ევროკავშირი საქართველოს შესახებ მკაცრად საუბრობს და ხელისუფლებას აფრთხილებს, რომ დღის წესრიგში უვიზო მიმოსვლის შეჩერების საკითხის დგას.
“ჩვენ ვხედავთ სერიოზულ უკუსვლას საქართველოში და განვიხილავთ, დამატებით რისი გაკეთება შეგვიძლია. ყველა ვარიანტი განიხილება, მათ შორის, უვიზო რეჟიმის შეჩერება და სხვა ელემენტებიც, რომლებიც საქართველოს მთავრობას გათვლებს შეაცვლევინებს”, _ თქვა ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა.
კაია კალასის განცხადებით, ევროკავშირმა მოამზადა ზომების სია, დემონსტრანტების, მათ შორის ახალგაზრდებისთვის, გამოტანილი “არაპროპორციული სასჯელების” საპასუხოდ. კალასმა ხაზგასმით აღნიშნა, რომ ეს მიუთითებს სასამართლო სისტემის პრობლემებზე, რომელიც, მისი თქმით, რეპრესიული აპარატის ნაწილია.
“რადიო თავისუფლების” ევროპის ბიუროს რედაქტორის რიკარდ იოზვიაკი წერს:
“ევროკომისიამ თბილისს წერილი გაუგზავნა, რომელშიც გააფრთხილა, რომ თუ აგვისტოს ბოლომდე რამდენიმე პირობა არ დაკმაყოფილდება, საქართველოს მოქალაქეებისთვის უვიზო მიმოსვლის პრივილეგიები შეიძლება შეჩერდეს.
კითხვა იმაში მდგომარეობს, თუ რამდენად სერიოზულია ეს საბოლოო ვადა, საქართველოს მთავრობა შეიცვლის თუ არა კურსს და რამდენად სერიოზულია ბრიუსელის ნება, რომ იმოქმედოს, თუ თბილისი კურსს არ შეიცვლის?”
ინფორმაციისთვის, საუბარი ვიზალიბერალიზაციის შესანარჩუნებლად აუცილებელი სტანდარტების დაკმაყოფილებას შეეხება _ ევროკავშირის რეკომენდაციები მოიცავს: ადამიანის უფლებების დაცვას, დისკრიმინაციის აკრძალვას, ევროპულ პრინციპებთან შეუსაბამო კანონების გაუქმებასა და ინსტიტუციების დამოუკიდებლობის, ანგარიშვალდებულების უზრუნველყოფას.
ევროკავშირის სტანდარტებთან შესაბამისობის ვალდებულებები საქართველომ წლების წინ აიღო. 2017 წლიდან, უვიზო მიმოსვლის ამოქმედებას “ქართული ოცნება” მნიშვნელოვან მიღწევებში ითვლიდა.
საქართველოს პრემიერ-მინისტრმა ირაკლი კობახიძემ “ღამის კურიერში” განაცხადა, რომ ვიზალიბერალიზაციასთან დაკავშირებით უამრავი სპეკულაციებია:
“აქ საუბარია ერთადერთ რამეზე, ვიზის რიგში ჩადგები, თუ არ ჩადგები. დიდ ბრიტანეთში ვიზის რიგში დგებიან ჩვენი მოქალაქეები, ტექნიკური საკითხია. რა თქმა უნდა, დისკომფორტია, მაგრამ ვიზას აიღებ და მიდიხარ დიდ ბრიტანეთში.
აშშ-ში ანალოგიურად, დგები ვიზის რიგში, მიიღებ, არ მიიღებ, შესაბამისად წახვალ ან არ წახვალ ამ ქვეყანაში. ეს ეკონომიკაზე არ აისახება.
ერთი მინუსი, რაც აქვს ვიზალიბერალიზაციას, ეს არის მიგრაციის წახალისება. ეს გამოჩნდა იგივე ლიეტუვის და ლატვიის მაგალითზე, როცა ევროკავშირის წევრი გახდა უკვე ლიტვა და შესაბამისად, მოიხსნა სავიზო რეჟიმი და ასევე ლატვია, ლიტვაში 600 000-ით შემცირდა მოსახლეობა და ლატვიაში 400 000-ით. რატომ – იმიტომ, რომ სხვაობა არის, მათ შორის, ჯერ კიდევ საქართველოსა და დასავლეთ ევროპის ქვეყნებს შორის და ბუნებრივია, სადაც არის მეტი ეკონომიკა, იქითკენ წარიმართება მიგრაციული პროცესები.
