საშიში მდგომარეობა: „ოზურგეთის ბაზარში შავმა ძაღლმა კიდევ ორი მოქალაქე დაკბინა“

„გურია ნიუსი“ წლების მანძილზე წერდა და წერს მიუსაფარ ძაღლებზე. ბოლო თვეების განმავლობაში კი, სამჯერ მოგვიხდა ერთსა და იმავე  აგრესიულ ძაღლზე სტატიების დაწერა. ოზურგეთის ბაზარში, სადაც მუდმივად ხალხმრავლობაა და  ასევე უამრავი ძაღლი ბინადრობს, ერთი შავი ძაღლი განსაკუთრებით აგრესიულია.  ძაღლს ყელსა და მუცლის არეში თეთრი ზოლები აქვს. ბოლო ექვს თვეში, ამ ძაღლმა არაერთი მოქალაქე დაკბინა. არაერთხელ კი დასაკბენად განწირული მოქალაქეები, ბაზარში მომუშავე ადამიანებმა იხსნეს. დაზარალებულები ორჯერ სასწრაფო დახმარების მანქანამ გადაიყვანა საავადმყოფოში, ორმა კი თავად მიაკითხა სამედიცინო დაწესებულებას და იმკურნალეს.

9 ივნისს ოზურგეთის ბაზარში, ამ  აგრესიულობით  ცნობილმა შავმა ძაღლმა, კიდევ ერთი ქალბატონი დაკბინა, რომელიც   სასწრაფო დახმარების  ავტომობილით საავადმყოფოში გადაიყვანეს.  10 ივნისს კი კიდევ ერთ მოქალაქეს ეცა, რომელიც ერთ-ერთ დახლთან ვაჭრობდა.  ადგილზე მყოფმა ადამიანებმა და  იქვე მომუშავეებმა იმარჯვეს, რომ კიდევ ერთი ადამიანი  არ გადაეყვანათ საავადმყოფოში.

_ჰაერში ავწიეთ ქალი, ასე ვთქვათ და გადავარჩინეთ. ეს პირველი შემთხვევა კი არ არის. მე აქ ვმუშაობ და მეც დამკბინა. წავედი და ნემსები გავიკეთე. ცოფიანი არ უნდა იყოს, მაგრამ ასე ხომ ვერ ვენდობით. არაერთხელ დავრეკეთ. მოვლენ, წაიყვანენ, გაასეირნებენ, მოიყვანენ ისევ და დაგვისვამენ აქ. ჩვენ ძაღლის მოძულეები კი არ ვართ. ვერ გავიგეთ, რა ზნისაა ეს ძაღლი. სანამ უნდა ვიყოთ ასე. შეხედეთ, როგორ არის გაბუთქუნებული.  ჭამა აკლია თუ რა? – ამბობს „გურია ნიუსთან“ ბაზარში მომუშავე თემურ სირაძე.

_რაღაც საშინელი მოხდება აქ. დაგვეხმარეთ. ეს ძაღლი ასე ვთქვათ, არაპროგნოზირებადია. ვეფერებით. ვაჭმევთ. მარტო მე დღეში ნახევარ კილოგრამ პედიგრს ვაჭმევ. პური არ აკლია და წყალი. მე არ მერჩის, მაგრამ ჩემთან მოსულ კლიენტს რომ მიეპარება და კბენს, იგივე არ არის? ადამიანი ვერ მოდის დახლთან. წამოხტება უცებ და ეცემა. მოულოდნელად აკეთებს ამას. გეგონება ძინავსო, წამოწოლილია და უცებ ასეთი წამოხტომა იცის. ამას წინათ ქალი პომიდორს ყიდულობდა. გაექანა და ეცა. ძლივს მოვაშორეთ. შესაძლოა, ჩვენ ვგონივართ შინაურები და შემოსულს მისდევს… ახლა, ვერ ვიმკითხავებ… საშიში მდგომარეობაა, _ გვეუბნება ბაზარში დასაქმებული როინ ჟღენტი.

_შიშით აღარ ვართ. დაგვეხმარეთ. მე თვითონ არაერთხელ დავრეკე 112-ში. კი წაიყვანეს, მაგრამ  მაინც აქ აბრუნებენ. რა ვიღონოთ? ახლა, ის არავინ თქვას, რომ ძაღლებს მივდევთ. შეხედეთ, რამდენი ძაღლია ბაზარში. ყველა საკალანდო ღორივითაა გასუქებული. რომ არ ვაჭმევდეთ, ასე იქნებიან? ან სხვა ძაღლებზე ვამბობთ რაიმეს? განცხადებას დავწერთ, ყველა ხელს მოვაწერთ და გვიშველთ. გაიყვანონ, დააძინონ, რაიმე მეთოდი ხომ არსებობს, რომ საშიშროება განეიტრალდეს? _  ამბობს „გურია ნიუსთან“ ბაზარში მომუშავე მზევინარ ნაკაშიძე.

აქვე დასაქმებული ლილი დოლიძე ასევე ამბობს, რომ არაერთხელ უყურა, როგორ დაკბინა ამ ძაღლმა ადამიანები.

_ვის არ სჯერავს, რომ არაერთი მოქალაქე დაკბინა? ვისაც არ სჯერა, ოზურგეთის საავადმყოფოში დარეკონ და იკითხონ. რა უნდა ვქნათ ჩვენ, ხომ არ მოვკლავთ ძაღლს? აქ რამდენ მიუსაფარ ძაღლს  ვპატრონობთ. შეამოწმონ. ამ ძაღლმა კი საშიში ვითარება შექმნა. რას აპირებენ, მაინც და მაინც ისე უნდა დაკბინოს ვინმე, რომ ადამიანი უნდა მოკვდეს? სასწრაფო ღონისძიებაა გასატარებელი, _ ამბობს ის.

