ხვალიდან გურიაში მასობრივი ვაქცინაცია იწყება. მოქალაქეებს საშუალება აქვთ აიცრან კოვიდ 19-ის საწინააღმდეგო ჩინური წარმოების ვაქცინებით _ „სინოფარმითა“ და „სინოვაკით“.
როგორც „გურია ნიუსმა“ გაარკვია ამ დროისთვის რეგიონის სამივე მუნიციპალიტეტში „სინოფარმის“ 610 დოზაა შემოტანილი.
„საქართველოში „სინოფარმის“ და „სინოვაკის“ მილიონი დოზა ვაქცინა 2 ივლისს ჩამოვიდა. რეგისტრაცია 3 ივლისიდან უნდა დაწყებულიყო, თუმცა, ვერ მოხერხდა ვაქცინაციის ვებგვერდზე კიბერშეტევის განხორციელების გამო. ამ დროისთვის პრობლემა აღმოფხვრილია და მოქალაქეებს რეგისტრაცია უპრობლემოდ შეუძლიათ. ვაქცინაციის პროცესი გურიაში დღეს დაიწყო“, _ განუმარტეს „გურია ნიუსს“.
ა(ა)იპ“ოზურგეთის მუნიციპალიტეტის საზოგადოებრივი ჯანდაცვის ცენტრის“ დირექტორის მაია ქუტიძის ინფორმაციით, დღეს ქალაქ ოზურგეთში კლინიკა “მედალფაში“ სინოფარმით აცრა მიმდინარეობს.
“ამ ეტაპზე ოზურგეთში კორონავირუსის საწინააღმდეგო აცრა ოზურგეთში კლინიკა “მედალფაში“ ჩატარდება. უკვე დაიწყო “სინოფარმით“ აცრა და დღის განმავლობაში ზუსტად გვეცოდინება თუ რამდენმა ადამიანმა აიცრა ჩინური ვაქცინით“, _ გვითხრა მაია ქუტიძემ.
„გურია ნიუსის“ კითხვაზე, რა ბედი ელით ასტრაზენეკათი აცრილ მოქალაქეებს და იქნება თუ არა მათთვის ხელმისაწვდომი, ისევ ასტრაზენეკას ვაქცინით აიცრან, ქუტიძე გვპასუხობს, რომ ეს საკითხი მოგვარებადია.
“როგორც ჩემთვის არის ცნობილი, მეორე დოზის გაკეთება ყველას მოუწევს თავის დროზე და ეს საკითხი მოგვარებადია“, – აღნიშნა მაია ქუტიძემ ჩვენთან საუბრის დროს.
“გურია ნიუსი“ დაუკავშირდა კლინიკა “მედალფას“. როგორც იქ გვიპასუხეს, ზუსტი თარიღი, როდის მიიღებენ ასტრაზენეკას ვაქცინას, ამ ეტაპზე მათთვის ცნობილი არაა.
ჩოხატაურის საზოგადოებრივი ჯანდაცვის ცენტრის ხელმძღვანელის, ნატო ჯიბუტის თქმით, აცრის პროცესი ჩოხატაურში „მედალფას“ კლინიკაში 6 ივლისიდან დაიწყება „სინოფარმის“ ვაქცინით.
„შემოტანილია როგორც „სინოვაკის“, ისე „სინოფარმის“ ვაქცინა. სამშაბათიდან დაიწყება აცრის პროცესი. მოქალაქეებს გაცნობიერებული აქვთ ვაქცინაციის აუცილებლობა და აქტიურობაც საკმაოა“, _ ამბობს ნატო ჯიბუტი.
როგორც ლანჩხუთის საზოგადოებრივი ჯანდაცვის ცენტრის უფროსი ნატო მენაღარიშვილი ამბობს, ლანჩხუთში ვაქცინაციის მსურველი საკმაოდ მრავლადაა და რეგისტრაცია აქტიურ რეჟიმში მიმდინარეობს.
„გურიის სხვა მუნიციპალიტეტში, ლანჩხუთშიც ვაქცინის 610 დოზაა შემოსული. რეგისტრაცია უკვე დაწყებულია, საკმაოდ აქტიურად. რეგისტრაციის ვებგვერდს გადავხედე და ლანჩხუთი საკმაოდ ლიდერობდა. პორტალზე ორი კვირის ჯავშანი ჩანს, შემდეგ მოემატება მოთხოვნის შესაბამისად, დღეების რაოდენობაც გაიზრდება, პირველი ორი კვირა მხოლოდ სამი დღეა აცრის გაკეთება შესაძლებელი. ჯერ „სინოფარმზე“ მიმდინარეობს რეგისტრაცია. ეტაპობრივად შემოვა „სინოვაკი“ და სხვა ვაქცინებიც“, _ გვითხრა ნატო მენაღარიშვილმა.
ავტორები: გიორგი გირკელიძე, სოფო წილოსანი