ვიზალიბერალიზაცია ამის წამახალისებელია. ვიზალიბერალიზაციის არ არსებობის პირობებში ბევრად მეტი ჩვენი მოქალაქე დარჩებოდა ქვეყანაში, შესაბამისად, გაიზრდებოდა სამუშაო ძალა და ეს პირდაპირ აისახებოდა ეკონომიკური ზრდის ტემპის დამატებით გაუმჯობესებაზე.
აქედან გამომდინარე, არის ცარიელი სპეკულაციები, ეკონომიკასთან არავითარი კავშირი არ აქვს ვიზალიბერალიზაციას, თუმცა ჩვენთვის მნიშვნელოვანია შევინარჩუნოთ ეს სიკეთე ჩვენი მოქალაქეებისთვის.
რა თქმა უნდა, მნიშვნელოვანია, რომ უვიზოდ დადიან ჩვენი მოქალაქეები ევროპის სხვადასხვა ქვეყანაში. აქედან გამომდინარე, ჩვენგან თუ რაიმე არის გასაკეთებელი, ყველაფერს გავაკეთებთ, ოღონდ რაციონალურ ფარგლებში. ეს სპეკულაციები, რომ ეკონომიკური ზრდა, ვიზალიბერალიზაცია და ა. შ. ეს არის თავიდან ბოლომდე თითიდან გამოწოვილი. ამას ნებისმიერი ექსპერტი დაადასტურებს”, _ თქვა კობახიძემ.
იმ შემთხვევაში თუ უვიზო მიმოსვლა გაუქმდება, როგორ შეიძლება აისახოს ეს საქართველოზე? ამ კითხვით გურიაში სხვადასხვა ოპოზიციური პარტიების ლიდერებს მივმართეთ.
“საქართველოში ევროპა მხოლოდ გეოგრაფიული მიმართულება აღარ არის _ ეს არის ადამიანების არჩევანი. არჩევანი უკეთესი ცხოვრების, ღირსეული შრომის, განათლებისა და სამართლიანი სისტემის სასარგებლოდ. სწორედ ამიტომ, როცა ბრიუსელიდან ისმის ეჭვი ვიზალიბერალიზაციის შესაძლო შეჩერებაზე, ეს არ არის უბრალოდ პოლიტიკური შენიშვნა _ ეს არის საგანგაშო მდგომარეობა!
ევროკავშირი აღარ მალავს _ საქართველოში დემოკრატიის უკუსვლას, შერჩევითმა მართლმსაჯულებამ, რუსული კანონის გატანამ და ადამიანის უფლებების დარღვევამ, მათ შორის გაყალბებულმა არჩევნებმა ვიზალიბერალიზაციის შეჩერება რეალობად აქცია.
მაგრამ ამ ყველაფრის ფასს მხოლოდ მთავრობა არ იხდის ამ ფასს იხდის მოქალაქე, რომელიც გერმანიაში სეზონურად მუშაობდა; სტუდენტი, რომელსაც საფრანგეთში სწავლის იმედი ჰქონდა; პაციენტი, რომელსაც ბოლო შანსი იყო ევროპულ კლინიკაში მკურნალობა და ა. შ
ვიზალიბერალიზაციის შეჩერება რა თქმა უნდა იმოქმედებს ეკონომიკაზეც.
ევროპაში სეზონური სამუშაოები ბევრი ოჯახის გადარჩენის წყაროა. როცა ეს გზა იხურება, ათასობით ადამიანი სამუშაოს გარეშე რჩება. ფულადი გზავნილები, რომლითაც მთელი ქვეყანა იკვებებოდა, შეიძლება ერთ დღეში განახევრდეს.
ვიზალიბერალიზაციის დაკარგვა ნიშნავს დაკარგულ შემოსავალს, დაკარგულ შანსებს, და დაკარგულ მომავალს.
