიუსტონს“ უმასპინძლებს და ქართველის დებიუტი შესაძლოა ამ შეხვედრაში ვიხილოთ.
„სან ანტონიოს“ გულშემატკივრები მამუკელაშვილის მოსვლას გულთბილად შეხვდნენ.
„ამ ბიჭის სათამაშო სტილი ძალიან მომწონს, არ მჯერა, რომ „ბაქსმა“ გაუშვა“.
„ბოლო თამაშებში შესანიშნავად გამოიყურებოდა, კარგი დანამატია“.
„ადრე მანუ გვყავდა (ემანუელ ჯინობილი), ახლა კი მამუ გვყავს“.
„სან ანტონიო“ ევროპელ კალათბურთელებს ყოველთვის იზიდავდა, იმედია სანდროც გაამართლებს“.
იტალიის პირველობაზე კი ხვიჩა კვარაცხელიას „ნაპოლი“ საკუთარ მოედანზე ყველასათვის მოულოდნელად რომის „ლაციოსთან“ დამარცხდა – 0:1.
ხვიჩამ 90 წუთი ითამაშა, აქტიურიც იყო, მაგრამ სტუმრებმა დაცვაში უშეცდომოდ ითამაშეს, ქართველიც გაანეიტრალეს, ვიქტორ ოსიმენიც და მთელი „ნაპოლი“, რომელსაც გოლის გასატანად ბევრი შესაძლებლობა ნამდვილად არ ჰქონია. ერთადერთი და გადამწყვეტი გოლი 67-ე წუთზე მატიას ვესინომ გაიტანა, რომელმაც შორი მანძილიდან ძალიან ძლიერად და ზუსტად დაარტყა. დასანანია, რომ ურუგვაელმა ბურთი კვარაცხელიასგან მიიღო…
დარჩენილ დროში ნეაპოლელებმა ყველაზე რეალური მომენტი ქართველის წყალობით შექმნეს, როდესაც მის ჩაწოდებას ოსიმენი გამოეხმაურა, მაგრამ ბურთი ძელს მოხვდა.
„ნაპოლი“ 65 ქულით ისევ ლიდერია და მეტოქეებთან უპირატესობა სოლიდურია. ლუჩანო სპალეტის გუნდი მომდევნო შეხვედრას 11 მარტს, შინ ბერგამოს „ატალანტასთან“ ჩაატარებს.
„ლაციოსთან“ მარცხის შემდეგ ნეაპოლური კლუბის მთავარმა მწვრთნელმა კომენტარი გააკეთა.
„გასახდელში ბიჭების მხრიდან დიდი უკმაყოფილება და მწუხარება დავინახე. ეს ნიშნავს, რომ მათ ყველაფერი გაიღეს და არაფერი დათმეს. ჩვეული ხარისხი არ გვქონდა, უფრო მეტი ხაზი უნდა შეგვექმნა, რომ მათი დაცვა შეგვეწუხებინა, რაც მეორე ტაიმში უფრო კარგად გავაკეთეთ, მაგრამ ბურთს ხარისხიანად ვერ ვფლობდით.
ასეთ „ლაციოს“ ველოდი, ვიცოდით, რომ თამაშს ასე მოამზადებდნენ. უფრო ზუსტნი უნდა ვყოფილიყავით, მაგრამ მენტალიტეტის თვალსაზრისით ბიჭებმა ყველაფერი აჩვენეს. არავის მხრიდან არ არის ჩავარდნის მოლოდინი. წინ უნდა ვიყუროთ, ვთქვი, რომ საჭეს ხელს არასდროს გავუშვებთ და ასე იქნება ყველა მატჩში, რომელიც გველოდება. ამ თამაშს გავაანალიზებთ და ვიმუშავებთ“,_ განაცხადა ლუჩანო სპალეტიმ.
რომის „ლაციოს” მთავარი მწვრთნელი მაურიციო სარის მოსაზრება შემდეგი გახლდათ:
„სპალეტი ამ სეზონის შემდეგ თუ მიაღწევს იმას, რასაც სავარაუდოდ აუცილებლად მიაღწევს, ნეაპოლის მეფე გახდება. მოგება ყველგან სასიამოვნოა, მაგრამ აქ გამარჯვება რაღაც განსაკუთრებულია, მიხარია, რომ ის ხალხს დიდ სიხარულს ანიჭებს.
ეს გამარჯვება ნიშნავს 3 ქულას, სამ მნიშვნელოვან ქულას, რადგან ისეთ გუნდთან მოვიგეთ, რომელიც ჩემპიონატში ცალკე თამაშობს, შინ 11 მოგება და 1 ფრე ჰქონდა. გუნდმა უმაღლეს დონეზე ითამაშა ყურადღების, მონდომებისა და თავდადების თვალსაზრისით, ტექნიკურად კი უკეთ თამაშიც შეუძლია. ჩვენთვის ერთი თამაში პრობლემა არასდროს ყოფილა, პრობლემა სტაბილურობაა. გასულ სეზონთან შედარებით მოვუმატეთ.
სატურნირო ცხრილი? ვფიქრობ, რომ ახლა ძილის დროა, რადგან მალე კიდევ ერთი მატჩი გვაქვს. ამ დროისთვის სატურნირო ცხრილზე ყურებას აზრი არ აქვს. სარის „ნაპოლი“ უფრო ლამაზი იყო თუ სპალეტის „ნაპოლი“? სილამაზე განსხვავებულია: თუ ქერა მოგწონს, არ ნიშნავს, რომ ლამაზი შავგვრემანი თუ გაივლის, მასზე თქვა, რომ მახინჯია. განსხვავება ისაა, რომ ეს „ნაპოლი“ ჩემპიონობისკენ მიდის, რაც მე არ გამომივიდა და ამის გამო სპალეტის სიკვდილამდე შემშურდება. კლუბმა შესანიშნავად იმუშავა ზაფხულში, ძალიან თამამად, კრისტიანო ჯუნტოლი კი ნამდვილი ფენომენია, რადგან მათ გამოიჩინეს გამბედაობა, როგორიც აქამდე არ გვინახავს”.
ავტორი
