გუშინ ფიფამ ეროვნული გუნდების რეიტინგი განაახლა და საქართველოს ნაკრები სამი პოზიციით დაწინაურდა _ საქართველო, რომელიც წინა რეიტინგში 96-ე ადგილზე იყო, ამჟამად 93-ე პოზიციაზეა და მეზობლებად ლიბანი და ლუქსემბურგი ჰყავს. სხვებთან ერთად, ვილი სანიოლის გუნდს გაბონი, ზამბია, ჰაიტი, სირია, ბენინი, უგანდა, კურასაო, ომანი, კაბო ვერდე, კონგოს დემოკრატიული რესპუბლიკა და სხვები უსწრებენ.
საბერძნეთში მიმდინარე ვეტერან მოჭიდავეთა მსოფლიო ჩემპიონატზე ლუკა კურტანიძემ ზედიზედ მეოთხედ ოქროს მედალი მოიპოვა _ ქართველმა ფალავანმა ფინალურ შეხვედრაში ირანელ ალი აბდულა გასემი საბურს 4:0 აჯობა. ქართველმა 100 კილოგრამ წონით კატეგორიაში, ფინალის გზაზე რუსი რუსლან ასუევი და ლატვიელი იგორს სამუსონოკსი დაამარცხა.
საქართველოს დელეგაციის ანგარიშზე 5 მედალია. ლუკა კურტანიძის გარდა მსოფლიო ჩემპიონი სურამელი ამირან წიქვაძე (70 კგ.) გახდა. მალხაზ როზომაშვილი (78 კგ) ვერცხლს დაეუფლა, ხოლო გივი სიხარულიძე და შანშე ტლაშაძე (62 კგ) ბრინჯაოს.
ქართველ კალათბურთელ სანდრო მამუკელაშვილს “NBA”-ში დებიუტი 20 ოქტომბერს ჰქონდა. “მილუოკი” “ბრუკლინს” დაუპირისპირდა და 127-104 დაამარცხა.
ქართველ ცენტრს 7 წუთში 1 მოხსნა და 1 გადაცემა ჰქონდა.
ამ შეხვედრის შემდეგ სასიამოვნო რამ მოხდა _ “ბრუკლინის” ვარსკვლავმა ბლეიკ გრიფინმა მამუკელაშვილს სამახსოვროდ თავისი მაისური გადასცა. “სანდრო, განაგრძე შრომა, შენი ადგილი აქ არის”, _ დააწერა მაისურზე გრიფინმა. თავის მხრივ, სანდრომ მას მადლობა გადაუხადა და “უფროსი ძმა” უწოდა.
მიუნხენის “ბაიერნის” ამჟამინდელ მთავარ მწვრთნელ იულიან ნაგელსმანს კი კორონავირუსი ოფიციალურად დაუდასტურდა. ინფორმაცია გერმანული კლუბის ოფიციალურმა ვებ-გვერდმა გაავრცელა.
“ნაგელსმანმა კორონავირუსზე დადებითი ტესტი ჩააბარა, მიუხედავად იმისა, რომ მას აცრის კურსი გავლილი ჰქონდა. ის მიუნხენში გუნდისგან ცალკე დაბრუნდება, რის შემდეგაც თვითიზოლაციაში გადავა”, _ ნათქვამია განცხადებაში.
ნაგელსმანი გუნდთან ერთად ლისაბონში იმყოფებოდა, სადაც “ბაიერნმა” ჩემპიონთა ლიგის ჯგუფური სტადიის მესამე ტურში “ბენფიკას” სძლია, თუმცა, ის სათადარიგოთა სკამზე არ გამოჩენილა. იულიანის ნაცვლად მიუნხენელებს ასისტენტი დინო ტოპმიოლერი ხელმძღვანელობდა. დინო საქართველოს ნაკრების ყოფილი მთავარი მწვრთნელი კლაუს ტოპმიოლერის ვაჟიშვილია.
კატალონიურმა “ბარსელონამ” ანსუ ფატის ახალი კონტრაქტი გაუფორმა. ახალგაზრდა ფეხბურთელი “კამპ ნოუზე” 2027 წლის ზაფხულამდე დარჩება. ფატის ძველი ხელშეკრულება მიმდინარე სეზონის ბოლოს იწურებოდა. აღსანიშნავია, რომ 18 წლის ესპანელის გამოსასყიდი თანხა 1 მილიარდი ევრო იქნება.
ანსუ ფატი “ბარსელონას” აღზრდილია და მთავარ გუნდში 2019 წლიდან თამაშობს. მან 48 მატჩში 15 გოლი გაიტანა. კლუბმა ფატის დიდი ნდობა გამოუცხადა, როდესაც ლიონელ მესის წასვლის შემდეგ 10-ნომრიანი მაისური გადასცა.
კონტრაქტის გახანგრძლივების შემდეგ, ფატიმ ჟურნალისტებს თავისი აზრი გაუზიარა:
“უბედნიერესი ვარ, რომ კლუბში მუშაობას გავაგრძელებ. “ბარსელონა” ძალიან მიყვარს და მადლობელი ვარ, კარიერის აქ გაგრძელების საშუალება რომ მომცეს. ახლა გულმოდგინედ მუშაობა მმართებს, რათა ძველებური ფორმა დავიბრუნო და გულშემატკივარი კვლავ გავახარო. ჩვენ ისევ ყველა ტიტულისთვის ვიბრძოლებთ”.
პორტუგალიისა და “მანჩესტერ იუნაიტედის” თავდამსხმელი კრიშტიანუ რონალდუ ახალი მიღწევის მფლობელი გახდა _ მან ჩემპიონთა ლიგის მე-3 ტურში ბერგამოს “ატალანტას” წინააღმდეგ მატჩი სასტარტო შემადგენლობაში დაიწყო, რის შემდეგაც ახალი რეკორდის ავტორი შეიქმნა.
რონალდუმ იკერ კასილასის (186) მიღწევა გააუმჯობესა და “უეფას” ეგიდით გამართულ ტურნირებზე 187-ე შეხვედრა ჩაატარა.
პორტუგალიელის ანგარიშზე უშუალოდ “ჩემპიონთა ლიგაზე” 183 მატჩია, 2-2 კი “უეფას” თასზე და “უეფას სუპერ თასზე” აქვს გამართული.
[sexy_author_bio]
