განათლების ხარისხის განვითარების ეროვნული ცენტრის მონაცემებით, 2018 წელს საქართველოში 7 უმაღლესი სასწავლებელი გაუქმდა, მათ შორის ორი პროფესიულ კოლეჯად გადაკეთდა. ინფორმაციას 1tv ავრცელებს.
ცენტრის ინფორმაციით, შპს ინტერბიზნესის აკადემიამ თავად თქვა უარი უმაღლესი საგანმანათლებლო დაწესებულების სტატუსზე და პროფესიულ კოლეჯად გადაკეთდა. ანალოგიური გადაწყვეტილება მიიღო საქართველოს ილია ჭავჭავაძის სახელობის საგანმანათლებლო კავშირმა „საზოგადოება ცოდნა“.
კოლეჯად გადაკეთების სურვილი გამოთქვა ასევე სსიპ – საქართველოს შინაგან საქმეთა სამინისტროს აკადემიამ და შპს საქართველოს ბიზნესის აკადემია – SBA-მ. პროცესი 2018 წლის ბოლომდე დასრულდება.
უმაღლესი სასწავლებლის სტატუსი დაკარგეს შემდეგმა სასწავლებლებმა:
1. შპს ამერიკის ბიზნესის აკადემია;
2. შპს თბილისის საერთაშორისო აკადემია;
3. შპს წმიდა გრიგოლ ფერაძის თბილისის სასწავლო უნივერსიტეტი;
4. შპს თბილისის სამედიცინო სასწავლო უნივერსიტეტი ჰიპოკრატე;
5. შპს ექვთიმე თაყაიშვილის სახელობის უმაღლესი სასწავლებელი.
მათმა ნაწილმა უმაღლესი სასწავლებლის სტატუსზე უარი თავად თქვა,ნაწილს კი ავტორიზაცია არაგეგმიური მონიტორინგის შედეგად გაუუქმდა.
უმაღლესი საგანმანათლებლო დაწესებულების სტატუსის გარეშე დარჩენილ დაწესებულებებში ჯამში 1 244 სტუდენტი სწავლობდა.
დღეს საქართველოში 66 ავტორიზებული უმაღლესი საგანმანათლებლო დაწესებულებაა. უმაღლესი საგანმანათლებლო დაწესებულებები ავტორიზაციას ექვსი წლის ვადით მოიპოვებენ.