ასევე, უარყოფითად იმოქმედებს ჯანდაცვის ხარისხზე
საქართველ0დან ასობით ადამიანი ევროპის კლინიკებში გადის მკურნალობას – ზოგი სიცოცხლის გადასარჩენად, ზოგიც იმიტომ, რომ აქ არ აქვთ საჭირო აპარატურა. მედიკამენტები, რომელთაგან ბევრი პირდაპირ ევროკავშირის ბაზრიდან მოდის, ხვალ შესაძლოა ან ძვირი გახდეს, ან უბრალოდ მიუწვდომელი.
ეს არ იყო მოულოდნელი. წლებია, რაც “ქართული ოცნების” ხელისუფლება თანმიმდევრულად უპირისპირდება ევროპულ ღირებულებებს _ ანგრევს ინსტიტუტებს, დევნის განსხვავებულს, აღვირახსნილად უარყოფს დემოკრატიულ კონტროლს.
დღეს კი ის შედეგი გვიდგას კარს, რასაც წლების განმავლობაში ვუყურებდით გულგრილობით.
საქართველოს მოქალაქეებს კი ევროპა ერთი პარტიის პოლიტიკური კურსის გამო არ უნდა დაეკარგოთ.
ეს ბრძოლა ყველასია – იმიტომ, რომ თავისუფლად გადაადგილება არ არის პრივილეგია. ეს ჩვენი ქვეყნის ისტორიული არჩევანია”, _ ამბობს ჩოხატაურის მუნიციპალიტეტის საკრებულოს წევრი კოალიცია “ცვლილებებისთვის” წარმომადგენელი ბაჩო ახალაძე.
“ლელოს” ლანჩხუთელი ლიდერი გოჩა ჯანაშია გვეუბნება, რომ უვიზო მიმოსვლის შეწყვეტის შემთხვევაში ქვეყანა სოციალური, ეკონომიკური და პოლიტიკური კრიზისის წინაშე აღმოჩნდება:
“ადრეც მითქვამს და ახლაც განვმეორდები, რომ ასეთი უტიფარი და საკუთარ თავზე მოფიქრალი ხელისუფლება არც ჰყოლია და მგონი, არც ეყოლება საქართველოს.
წლების განმავლობაში წინა ხელისუფლების პერიოდში დაწყებულ ევროპისკენ სწრაფვას ფაქტობრივად აგრძელებდნენ, პირობებიც შეასრულეს, მაგრამ ხელისუფლების დაკარგვის შიშით, რადგან ვერ მართავდა ქვეყანას, როგორც საჭირო იყო, გადავიდა ძალადობრივ მართვის მეთოდებზე და ევროპისთვის მისაღები კურსი დაკარგა. აქედან გამომდინარე, უშედეგო ვაჭრობის შემდეგ, რაც არ გამოუვიდა ევროპელ პარტნიორებთან ურთიერთობის დალაგება, ცდილობს გაემიჯნოს და წაშალოს ის მიღწევები, რაც ჩვენს ქვეყანას ამ მხრივ ჰქონდა. ისე არიან გაბოროტებულები, იმასაც ვერ ხვდებიან რას ნიშნავს ევროლიბერალიზაციის შეჩერება, რამდენი ადამიანია წასული, დასაქმებული და არჩენს საკუთარ ოჯახს, რამდენი ლარი შემოდის ბიუჯეტში კარგად იციან, მაგრამ ესეც არ ადარდებთ. რამდენი ადამიანის სიცოცხლის გადარჩენა შეიძლება და თუ ეს ყველაფერი შეწყდა, ძალიან დიდი კრიზისის წინაშე დავდგებით, როგორც სოციალური, ასე ეკონომიკური და პოლიტიკური, მაგრამ ამ ხელისუფლებას სხვა გზა არ დარჩენია გარდა იმისა, რომ წავიდეს რუსეთისკენ, ვითომ ჩინეთის მიმართულებით, ოღონდ შეინარჩუნოს სკამები. უამრავი რაღაც გაკეთებულა ევროპის, დასავლელი პარტნიორების თანხებით, ეს იქნება გზა, წყლის სისტემა, სკოლები, ბაღები.. ამ ყველაფერზე ამბობენ უკვე უარს და ვიზალიბერალიზაციის შეჩერებაზეც თანახმა იქნებიან, მაგრამ ეს არ მოიტანს კარგს პირველ რიგში მათთვის. თუ ეს ნაბიჯი გადაიდგა დაეტყობა მოსახლეობას, მაგრამ რთული იქნება ხელისუფლებისთვის, რადგან შესაძლოა იყოს გადამწყვეტი ხელისუფლების შეცვლისთვის”, _ ამბობს გოჩა ჯანაშია.
