,,საქართველოს ყველა პოლიტიკური აქტორის ინტერესშია, რომ სწრაფად დასრულდეს დაპირისპირება და ქვეყანა დაუბრუნდეს დემოკრატიულობის მძიმე შრომა“ – ამის შესახებ სენატორმა რონ ჯონსონმა სენატის საგარეო კომიტეტის სხდომაზე ისაუბრა, სადაც საქართველოში დემოკრატიის მდგომარეობის შესახებ მოსმენა გაიმართა.
მისი თქმით, საქართველო რეგიონში ძალიან ბევრი ქვეყნის მაგალითია.
,,საქართველო ცდილობს თავი დააღწიოს კორუფციულ მემკვიდრეობას და უბრალოდ ცდილობს თავი დააღწიოს რუსეთის გავლენებს. ძალიან მნიშვნელოვანია, რომ ყველა პარტია, ოპოზიცია და მმართველი პარტია შეთანხმდეს და გაიაზროს, რომ ეს მათ ინტერესშია, ყველას ინტერესშია, საქართველოს ინტერესშია, რომ დასრულდეს ეს დაპირისპირება და ქვეყანა დაუბრუნდეს მმართველობის მძიმე შრომას, დემოკრატიულობის მძიმე შრომას. საქართველო რეგიონში ძალიან ბევრი ქვეყნის მაგალითია“ – ამბობს ჯონსონი.
ასევე სენატორი რონ ჯონსონი რეზოლუციის შემუშავების ინიციატივით გამოვიდა, რომელშიც იქნება მიმართვა პარტიებისთვის, რომ მოილაპარაკონ და არსებული დავა გადაწყვიტონ.
ასევე მან აღნიშნა, რომ დავის გადაწყვეტა მარტივი არ არის, თუმცა ეს საბოლოო ჯამში ამ პარტიების გასაკეთებელია, რადგან არავინ განახორციელებს ზეწოლას.
„ვფიქრობ, ხანდახან საკმარისად არ ვაფასებთ, რა შეუძლია გააკეთოს ამერიკის შეერთებული შტატების სენატმა. როგორც ჩვენმა მომხსენებლებმა აღნიშნეს, სენატს შეუძლია მნიშვნელოვანი მესიჯების გაგზავნა განცხადებების სახით, თუმცა მე ვფიქრობ, რომ, ასევე, პოტენციურად შეგვიძლია რეზოლუციის გაგზავნაც. ჩვენ შეგვიძლია მოვუწოდოთ პარტიებს, რომ დასხდნენ ერთად, გადაწყვიტონ უთანხმოება. ცხადია ამ დავის გადაჭრა მარტივი არ არის, მაგრამ მათზეა დამოკიდებული. არავის შეუძლია მათზე ზეწოლის განხორციელება. საინტერესოა, რომ ორივე პარტია ელოდება, რომ ამერიკის შეერთებული შტატები გაატარებს მის ნებას ერთ მხარეს, ან მეორე მხარეს, ეს გვესმის დროთა განმავლობაში. ამ პარტიებზეა დამოკიდებული ყველაფერი. კარგი იქნება ამ რეზოლუციაზე მუშაობა, ვფიქრობ, რომ ეს, ასევე, იქნება მნიშვნელოვანი სიგნალი და შეიძლება იყოს სასარგებლო“ – განაცხადა ჯონსონმა.
