“დაუშვებელია, რომ საზოგადოებრივ მაუწყებელის მმართველ ორგანოში შედიოდეს ისეთი პიროვნება, რომელიც გამოირჩევა შეურაცმყოფელი, პატივისა და ღირსების შემლახველი საქციელით, უხამსი, სექსისტური, დისკრიმინაციული გამონათქვამებით და მიმართვებით და რომელიც გამუდმებით იყენებს სიძულვილის ენას” _ ასე ეხმაურება საპარლამენტო იმცირესობის წევრი რომან გოცირიძე საზოგადოებრივი მაუწყებლის სამეურვეო საბჭოს წევრის, გიორგი იაკობაშვილის განცხადებას, რომელიც ამ უკანსაკნელმა სოციალურ ქსელში გამოაქვეყნა და რომლითაც ჟურნალისტური ეთიკის ქარტიის წევრებს და რეგიონში მომუშავე ჟურნალისტებს შეურაცხყოფა მიაყენა:
“სამარცხვინო გადაწყვეტილება მიიღო ამ რამდენიმე თვის წინათ საპარლამენტო უმრავლესობამ, როცა საზოგადოებრივი მაუწყებლის სამეურვეო საბჭოს წევრად დაამტიკიცა ვინმე გიორგი იაკობაშვილი. შედით მის ფეისბუკგვერდზე-არა მარტო უხამსი და პორნოლექსიკით გამოირჩევა მისი ყველა ”ნააზრევი”, არამედ ზოგიერთი პირდაპირ ეწინააღმდეგება საქართველოს კანონებს.
დღესაც ჩვეულ სტილში დაესხა თავს არასამთავრობო სექტორს.
ეს ადამიანი უსაქმურობისათვის ხელზე 3800 ლარს იღებს ტელევიზიაში.
დაუშვებელია, რომ საზოგადოებრივ მაუწყებელის მმართველ ორგანოში შედიოდეს ისეთი პიროვნება, რომელიც გამოირჩევა შეურაცმყოფელი, პატივისა და ღირსების შემლახველი საქციელით, უხამსი, სექსისტური, დისკრიმინაციული გამონათქვამებით და მიმართვებით და რომელიც გამუდმებით იყენებს სიძულვილის ენას.
სასწრაფოდ უნდა გამოასწოროს პარლამენტმა თავისი შეცდომა და მოაშოროს ეს ადამიანი ამ მეტად საპასუხისმგებლო ადგილს,” _ წერს რომან გოცირიძე.
ამ თემაზე ამ დრომდე კომენტარს არ აკეთებს საპარლამენტო უმრავლესობა, რომელმაც იაკობაშვილს ერთხმად დაუჭირა მხარი. საპარლამენტო უმრავლესობის ლიდერის არჩილ თალაკვაძის თქმით პოსტს არ იცნობს და შეფასებებს მოგვიანებით გააკეთებს.
იაკობაშვილის განცხადებას უკვე გამოეხმაურენ რეგიონში მომუშავე მედია ორგანიზაციები, რომლებიც პარლამენტს და სამეურვე საბჭოს რეაგირებას სთხოვენ.
შეგახსენებთ, რომ გიორგი იაკობაშვილმა თავის პოსტში ჟურნალისტური ეთიკის ქარტია და რეგიონში მომუშავე ჟურნალისტები გააკრიტიკა და მათ შეურაცხყოფა მიაყენა:
“ჟურნალისტური ეთიკის ქარტია” არის ერთი ჩვეულებრივი არასამთავრობო ორგანიზაცია (ასო) რომელსაც ყავს 311 წევრი-ხელმომწერი. არანაირი წონა და ავტორიტეტი სერიოზულ, ნორმალურ ჟურნალისტებს შორის არ გააჩნია.
ამ 311 ხელმომწერიდან უმრავლესობა არის რეგიონიდან და მათთვის სასიცოცხლოდ აუცილებელია დონორებთან ურთიერთობა, რაც ფაქტობრივად შეუძლებელია ე.წ. ქარტიაზე ხელმოწერის გარეშე.
ანუ, თუ ზვიად ქორიძეს და სხვა ზვიადქორიძეებს ხელს არ აუწევენ და თავს არ დაუქნევენ, “კაი ჩიტს დაიჭერენ”.
ასე რომ, შეეშვით მაგ ასო-ზე სტატუსების წერას და ქოთქოთს. ეგენი ისეთივე ჟურნალისტები არიან, როგორც ბუღაძე-ტურაშვილი – მწერლები და ქეთათო-სტეფანე – მომღერლები.
დაიკიდეთ და გულზე მოგეშვებათ.
და, საერთოდ, ბოლომდე დაიკიდეთ ეს მესამე სექტორად წოდებული მეხუთე კოლონა.
თქვენი ქოთქოთი მათ სივებში იწერება, აქტივობაში ეთვლებათ, რის გარეშეც ევროპაში დაფუძნებული და რუსეთიდან დაფინანსებული ფონდებიდან მსუყე გრანტებს კი არა, სამში თამამს მიიღებენ.
ეს არის და ეს.” _ წერს იაკობაშვილი ფეისბუქის საკუთარ გვერდზე.
ჩვენ შევეცადეთ კომენტარები იაკობაშვილისგანაც მიგვეღო, თუმცა ის “გურია ნიუსის” სატელეფონო ზარებს არ პასუხობს. იაკობაშვილმა ჩვენ მიერ დასმულ შეკითხვას არც სოციალურ ქსელში უპასუხა.
იაკობაშვილი სამეურვეო საბჭოს წევრად “ქართულმა ოცნებამ” წარადგინა და ხმათა უმრავლესობით დაამტკიცა კიდეც. მისი ყოველთვიური ანაზღაურება საბჭოში 3800 ლარს შეადგენს.
