„ნაციონალური მოძრაობა“ „ქართული ოცნების“ სახით უკვე ხელისუფლებაშია, რაც სიმბიოზი არ არის, ეს ერთი მედლის ორი მხარეა“, _ აღნიშნა „გურია ნიუსთან“ პოლიტოლოგმა გია ხუხაშვილმა.
ხუხაშვილი ფიქრობს, რომ „ქართულ ოცნებას“ საქართველოში ყოფილი პრეზიდენტის მიხეილ სააკაშვილის ჩამოსვლის ეშინია.
_ ბატონო გია, ბელგიის ქალაქ ლიეჟში, სადაც საქართველოს ყოფილი პრეზიდენტი მიხეილ სააკაშვილი ემიგრანტებს შეხვდა, საქართველოდან ჩასული მოქალაქეების მხრიდან პროვოკაციას ჰქონდა ადგილი. პოლიტიკურ წრეებში აღნიშნული ფაქტი ხელისუფლების მიერ მართულ კამპანიად შეფასდა, რაც პარლამენტის თავმჯდომარე ირაკლი კობახიძემ საკუთარი განცხადებით ირიბად დაადასტურა. მისი თქმით, რამდენჯერაც „ნაციონალური მოძრაობა“ თავის წამოწევას შეეცდება, საზოგადოება იმდენჯერ გასცემს პასუხს და თუ დახმარება დასჭირდება, დავეხმარებითო. მიხეილ სააკაშვილის აქტიურობას, „ქართული ოცნება“ ასეთი პროვოკაციული ქმედებებით რატომ პასუხობს?
_ „ქართული ოცნების“ პოლიტიკური ელიტა შედგება ადამიანებისგან, რომლებსაც „ნაციონალური მოძრაობის ხელისუფლებაში ყოფნის დროს მიხეილ სააკაშვილის აჩრდილისაც ეშინოდათ და მისი შიშით დღესაც ისტერიკაში არიან ჩავარდნილნი. დღეს ხელისუფლება, რომელსაც ძალიან ბევრი პრობლემა აქვს, ცდილობს, რომ საზოგადოების თვალში მუდმივად სისხლიანი მმართველობის ჭრილობა გახსნას, თუმცა ვხედავთ, რომ ანტიმიშას ფენომენი ნაკლებად მუშაობს.
_ ჩანს, რომ „ქართულ ოცნებას“ საქართველოში მიხეილ სააკაშვილის ჩამოსვლა არ აწყობს, შესაბამისად, ყოფილი პრეზიდენტის დაკავების მიზნით, საერთაშორისო დონეზე არც პროკურატურა მუშაობს აქტიურად. როგორ ფიქრობთ, რატომ?
_ რა თქმა უნდა, ხელისუფლებას მიხეილ სააკაშვილის საქართველოში ჩამოსვლა არ აწყობს, რადგან მათი გაგებით, მიშა ციხეში იმაზე უფრო სახიფათოა, ვიდრე ევროპაში მოსიარულე. ხელისუფლებას ურჩევნია სააკაშვილმა ქართველი საზოგადოება სხვა ადგილიდან მუდმივად რიტუალური საფრთხეებით კვებოს. აღსანიშნავია, რომ „ქართული ოცნება“ თავად გახდა „ნაციონალური მოძრაობის“ სამართალმემკვიდრე. ხელისუფლებამ პირდაპირ გვითხრა, რომ მომწონს „ნაციონალური მოძრაობის“ სისტემა და მასთან ვთანამშრომლობო. შესაბამისად, „ნაციონალური მოძრაობა“„ქართული ოცნების“ სახით უკვე ხელისუფლებაშია, რაც სიმბიოზი არ არის, ეს ერთი მედლის ორი მხარეა.