“ჩოხატაური საქართველოსთვის” თავმჯდომარე გოგი ბოლქვაძე ჩვენი კითხვის პასუხად ამბობს:
“ვიზალიბერალიზაციის შესაძლო შეჩერება საქართველოს მოქალაქეებისთვის სერიოზული და საგანგაშო საკითხია, რომელსაც რამდენიმე მნიშვნელოვანი გავლენა ექნება ქვეყნის შიგნით და გარეთ.
ევროკავშირის მხრიდან მსგავსი ნაბიჯის მიზეზი, როგორც წესი, ხდება: სამართლებრივი რეგულაციების დარღვევა, მაგალითად თავშესაფრის მოთხოვნების ბოროტად გამოყენება უსაფრთხოების ან სამართალდარღვევების ზრდა ვიზალიბერალიზაციით მოსარგებლე მოქალაქეებთან მიმართებაში პოლიტიკური მიზეზები, როგორიცაა დემოკრატიული ინსტიტუტების გაუარესება ან ევროკავშირთან არსებული შეთანხმებების დაუცველობა.
ვიზალიბერიზაციის შეჩერებამ დასავლეთთან ინტეგრაციის სერიოზული შეფერხება, ევროკავშირში გაწევრიანების პროცესი და რეფორმების სვლა შეიძლება შეაფერხოს.
დასავლეთის უნდობლობა შეასუსტებს საქართველოს პოზიციას როგორც ევროპაზე ორიენტირებულ პარტნიორს, მოგზაურობის შეზღუდვა, მოქალაქეებისთვის გაძვირდება ევროპაში ჩასვლა (საჭირო გახდება ვიზის აღება, რაც ფულსა და დროს მოითხოვს).
შრომის ბაზარზე გავლენა ის ადამიანები, ვინც არალეგალურად მუშაობენ ან თავშესაფარს ითხოვენ, პრობლემაში აღმოჩნდებიან.
გამოიწვევს საზოგადოების უკმაყოფილებას.
ხალხში გაჩნდება პროტესტი, განსაკუთრებით ახალგაზრდებში, რომელთათვისაც ევროპის გახსნილობა მნიშვნელოვანი პერსპექტივაა.
აუცილებელია დემოკრატიული ინსტიტუტების გაძლიერება და ევროინტეგრაციის კურსზე დაბრუნება”, _ გვეუბნება გოგი ბოლქვაძე.
ინფორმაციისთვის, ევროკომისიამ ვიზის შეჩერების მექანიზმის ბოლო, მე-7 ანგარიში გასული წლის დეკემბერში გამოაქვეყნა, სადაც ჩამოთვალა 8 რეკომენდაცია, რომლებიც ახლა თბილისისთვის გაგზავნილ წერილშიც გადაიტანა და ვადა 31 აგვისტომდე დააწესა.
რეკომენდაციების მეორე პუნქტის თანახმად, საქართველო ვალდებულია “თავიდან აიცილოს და გააუქმოს ნებისმიერი კანონმდებლობა, რომელიც ზღუდავს ფუნდამენტურ უფლებებს და თავისუფლებებს, არღვევს დისკრიმინაციის აკრძალვის პრინციპს და ეწინააღმდეგება ევროპულ და საერთაშორისო სტანდარტებს”.
როგორც რიკარდ იოზვიაკი წერს, ევროკავშირის დაახლოებით რვა წევრი სახელმწიფო იტალიის ხელმძღვანელობით ამის წინააღმდეგ გამოვიდა და განაცხადა, რომ ეს საქართველოს მოსახლეობას მიაყენებს ზიანს და ამრიგად, არაპროპორციული იქნება.
ავტორი
