კორპორაციული სოციალური პასუხისმგებლობის ფარგლებში, საქართველოს ბანკი განათლების ხელშეწყობას აქტიურად განაგრძობს. ამ მიზნით, ბანკი „ქართული წიგნის ინსტიტუტთან“ პარტნიორობით, მულტიფუნქციური ბიბლიოთეკების – იდეათეკების პროექტს წარმატებით ახორციელებს.
კომპიუტერებით, წიგნებით და სხვა შემეცნებითი საშუალებებით აღჭურვილი სივრცე ამჯერად პანკისის ხეობაში, სოფელ დუისის საჯარო სკოლაში გაიხსნა.
იდეათეკა ფორმალური თუ არაფორმალური განათლების ხელშეწყობის მიზნით შეიქმნა. ის ერთ სივრცეში აერთიანებს ბიბლიოთეკას, ტექნოლოგიურ რესურსებს და ისეთ აქტივობებს როგორიცაა: ყოველდღიური გაკვეთილები, ჯგუფური პრეზენტაციები, ონლაინ შეხვედრები მოსწავლეებისთვის საინტერესო სპიკერებთან და სხვა. პროექტის მთავარ მიზანს რეგიონების საჯარო სკოლებში, განსაკუთრებით კი საზღვრისპირა სოფლებში, თანამედროვე რესურსებზე წვდომის გაზრდა და ხელშეწყობა წარმოადგენს.
„ჩვენ ვაგრძელებთ იდეათეკების პროექტს. ახალი, მულტიფუნქციური სივრცე უკვე სოფელ დუისშიც გავხსენით. ამ პროექტის ფარგლებში გვინდა უფრო მეტ მოსწავლეს მივცეთ შესაძლებლობა, ჰქონდეთ წვდომა თანამედროვე ტექნოლოგიებზე. გვსურს, კიდევ უფრო მეტ პედაგოგს შევუწყოთ ხელი, ფორმალური თუ არაფორმალური განათლებისთვის საჭირო რესურსებზე მიუწვდებოდეს ხელი, რათა სასწავლო პროცესი კიდევ უფრო მრავალფეროვანი და ინტერაქციული იყოს. ბანკის მიერ განხორციელებული ამ პროექტით უკვე 4000-მდე მოსწავლე აქტიურად იყენებს იდეათეკის სივრცეებს და იქ განთავსებულ რესურსებს, როგორიცაა ინტერნეტი, კომპიუტერები, პროექტორები, მრავალფეროვანი ბიბლიოთეკა თუ სხვა შემეცნებითი ხელსაწყოები. ჩვენ არ ვჩერდებით და ვაგრძელებთ ამ და სხვა საგანმანათლებლო პროექტების განხორციელებას, რათა მეტმა ახალგაზრდამ შეძლოს საკუთარი პოტენციალის მაქსიმალურად ათვისება“, – განაცხადა საქართველოს ბანკის გენერალურმა დირექტორმა, არჩილ გაჩეჩილაძემ.
ინფორმაციისთვის, საქართველოს ბანკმა პროექტის განხორციელება 2019 წელს დაიწყო. პროექტის ფარგლებში იდეათეკები საქართველოს სხვადასხვა რეგიონში, 8 საჯარო სკოლაში: გორის მუნიციპალიტეტის სასაზღვრო სოფლებში დიცში, ხურვალეთში, ზემო ნიქოზში, ასევე, სოფელ დუისში, თეოფანე დავითაიას სახელობის ქალაქ ფოთის #1 საჯარო სკოლაში, თბილისის 146-ე, ამბროლაურის #1 და ოზურგეთის მე-4 საჯარო სკოლებში უკვე მოეწყო. სულ მალე ამ ჩამონათვალს ახალქალაქის მე-3 სკოლა შეემატება.
(R)
