ჟურნალისტების დაცვის კომიტეტი (CPJ) დიდ შეშფოთებას გამოთქვამს იმის გამო, რომ საქართველოს პარლამენტმა 18 მარტს მეორე მოსმენით მიიღო კანონპროექტი „უცხოეთის აგენტების“ შესახებ, რომელიც უკვე აპრილში გახდება კანონი და რაც ქართული დამოუკიდებელი მედიისთვის ეკზისტენციალური საფრთხე გახდება, _ იუწყება cpj.org.
მედიაჯგუფები ფიქრობენ, რომ კანონპროექტი, რომელსაც მმართველი პარტიის წარომადგენლები ამერიკული FARA-ს ზუსტ ასლად მიიჩნევენ, გამოყენებული იქნება უფრო მძიმე სასჯელის იარაღად, ვიდრე ეს შეერთებულ შტატებშია და სადაც ის ძალიან იშვიათად გამოიყენებოდა მედიის და სამოქალაქო საზოგადოების ჯგუფების წინააღმდეგ.
„CPJ გმობს აშშ-ს კანონის „ზუსტი ასლის“ მიღებას საქართველოს პარლამენტის მიერ. უფრო და უფრო ავტორიტარული მმართველი პარტიის ხელში ამ კანონის ზედმეტად ფართო დებულებები და სისხლის სამართლის სანქციები გაანადგურებს უცხოელ დონორებზე დამოკიდებულ დამოუკიდებელ პრესას და მედიის მხარდამჭერ ჯგუფებს“, _ თქვა CPJ-ს კოორდინატორმა ევროპასა და ცენტრალურ აზიაში გულნოზა საიდმა.
„საქართველოს ჟურნალისტური ეთიკის ქარტიის“ აღმასრულებელმა დირექტორმა ლია ჩახუნაშვილმა CPJ-ს უთხრა, რომ ამ კანონს, ყოველგვარი ცვლილებების გარეშე, ალბათ, 4 აპრილს მიიღებენ და „მიხეილ ყაველაშვილი მას მაშინვე მოაწერს ხელს, როგორ კი კანონი მის მაგიდაზე აღმოჩნდება“.
ჩინოვნიკები ამბობენ, რომ ქართული FARA აუცილებელია, რადგან ორგანიზაციები, რომლებიც უცხოეთიდან ფინანსდებიან, უარს ამბობენ 2024 წელს მიღებულ უცხოეთის აგენტების კანონით გათვალისწინებულ რეგისტრაციაზე და აუცილებელია უფრო მკაცრი სასჯელი.
FARA-ს ქართული ვარიანტი კანონის დარღვევისთვის ითვალისწინებს 5-წლიან პატიმრობას და დიდ ჯარიმებს.
ანალიტიკოსები ამბობენ, რომ ქართულ კანონპროექტს აკლია „სამართლებრივი გარანტიები და აღსრულებისადმი არაპარტიული მიდგომა“, რაც არსებობს შეერთებულ შტატებში.
CPJ-ს “ქართულ ოცნებას” კომენტარისთვის ელექტრონული ფოსტით დაუკავშირდა, თუმცა, პასუხი ვერ მიიღო.
