დღეს, თბილისის „მიხეილ მესხის“ სახელობის სპორტულ არენაზე, საქართველოს საფეხბურთო ნაკრები ამხანაგურ შეხვედრაში სენტ კიტსისა და ნევისის ეროვნულ გუნდს უმასპინძლებს.
ეგზოტიკური მეტოქე კარიბის ზღვის ერთ-ერთი კუნძულ სახელმწიფოს წარმომადგენელია. მის სიძლიერეზე რა მოგახსენოთ. გასულ წელს ესტონეთის ნაკრებთან ფრედ – 0:0 ითამაშა. ორი დღის წინ კუნძულელები სომხეთის ეროვნულ გუნდს დაუპირისპირდნენ და დიდი ანგარიშით წააგეს – 0:5.
სენტ კიტსისა და ნევისის მოსახლეობა სულ რაღაც 42 ათასს ადამიანს შეადგენს. საფეხბურთო ნაკრები კი ფიფა-ს რეიტინგის მეორე ასეულშია განლაგებული.
სენტ კიტსისა და ნევისის ნაკრების ფეხბურთელები ამჟამად თბილისში იმყოფებიან, მათი სახელგანთქმული კოლეგა, იტალიელი ფეხბურთელი მარიო ბალოტელი კი გუშინ გერმანიის ქალაქ დორტმუნდში ჩაფრინდა.
ფრანგული „ნიცას“ თავდამსხმელის პირადი აგენტი მინო რაიოლას მტკიცებით, ახალი სეზონიდან „სუპერმარიო“ კარიერას დორტმუნდის „ბორუსიაში“ გააგრძელებს. ბალოტელის ფრანგულ გუნდთან გაფორმებული ხელშეკრულება მიმდინარე წლის 30 ივნისს უსრულდება.
ბალოტელი „ბორუსიას“ უახლოვდება, ამ გუნდის თავდამსხმელი პიერ-ემერიკ იბამეიანგი კი პირიქით, ამჟამინდელ გუნდს ტოვებს. გუშინ გავრცელებული ცნობით, ეროვნებით გაბონელი ფეხბურთელი კარიერას იტალიურ „მილანში“ გააგრძელებს. სილვიო ბერლუსკონის ყოფილი გუნდი აფრიკელს ოთხწლიან კონტრაქტს და ხელფასის სახით წელიწადში 7.5 მილიონ ევროს სთავაზობს.
გუშინ, გერმანიაში ერთი გამოკითხვის შედეგები გამოქვეყნდა. ბუნდესლიგის ფეხბურთელებმა 2016/17 წლების სეზონის საუკეთესო მოთამაშედ მიუნჰენის „ბაიერნის“ პოლონელი თავდამსხმელი რობერტ ლევანდოვსკი დაასახელეს.
გუშინ იტალიური საფეხბურთო კლუბი „ფიორენტინა“ ახალმა დამრიგებელმა ჩაიბარა. მომავალი სეზონიდან ფლორენციულ გუნდს 51 წლის პაულო სოუზა სტეფანო პიოლი უხელმძღვანელებს.
გუშინვე დორტმუნდის „ბორუსია“ ამსტერდამის „აიაქსის“ ყოფილმა მწვრთნელმა პეტერ ბოსმა ჩაიბარა. 53 წლის სპეციალისტმა კონტრაქტი 2019 წლის ზაფხულამდე გააფორმა.
