გუშინ ფეხბურთის ისტორიისა და სტატისტიკის საერთაშორისო ფედერაციამ საქართველოს ყველა დროის სიმბოლური ნაკრები შეადგინა. IFFHS-მა ახლახან დაიწყო პროექტი – „ყველა დროის ოცნების გუნდები“. საერთაშორისო ფედერაცია ქვეყნების სიმბოლურ გუნდებს ლათინური ანბანის მიხედვით ასახელებს.
საქართველოს ყველა დროის ნაკრებში მოქმედი ფეხბურთელებიდან ვერავინ მოხვდა. დამოუკიდებელი საქართველოს ისტორიიდან სიაში მხოლოდ ერთი ფეხბურთელია – კახა კალაძე. სიაში არც გიორგი ქინქლაძეა და არც შოთა არველაძე. საქართველოს ყველა დროის ნაკრები ასე გამოიყურება:
საქართველო (4-3-3): ანზორ კავაზაშვილი – რევაზ ძოძუაშვილი, მურთაზ ხურცილავა, ალექსანდრე ჩივაძე, კახა კალაძე – თენგიზ სულაქველიძე, დავით ყიფიანი, ვიტალი დარასელია – სლავა მეტრეველი, ბორის პაიჭაძე, მიხეილ მესხი.
გუშინ რუსულ სპორტულ მედიაში გაჩნდა ინფორმაცია ყაზანის „რუბინიდან“ მთავარი მწვრთნელი ლეონიდ სლუცკის შესაძლო დათხოვნის თაობაზე. ბოლო 10 შეხვედრაში მხოლოდ 1 გამარჯვება „რუბინის“ აშკარა კრიზისზე მიუთითებს და სლუცკი კი არა, ასეთ ჩავარდნას გაცილებით სახელოვან მწვრთნელებსაც არ პატიობენ.
მთავარი ის არის, სლუცკის შესაძლო წასვლის შემდეგ ხვიჩა კვარაცხელიას პრობლემები არ შეექმნას. იმედია, ხვიჩას შემთხვევაში ასე არ მოხდება. ამ სეზონს ის „რუბინში“ დაასრულებს და ნებისმიერი სიტუაციისთვის მზად უნდა იყოს.
ამერიკულ „NBA“-ში პირველად ვიხილეთ გოგა ბითაძისა და სანდრო მამუკელაშვილის დაპირისპირება – გოგას „ინდიანამ“ სანდროს „მილუოკის“ უმასპინძლა და დამარცხდა – 109:119.
გოგა ბითაძემ 17:50 წუთი ითამაშა – მან 7 ქულა ჩააგდო (5-დან 1 ორქულიანი, 1 სამქულიანი 3-დან, ორივე საჯარიმო). გოგამ 9-ჯერ მოხსნა ბურთი, აქედან 7-ჯერ მეტოქის ფარზე.
გამარჯვებულთა რიგებში სანდრო მამუკელაშვილმა 9:53 წუთი ითამაშა, მან 2 ქულა ჩააგდო (1-დან 1 ორქულიანი, 1 სამქულიანი ააცილა) და ბურთი 3-ჯერ მოხსნა.
საინტერესოა რომ NBA-ში ეს იყო ქართველ კალათბურთელთა პირველი დაპირისპირება 2014 წლის 4 აპრილის შემდეგ. მაშინ ზაზა ფაჩულიას „მილუოკი“ თორნიკე შენგელიას „ჩიკაგოს“ შეხვდა.
„მანჩესტერ იუნაიტედის“ ირგვლივ მიმდინარე მოვლენები გუშინ საინტერესოდ განვითარდა. თავდაპირველად ბრიტანული „The Sun“-ის ინფორმაციით, „მანჩესტერს“ სულშერის შემცვლელად ერთდროულად ოთხი კანდიდატი ჰყავდა შერჩეული – ბრენდან როჯერსი, ერიკ ტენ ჰაგი, ზინედინ ზიდანი და ანტონიო კონტე. გამოცემის მიხედვით, ყველაზე დიდი შანსი ზიდანსა და კონტეს ჰქონდათ და უახლოეს დღეებში ბევრი რამ გადაწყდებოდა.
