თუ “მოძრაობა ახალი ძალების” ლიდერი მიხეილ სააკაშვილი ოპოზიციურ საქმიანობას არ შეწყვეტს, მას საქართველოში ექსტრადიცია ელოდება. პრეზიდენტი პეტრო პოროშენკო ამ საკითხზე მოლაპარაკებებს, ექსპრემიერ ბიძინა ივანიშვილთან აწარმოებს. ამის შესახებ უკრაინის გენერალური პროკურორის ყოფილმა მოადგილემ, დავით საყვარელიძემ გადაცემა “Zіткнення”-ის ეთერში განაცხადა, რომელიც ვიდეოპორტალ youtube-ით გადაიცა.
დავით საყვარელიძის თქმით, ივანიშვილი რუსული “გაზპრომის” აქციონერია და დღესდღეობით საქართველოს მართავს, რაც საიდუმლოს არავისთვის წარმოადგენს.
მისივე განმარტებით, მიხეილ სააკაშვილსა და პეტრო პოროშენკოს “ღირებულებების ბაზა” განსხვავდება და პეტრო პოროშენკოს “სააკაშვილის უკრაინულ პოლიტიკაში შეშვება “ არ სურდა.
დავით საყვარელიძე ასევე აღნიშნავს, რომ სააკაშვილი აქტიურად უჭერდა მხარს 2004 წლის მაიდნის მოვლენებს და ყველაფერ პროგრესულს, რაც საქართველოში 2004 წლიდან მოხდა.
2014 წელს მიხეილ სააკაშვილი რამდენიმე კვირაში ერთხელ შეერთებული შტატებიდან უკრაინაში ჩადიოდა და უცხოელ პოლიტიკოსებს ეპატიჟებოდა. იმავე პერიოდში პეტრო პოროშენკო, ფიქრობდა, რომ ომის შეჩერებას შეძლებდა და მიხეილ სააკაშვილის უკრაინაში შეშვებით, პუტინის გაღიზიანებას ერიდებოდა.
დავით საყვარელიძის თქმით, პოროშენკოს ასევე აშინებდა ექსპრეზიდენტის პოპულარობა.
მიხეილ სააკაშვილმა განაცხადა, რომ წინააღმდეგი არ იქნებოდა უკრაინის ანტიკორუფციულ ბიუროს ჩადგომოდა სათავეში. დაიწყო მღელვარება უკრაინის პოლიტიკურ ელიტაში და გაისმა ზარი პრეზიდენტის ადმინისტრაციისგან. პოროშენკომ სააკაშვილს ოდესაში დელეგაციასთან ერთად გამგზავრება და სხდომის თავმჯდომარეობა შესთავაზა, რის შემდეგაც ის ოდესის გუბერნატორად დანიშნეს.
“ჩვენი მმართველობა კარდინალურად განსხვავდება პოროშენკოს მმართველობისგან” – აღნიშნავს დავით საყვარელიძე და აცხადებს, რომ სააკაშვილის წინააღმდეგ კორუფციასთან დაკავშირებით რაიმე საქმე არ აღძრულა.
“მოძრაობა ახალი ძალების” შექმნის შესახებ მიხეილ სააკაშვილმა 2016 წლის 19 ნოემბერს განაცხადა. იუსტიციის სამინისტრომ ის 2017 წლის 28 თებერვალს დაარეგისტრირა. მარტში კი სააკაშვილმა განაცხადა, რომ უკრაინის არსებულ პოლიტიკურ სისტემაში მისი პარტიის “ადგილი არ არის”, რის გამოც “მოძრაობამ ახალი ძალები” ახალი სტრუქტურა უნდა შექმნას, სადაც ის წამყვანი იქნება.
2017 წლის იანვარში პეტრო პოროშენკომ მიხეილ სააკაშვილის ოდესის გუბერნატორის პოსტზე მუშაობა გააკრიტიკა. პრეზიდენტის განმარტებით, რეგიონი პრაქტიკულად ყველა მაჩვენებლით ჩამორჩებოდა. ყველა რეფორმა და ექსპერიმენტი ჩავარდა, მიხეილ სააკაშვილი კი მხოლოდ თვითპიარით იყო დაკავებული.
2016 წლის 7 ნოემბერს მიხეილ სააკაშვილი ოდესის გუბერნატორის თანამდებობიდან გადადგა და უკრაინის ხელისუფლება კორუფციული კლანების მხარდაჭერაში დაადანაშაულა.
2017 წლის მარტში კი მიხეილ სააკაშვილმა განაცხადა, რომ პეტრო პოროშენკო მისთვის უკრაინის მოქალაქეობის ჩამორთმევას გეგმავს.
1tv.ge
