გუშინ, ოზურგეთის რაიონული სასამართლოს თავმჯდომარემ ბიძინა სტურუამ “შპს კახური ტრადიციული მეღვინეობისა“ და “გურია პალასის“ მიერ შეტანილი სარჩელები ქალაქ ოზურგეთის მერიის წინააღმდეგ სრულად დააკმაყოფილა.შპს ‘’კახური ტრადიციული მეღვინეობა’’ სასამართლოს მეშვეობით იმ დოკუმენტების ბათილად ცნობას ითხოვდა, რომლითაც გაუქმდა იმ პირობებიანი აუქციონის შედეგები, რომელზეც აღნიშნულმა შპს-მ შეისყიდა ქალაქ ოზურგეთში, ი. პეტრიწის ქუჩა 7-სა და გაბრიელ ეპისკოპოსის ქუჩა 1-ში მდებარე უძრავი ქონება, ასევე პირგასამტეხლოს გადახდა და 2017 წლის 6 იანვრის ბრძანების ბათილად ცნობას, რის მიხედვითაც მუნიციპალიტეტს უნდა დაუბრუნდეს აღნიშნული ქონება.
ოზურგეთის რაიონულმა მოსამართლემ ბათილად სცნო აღნიშნული სამართლებრივი აქტები. “გურია პალასისა“ და შპს კახური ტრადიციული მეღვინეობის“ წარმომადგენელმა ეკატერინე გოგოლაძემ აღნიშნულთან დაკავშირებით კომენტარი გააკეთა.
“ჩვენი მოთხოვნა იყო მერიის მიერ მიღებული სამართლებრივი აქტები, კერძოდ: ბრძანება # 3 და # 5 და თავისთავად, კომისიის ოქმი, ამ დოკუმენტაციის აღნიშნული სამართლებრივი აქტების ბათილად ცნობა, ამ სამართლებრივი აქტებით მერიამ მოითხოვა “კახური ტრადიციული მეღვინეობისგან“ ჯარიმის დაკისრება, დაახლოებით, 90 000 ლარის ოდენობით, შეუსრულებელი ვალდებულისთვის და ამასთანავე, მოითხოვა “გურია პალასის“ მფლობელობაში სასტუმრო “გურიას“ მუნიციპალიტეტის მფლობელობაში გადაცემა და აღნიშნული ქონების რეგისტრაციის გაუქმება, ანუ ქონების ჩამორთმევა. აღნიშნული ბრძანებები გასაჩივრდა ჩვენ მიერ, მოსამართლემ განიხილა და მიიჩნია, რომ ბათილად, ეცნო ყველა ის ადმინისტრაციული აქტი, რომლითაც დაგვეკისრა ჯარიმა და პლუს ქონების ჩამორთმევა. ანუ უკვე აღარ აქვს ამ სამართლებრივ აქტებს იურიდიული ძალა. სასტუმრო „გურია“ დარჩა ისევ ზურაბ ჩხაიძეს. დღეის მდგომარეობით, მესაკუთრე არის “გურია პალასი“, ეს საჯარო რეესტრშიც კარგად ჩანს”, _ ამბობს გოგოლაძე.
ქალაქ ოზურგეთის მერია აღნიშნულთან დაკავშირებით კომენტარს არ აკეთებს. მერიის პრესსამსახურის ინფორმაციით, მერია ოფიციალურ განცხადებას გააკეთებს.
