ჩოხატაურში, რომლის საფეხბურთო გუნდი „ბახმარო“ რეგიონულ ლიგაშია, ფეხბურთის ნამდვილი ბუმია.
ლანჩხუთის „გურიას“ მწვრთნელების _ თემურ ლორიასა და თენგიზ პატარაიას გაწვრთნილმა „ბახმარომ“ რამდენიმე რეკორდი დაამყარა _ ზედიზედ 9 თამაშის მოგება, თუნდაც რეგიონლიგელი გუნდისთვის, ჩინებული შედეგია, უფრო მეტიც _ პირველი 8 ტურის განმავლობაში გოლიც არ გაუშვია. იუმორით ცნობილი გურულები ხუმრობდნენ და უხაროდათ _ ბუფონმა გაუშვა გოლი და „ბახმარო“ კარს მშრალად ინახავსო.
დღეს „ბახმაროში“ ნახავთ უნგრეთმოვლილ თემურ შარაშენიძე, ბალტიისპირეთში ნათამაშებ ბუკა ცინცაძეს, ლანჩხუთის „გურიას“ ბოლო წლების საუკეთესო გოლეადორს გიგა კვერენჩხილაძეს _ „კვერემ“ 12 მატჩში 16 გოლი გაიტანა და ზედიზედ 11 ტურია, მოედნიდან უგოლოდ არ გადის.
თემურ ლორია და თენგიზ პატარაია ამტკიცებენ, რომ საქმის პროფესიონალები და რაც მთავარია, ერთგულები არიან, აქვთ პასუხისმგებლობის გრძნობა.
როგორც თემურ ლორია ამბობს, ქვედა ლიგაში მუშაობას „ბახმაროს“ ამბიციების გამო დათანხმდა: „ჩოხატაურში მუშაობა ერთგვარი გამოწვევაცაა _ გუნდს აქვს ამბიცია, საუკეთესო ორ გუნდს შორის მოხვდეს და ზედა ლიგაში დაიმკვიდროს ადგილი.
როცა შემოთავაზება მივიღე მუნიციპალიტეტის ხელმძღვანელობისგან, ჩავედი ჩოხატაურში და შევხვდი ჩოხატაურის საკრებულოს თავმჯდომარეს ზაალ მამალაძეს, რომელიც დღევანდელი „ბახმაროს“ წარმატების სულის ჩამდგმელია“, _ ამბობს თემურ ლორია.
მისი თქმით, გადაწყვეტილების მიღებისას გადამწყვეტი კლუბის სპონსორთან შეხვედრა გახლდათ _ რეგიონლიგელ „ბახმაროს“ ჰყავს კერძო დამფინანსებელი;
„სწორედ კლუბის სპონსორ სამშენებლო კომპანია „NEW ROAD“-ის დირექტორისგან, დავით ჟღენტისგან მივიღეთ თანხმობა, რომ შევძლებდით ძლიერი ფეხბურთელების დამატებას. ყველაფერზე მივიღე დადებითი პასუხი და დავთანხმდი შეთავაზებას.
ერთიც მინდა აღვნიშნო, დღეს რასაც ბატონი დავითი „ბახმაროსთვის“ აკეთებს, ეს სპონსორობაზე მეტია, ასეთი ხალხი რომ ბევრი გვყავდეს, ქართული ფეხბურთი წინ წავა“, _ ამბობს მწვრთნელი.
პირველ ტურიდან „ბახმარო“ პირველ ადგილს არ თმობს და ამაში კვალიფიციურ მწვრთნელებთან ერთად, დიდი წვლილი იმ ფეხბურთელებს მიუძღვით, რომლებმაც უმაღლესი ლიგიდან დაამახსოვრეს თავი გულშემატკივრებს _ 24 წლის თემურ შარაშენიძეს დღესაც შეუძლია უმაღლეს ლიგაშიც ითამაშოს. მასავით უცხოეთშიც და ქართულ ელიტარულ კლუბებში აქვს ნათამაშები ბიძინა (ბუკა) ცინცაძეს _ ორივე მათგანმა სხვა კლუბებს მშობლიური გუნდი ამჯობინა და „ბახმაროს“ დასახმარებლად იღვწის. ცალკე აღნიშვნის ღირსია გიგა კვერენჩხილაძის თამაში _ „გურიამ“ მთავარი მეგოლე მოიძულა და „კვერემ“ დაამტკიცა, რომ ისევ მაღალ დონეზე შეუძლია თამაში!
„ყველაზე მთავარი ჩემთვის ადამიანური ფაქტორებია და რამდენი ხნითაც არ უნდა ვიყო გუნდში, ჩვენ მეგობრებად დავრჩებით. ასეთი ურთიერთობა და საქმიანი გარემო არის სწორედ ჩვენი წარმატების მთავარი განმაპირობებელი. რა თქმა უნდა, დიდია წამყვანი მოთამაშეების წვლილი (შარაშენიძე, ცინცაძე, კვერენჩხილაძე, კეკელიძე და სხვები), თუმცა, მათ გვერდით ახალგაზრდები დაოსტატდებიან. ჩვენ გამოცდილი ფეხბურთელებისა და პერსპექტიული ჭაბუკების სინთეზზე გავაკეთეთ არჩევანი და, როგორც ველოდით, გაამართლა“, _ ამბობს ლორია.
მთავარი მწვრთნელი სამომავლო გეგმებზეც საუბრობს და გვპირდება, რომ გულშემატკივრებს კვლავაც გაახარებს:
როცა პირველი წრე დასრულდება, დავილაპარაკებთ სამომავლო გეგმებზე. მიზანი უცვლელია _ იმ ორ გუნდს შორის მოხვედრა, ზედა ლიგაში თამაშის უფლებას რომ მოგვცემს.
ვეცდებით გავახაროთ გულშემატკივარი, რომლის მხარდაჭერა გასვლით შეხვედრებზეც არ გვაკლია. რა თქმა უნდა, გაძლიერება გვჭირდება და ეს რეალურია იმის გათვალისწინებით, თუ როგორ გვიდგას გვერდით სპონსორიც და მუნიციპალიტეტის ხელმძღვანელობაც, რომლებიც ვარჯიშებსაც კი არ აცდენენ, რაც ჩვენთვის დამატებითი სტიმულია“, _ დასძენს თემურ ლორია.