იტალიელი ჟურნალისტი, ჯანლუკა დი მარციო კი გვაუწყებდა, რომ „იუნაიტედი“ ანტონიო კონტეს უკვე დაუკავშირდა. ამ უკანასკნელმა კლუბში მუშაობაზე თანხმობა განაცხადა.
მოგვიანებით ესპანურმა გამოცემამ „მუნდო დეპორტივო“ გაავრცელა ცნობა რომ ზინედინ ზიდანის მანჩესტერულ გუნდში დანიშვნა არარეალური გახლდათ.
გადის რამდენიმე საათი და… გამოცემა „Sky Sport“-მა დაბეჯითებით გვაუწყა რომ ოლე გუნარ სულშერი „მანჩესტერ იუნაიტედის“ მთავარი მწვრთნელის თანამდებობას შეინარჩუნებს, მიუხედავად გავრცელებული ხმებისა. ამის გარდა ინგლისური კლუბის ხელმძღვანელობა უახლოეს მომავალში ნორვეგიელ სპეციალისტთან განშორების ვარიანტს არცკი განიხილავს. კლუბში ფიქრობენ, რომ დიდი იმედგაცრუებისა და მტკივნეული წაგების მიუხედავად, ახლა ყურადღება ვითარების გამოსწორებაზე უნდა გაამახვილონ.
ოლე გუნარ სულშერის გუნდი, რომელმაც პრემიერლიგის ბოლო ოთხ მატჩში მხოლოდ ქულა მოიპოვა, 14 ქულით ცხრილში მე-7 ადგილს იკავებს. 48 წლის ნორვეგიელს მდგომარეობის გამოსასწორებლად სანაკრებო პაუზამდე თამაში „ტოტენჰემთან“ (30 ოქტომბერს), „ატალანტასა“ (2 ნოემბერს) და „მანჩესტერ სიტისთან“ (6 ნოემბერს) უწევს.
ოლე გუნარ სულშერმა თანამდებობა დროებით შეინარჩუნა. აი, არაბული ფულებით უეცრად გამდიდრებული კლუბი „ნიუკასლი“ ახალი მთავარი მწვრთნელის ძიებას კვლავ განაგრძობს.
გერმანული გამოცემა „ბილდის“ მტკიცებით, ინგლისური კლუბის ხელმძღვანელების ფავორიტი ლუსიენ ფავრია. 63 წლის სპეციალისტი სასურველ კანდიდატებს შორის პირველ ადგილზეა, მოლაპარაკებები გადამწყვეტ ფაზაშია და წესით, „ნიუკასლმა“ მისი დანიშვნა ოფიციალურად ყველაზე გვიან, მომავალ კვირაში უნდა დაადასტუროს. ლუსიენ ფავრი ბოლოს დორტმუნდის „ბორუსიას“ წვრთნიდა.
ლუსიენ ფავრთან ერთად, ფრენკ ლამპარდის, სტივენ ჯერარდისა და პაულუ ფონსეკას კანდიდატურებიც განიხილებოდა. ინგლისური მედია ამ უკანასკნელს ფავორიტადაც მოიაზრებდა – გავრცელდა ცნობები, რომ „ნიუკასლი“ მას წელიწადში 7 მილიონ ევროს სთავაზობდა.
რაც შეეხება ლამპარდს, ფრენკმა თვითონ თქვა უარი „ნიუკასლის“ გაწვრთნაზე. ჯერარდის ვარიანტი კი თავიდანვე ნაკლებად რეალური ჩანდა.
შეგახსენებთ, რომ საუდელებმა „ნიუკასლ იუნაიტედი“ 350 მილიონ ევროდ შეიძინეს.
[sexy_author_bio]