_ განაცხადეთ, რომ „ქართული ოცნება“ „ნაციონალური მოძრაობის“ სამართალმემკვიდრეა, თუმცა მმართველი პარტიის პოლიტსაბჭომ ადამიანები, რომლებიც სასამართლო სისტემაში სამართლიანობის აღდგენისთვის იბრძვიან, თავად გამოაცხადა „ნაციონალურ მოძრაობასთან“ აფილირებულ საზოგადოებად.
_ ”ქართულმა ოცნებამ“ სხვისკენ ხელის გაშვერას თავი უნდა დაანებოს. ფაქტია, „ნაციონალური მოძრაობას“ თავად წარმოადგენენ. პოლიტსაბჭოს განცხადება, რომელიც „ქართულმა ოცნებამ“ გამოაქვეყნა, ლევან მურუსიძემ დაწერა და „ქართულმა ოცნებამ“ ხელი მოაწერა. პირდაპირ გვეუბნებიან, რომ „ნაციონალური მოძრაობის“ სამართალმემკვიდრეები არიან და მათი აქცენტები სასაცილოა.
_ სასამართლო სისტემაში მიმდინარე სკანდალური პროცესების პარალელურად, მმართველ პარტიაში გუნდურობა დარღვეულია. საქმე იქამდე მივიდა, რომ თანაგუნდელები ერთმანეთს პარტიის დატოვებისკენაც მიუთითებენ. „ვისაც გუნდის დატოვება უნდა, კარი ღიაა“, _ განაცხადა თბილისის მერმა კახა კალაძემ.
გასაგებია, რომ „ქართული ოცნება“ დიდი გუნდია და პარტიის დაშლა ნაკლებად სავარაუდოა, მაგრამ გაყოფის შემთხვევაში, საზოგადოება რომელ მხარეში დაინახავს ნამდვილ „ქართულ ოცნებას“ _ ეკა ბესელიას თანამოაზრეებში თუ პარლამენტის თავმჯდომარის ხელმძღვანელობით, ე.წ. ახლების ფრთაში, რომელთაც 2012 წელს „ქართული ოცნების“ მონაპოვართან კავშირი არ აქვთ?
_ირაკლი კობახიძის ფრთა არის „ნაციონალური მოძრაობა“, ხოლო ეკა ბესელიას თანამოაზრეები არიან ადამიანები, რომელსაც ადრე გარკვეული წითელი ხაზები ჰქონდათ გადაკვეთილი და ახლა „ნაციონალური მოძრაობის“ სტატუსით „ქართულ ოცნებაში“ შემავალ ახალგაზრდებს აღარ აყვნენ. ვინ წარმოადგენს ირაკლი კობახიძის ფრთას?! _ ესენი არიან ადამიანები, რომლებიც, როცა საზოგადოების მხრიდან „ნაციონალური მოძრაობას“ წინააღმდეგ ბრძოლა მიმდინარეობდა, ბუჩქებში ისხდნენ, ზოგი კი მიხეილ სააკაშვილის ხელისუფლებას პირდაპირ ემსახურებოდა.
_ ქართულ რეალობაში, სადაც მესამე პოლიტიკური ძალა, ფაქტობრივად, გაკრეფილია, საზოგადოება 2020 წლის საპარლამენტო არჩევნებში ალტერნატივას კვლავ „ქართულ ოცნებაში“ და „ნაციონალურ მოძრაობაში“ დაინახავს?
_ საზოგადოებას არც ერთი უნდა და არც მეორე. გასაგებია, რომ საზოგადოება არ არის მზად იმისთვის, რომ „ნაციონალურ მოძრაობას“ ხელისუფლება დაუბრუნოს, მაგრამ არც ის უნდა, რომ „ქართული ოცნება“ ხელისუფლებაში დატოვოს. დღეს ხალხი ალტერნატივას ეძებს, თუმცა მუდმივი საინფორმაციო შეტევები ზუსტად იმაზეა გათვლილი, რომ პოლიტიკურ სივრცეში მესამე ძალა არ გამოჩნდეს.
