ოზურგეთის კულტურის და დასვენების პარკში, საახალწლო სოფელი ულამაზესი დეკორაციებით და კომპოზიციებითაა მორთული, რომლის ავტორი კულტურის ცენტრის სარეკრიაციო განყოფილების უფროსი, გამორჩეული შემოქმედებითი ნიჭის მქონე ქალბატონი, ინგა დუმბაძეა.
_ ჩემი შთაგონების წყარო იყო ავსტრია-უნგრეთი, სადაც წლების წინ ვიმოგზაურე და ახლა აქ ვცდილობ, დავნერგო საშობაო ბაზრის ტრადიცია, რომელიც ევროპაში ხელოვნების და ხალხური რეწვის გამოფენის ადგილს წარმოადგენს. საშობაო სოფელის და სანტა კლაუსის წარმოშობის ისტორია წმინდა ნიკოლაუსს უკავშირდება. ეს ქრისტიანი წმინდანი სიცოცხლეში მალულად ეხმარებოდა უპოვრებსა და ბავშვებს. წმინდა ნიკოლაუსის დღეს საჩუქრების დარიგების ტრადიცია მოგვიანებით საშობაოდ ბავშვების დასაჩუქრების ტრადიციად ჩამოყალიბდა. ამას დიდი სიამოვნებით აგრძელებს თანამედროვე სანტა კლაუსი, რომელიც, ტრადიციულად, წელსაც ეწვია ჩვენს პარკს სხვადასხვა ზღაპრის გმირთან ერთად და ყველაზე თბილი საშობაო ატმოსფერო შეგვიქმნა, _ ამბობს ჩვენთან საუბრისას ინგა დუმბაძე _ მსოფლიოში ყველა ქალაქი ცდილობს შობა-ახალი წლის პერიოდში შექმნას გარემო, სადაც ზღაპრები და რეალობა ერთმანეთს ერწყმის.
ქალბატონ ინგას ასევე აქვს იდეა, მალე, პარკის რეაბილიტაციის შემდეგ, გაკეთდეს ზონა _ ,,სანტა კლაუსის რეზიდენცია“, ისე როგორც ლაპლანდიაშია.
აქ ,,გურულმა სანტამ“ მიიღოს სტუმრები, წაიკითხოს წერილები და გაიგოს რაზე ოცნებობენ პატარები და როგორი საჩუქრების მიღება სურთ საშობაოდ. სურვილების გაგზავნა შესაძლებელი იქნება პარკის მისამართზე.