ქალბატონი მზევინარ ნაკაშიძე ამბობს ასევე, რომ წინა დღით ამ ძაღლმა ლამარა ბილოხოძე დაკბინა, რომელიც საავადმყოფოში გადაიყვანეს. ხოლო ბაზარში მომუშავეთაგან, თემურ სირაძის გარდა, ბექა გაგლოშვილიც დაკბინა. არაა ისე, რომ მხოლოდ შემოსულ მომხმარებელს კბენს, _ გვეუბნება ის.

ბაზარში მომუშავე არაერთი ადამიანი გვთხოვს, დავეხმაროთ.

_დაგვეხმარეთ. განცხადებას დავწერთ. ყველა მოვაწერთ ხელს. მეტი რა შეგვიძლია? საგანგებოდ ვთხოვტ ამას „გურია ნიუსს“ .  ისევ თქვენ თუ დაგვხმარებით.  ვიცით, რომ არაერთხელ დაწერეთ. მივიდნენ კიდეც შესაბამისი სამსახურიდან, თუმცა მალევე უკან აბრუნებენ. ეტყობა, რაღაც დამამშვიდებელს უკეთებენ. მერე გადის დრო და ძაღლი ისევ ავდება…აბა, ვერაფერს მივხვდით და ვერაფერი გავიგეთ. ვიმუშაოთ და ლუკმა- პური წავიღოთ შინ თუ ამ ძაღლს ვუყარაულოთ? საშინელება მოხდება აქ… ამასწინ მოხუცი ქალი რომ დაკბინა, პირდაპირ ვენაზე ჰქონდა კბილი გაკრული…შეხედეთ, როგორ წევს დახლის ქვეშ, ნახევრად შემალულია. ასე წვება და უცებ გამოვარდნა იცის..._ საუბრობენ ჩვენთან აქ მომუშავეები.

ძაღლი მართლაც ჩასაფრებულივით იწვა ერთ-ერთი დახლის ქვეშ და ფოტოც დავაფიქსირეთ.

„გურია ნიუსი“ , ბოლო თვეების მანძილზე, არაერთხელ წერდა და წერს კონკრეტულად ამ  აგრესიული ძაღლის შესახებ.  არაერთხელ დავრეკეთ  ოზურგეთის მომსახურების  ცენტრში,  ცხოველების   მეთვალყურეობის განყოფილებაში,  სადაც ყოველთვის გვპირდებიან დახმარებას. შემდეგ გადაჰყავთ   ეს ძაღლი    თავშესაფარში, თუმცა  სამ დღეში უკან აბრუნებენ. ძაღლის სიავე კი გრძელდება და უკვე  მეოთხე ადამიანი დაკბინა.

_ოზურგეთის ბაზრიდან ეს შავი ძაღლი ვერ მოგვაშორეს. რანაირად ვიმკითხაოთ, როდის მოუვლის აგრესია? ჭამა არ აკლია და ფერება. რაღაც სჭირს და ბოლოს და ბოლოს,  ან გაანეიტრალონ ან თავად შინ წაიყვანონ შესაბამისმა სამსახურებმა.  დიახ, წაიყვანოს ირაკლი გაბედავამ, მომსახურების ცენტრის     ცხოველების მეთვალყურეობის განყოფილების უფროსმა. დავიღალეთ… _ ამბობენ „გურია ნიუსთან“ ოზურგეთის ბაზარში.

ჩვენ, წინა ასეთი შემთხვევის დროს, ოზურგეთის მომსახურების ცენტრში, შესაბამისი განყოფილების უფროსს ირაკლი გაბედავას ვესაუბრეთ და მან  განაცხადა, რომ ამიერიდან ამ აგრესიულ ძაღლს ბაზარში არ გააჩერებდნენ.  თუმცა სამ დღეში მაინც იქ გამოჩნდა.  კიდევ სამიოდე დღის შემდეგ კი მოქალაქე კვლავ დაკბინა.

ახლა კი  ბატონი ირაკლი გაბედავა საერთოდ არ პასუხობს ჩვენს ზარს.

ოზურგეთის მომსახურების ცენტრის უფროსმა გია ანთაძემ  კი, რომელიც ყოველთვის დახმრებას გვპირდება, ახლა ასეთი წინდადება შემოგვთავაზა, მარტო თქვენ რომ გვირეკავთ და  წერთ, ეს არ კმარა,  „ფორმა ასი“  მოიტანოს დაზარალებულმაო (??)

გასკვირია პირდაპირ! უკვე მერამდენეა ეს  ადამიანი, რომელიც ამ ძაღლმა დაკბინა და სასწრაფო დახმარებით ოზურგეთს საავადმყოფოში გადაიყვანეს.   ახლა კი დაზარალებული  „ფორმა ასის“ გასაკეთებლად უნდა წავიდეს, რომ აგრესიული ძაღლის   კბენის ფაქტი დამტკიცდეს?

და საერთოდ, რამდენი ადამიანის დაკბენა იქნება ლიმიტი, რომ ეს აგრესიული ცხოველი ქალაქის ცენტრიდან გაიყვანონ და გაატარონ ასეთ დროს საჭირო ღონისძიება?

ჯერჯერობით კითხვა უპასუხოდ რჩება და ვიმედოვნებთ, ვიდრე საშინელი ფაქტი არ მოხდება, ოზურგეთის მერია და შესაბამისი სამსახურები გაატარებენ საჭირო ზომებს.