Euronews ხელნაკეთი სათამაშოების სოციალური საწარმო „დადარის“ შესახებ სტატიას აქვეყნებს.
როგორც მაუწყებელი აღნიშნავს, საწარმო არ ჰქმნის მხოლოდ სათამაშოებს და ის შეზღუდული შესაძლებლობების მქონე ადამიანებს დასაქმების საშუალებას აძლევს.
საწარმო ხელნაკეთ ხის სათამაშოებს გერმანიაში ინტერნეტის საშუალებით ყიდის.
Euronews BUSINESS PLANET ფირმის დამფუძნებელს, მერაბ კუჭუხიძეს სამომავლო გეგმების შესახებ ესაუბრა.
ჟურნალისტის კითხვას რატომ აირჩია სათამაშოები და არა რამე სხვა საქმიანობა კომპანიის დაფუძნებისას, კუჭუხიძე პასუხობს, რომ სათამაშოები საუკეთესო საშუალებაა ბავშვების გასაზრდელად.
„სათამაშოების გაკეთება ბავშვობიდან მიყვარდა, ამიტომ გადავწყვიტე ჩემი ცხოვრება მათთვის მიმეძღვნა. 40 წელზე მეტია, რაც მათ სიყვარულით ვაკეთებ. რატომ სათამაშოები– იმიტომ რომ სათამაშოები საუკეთესო გზაა ბავშვების გასაზრდელად, შემდეგ წიგნი, მაგრამ როცა ბავშვი ძალიან პატარაა მას განსავითარებლად სათამაშო ჭირდება.
ეს ძალიან მნიშვნელოვანია. მე ეს ვიცოდი ბავშვობიდან და შემდეგ დავინახე ინტერესი, უპირველესად საქართველოში და დავიწყე სათამაშოების ბიზნესი მეგობრებთან ერთად“.
სოციალური ელემენტი მოგვიანებით შემოვიდა, თუ თავიდანვე იყო?
„თავიდან ყველაფერს თვითონ, ოჯახის წევრებთან ერთად ვამზადებდი. ჩემი მეგობრებიც იყვნენ ჩართულები და პროფესიონალები გახდნენ. ისინი და მე სათამაშოების კეთების მაღალ დონეზე ავედით. თუმცა, ვიგრძენი, რომ რაღაც მავიწყდებოდა. ყოველთვის მინდოდა შემექმნა ორგანიზაცია სადაც უნარშეზღუდული ადამიანები იქნებოდნე ჩართულები. ადამიანები, ვისაც განსაკუთრებული უნარი და შესაძლებლობები აქვთ. ეს იყო პერსონალურად მნიშვნელოვანი ჩემთვის და სათამაშოებისთვის. სათამაშოები კეთებისას დადებით ენერგიას შთანთქავენ.
ასე რომ ყველა ადამიანს, რომელიც სათამაშოს ხელით აკეთებს პოზიტიური ენერგია აქვს. ის ადამიანები ამ ენერგიას, ამ სიყვარულს დებენ და აზიარებენ“.
საზოგადოების ნაწილი შესაძლოა ფიქრობდეს, რომ შეზღუდული შესაძლებლობების მქონე ადამიანების დასაქმებით ბიზნესი კომპრომისზე მიდის. რას უპასუხებდით?
„არავითარ შემთხვევაში ასე არ უნდა იფიქრონ. ეს ადამიანები განსაკუთრებულად მოტივირებულები არიან. უბრალოდ მათ უნარებს სძინავთ და მსგავსი ტიპის საწარმოებში მუშაობისას იღვიძებენ და ვითარდებიან. ამის შედეგად სპეციალისტები ხდებიან. ისინი აძლიერებენ კომპანიას. აკაკი ამბობდა შევძლებ. გავაკეთებ, გავაძლიერებ კომპანიას და ეს სიმართლეა. საქმეს მთელი გუნდი ერთად ვაკეთებთ“.
კომპანია დაარსებულია. სათამაშოებს ევროპაში, გერმანიაში ყიდით. გაფართოვდით, მაგრამ რას ელოდებით მომავალში?
„უნდა განვვითარდეთ. პროგრესი გვინდა. პროგრესი იქნება მეტი უნარშეზღუდული ადამიანის დაქირავება, იმიტომ რომ საზოგადოება, მთელი მსოფლიო, ელოდება ჩვენს პროდუქტს“.
თქვენ მიიღეთ მიკროფინანსი ბანკიდან, რომელსაც ევროპის საინვესტიციო ბანკი უჭერს მხარს. რამდენად მნიშვნელოვანია, რომ ევროპა უფრო მეტად დაეხმაროს მსგავს კომპანიებს საქართველოში?
„ეს ძალიან მნიშვნელოვიანია ჩვენთვის. ამ თანხით ვიყიდეთ მანქანები და ნედლეული, გადმოვედით ამ შენობაში და მიუხედავად იმისა, რომ გვაქვს საკუთარი გაყიდვები ვაგრძელებთ განვითარებას. ძალიან მნიშვნელოვანია ჩვენთვის და საქართველოსთვის. დადგება დღე, როცა აღარ დაგვჭირდება მსგავსი დახმარება და შემდეგ ჩვენ ევროპას დავუბრუნებთ დახმარებას“.
