ზაფხულობით, როგორც წესი, განსაკუთრებით აქტუალური ხდება კუჭ-ნაწლავის სისტემის დაავადებები, რომლებიც უმეტესად დიარეით (ფაღარათით) ვლინდება – ეს არის საფრთხე, როგორც ბავშვების, ისე დიდებისთვის.
რა უნდა ვიცოდეთ სეზონური ნაწლავური ინფექციების შესახებ და როგორ უნდა ავირიდოთ აღნიშნული პრობლემა,_ საკითხის შესახებ “გურია ნიუსი” ოზურგეთის საზოგადოებრივი ჯანდაცვის ცენტრის ეპიდემიოლოგს ელზა სიმონიშვილს ესაუბრა.
როგორც ელზა სიმონიშვილი გვეუბნება, ყოველწლიურად მაღალი ტემპერატურის პირობებში და განსაკუთრებით ზღვის სეზონის დადგომისას მატულობს ნაწლავური ინფექციების შემთხვევები, რაც შესაძლოა გამოწვეული იყოს როგორც ბაქტერიებით, ასევე ვირუსებით. ნაწლავური ინფექციები მთელი წლის განმავლობაში გვხვდება, თუმცა, გამომწვევებს სეზონურობა ახასიათებთ: ზამთარში ხშირია ვირუსული წარმოშობის ნაწლავური ინფექციები, ზაფხულში კი -ბაქტერიული წარმოშობის ინფექციები.
“ოზურგეთის მუნიციპალიტეტში ბოლო პერიოდის განმავლობაში 90-ზე მეტი დიარეისა და სავარაუდო საკვებისმიერი მოშხამვის შემთხვევა დადასტურდა, თუმცა, ეს რა თქმა უნდა, არ არის ზუსტი სტატისტიკა, რადგან მსუბუქ შემთხვევებს, როგორც წესი ოჯახის პირობებში მკურნალობენ და ხშირად არ მიმართავენ სამედიცინო დაწესებულებას. ეს არ არის საგანგაშო მაჩვენებელი, მაგრამ ზაფხულის დადგომასთან დაკავშირებით იზრდება აღნიშნული ინფექციების რისკი, ამიტომ საჭიროა თავდაცვისა და პრევენციის ზომებზე ყურადღების გამახვილება”,_ ამბობს ეპიდემიოლოგი.
ელზა სიმონიშვილის განმარტებით, ნაწლავური ინფექციის სიმპტომები შეიძლება განსხვავდებოდეს გამომწვევის და ინფექციის სიმძიმის მიხედვით, თუმცა ყველაზე გავრცელებული ძირითადი ნიშნებია:
დიარეა (ფაღარათი): ეს არის ყველაზე დამახასიათებელი სიმპტომი. განავალი არის თხიერი, წყლიანი და მისი სიხშირე დღე-ღამეში სამს ან მეტ ჯერადობას აღწევს.
ვირუსული ინფექციის დროს განავალი ხშირად ყვითელი და წყლიანია, არ შეიცავს პათოლოგიურ მინარევებს (ლორწო, სისხლი).
ბაქტერიული ინფექციის დროს განავალი შეიძლება იყოს მომწვანო, ლორწოს ან სისხლის შემცველი .
მუცლის ტკივილი და სპაზმები: ტკივილი, როგორც წესი, მოვლითი ხასიათისაა და შეიძლება ლოკალიზდეს ჭიპის გარშემო ან მუცლის ქვედა ნაწილში.
გულისრევა და ღებინება: ხშირად თან ახლავს დიარეას, განსაკუთრებით ვირუსული ინფექციების დროს.
ტემპერატურის მომატება (ცხელება): შეიძლება იყოს დაბალი ან მაღალი, რაც დამოკიდებულია ინფექციის ტიპზე.
მადის დაქვეითება.
ზოგადი სისუსტე და დაღლილობა.
მეტეორიზმი (მუცლის შებერილობა) და გაზების დაგროვება.
სხვა შესაძლო სიმპტომები
თავის ტკივილი.
კუნთების ტკივილი.
_ როდის უნდა მივმართოთ ექიმს?
_ განსაკუთრებით მნიშვნელოვანია ექიმთან დროული მიმართვა, თუ შეამჩნევთ ზემოთ აღნიშნულ სიმპტომებს, რადგან მათ შეიძლება გაუწყლოებაზე ან ინფექციის გართულებაზე მიუთითებდეს:
გაუწყლოების ნიშნები: ძლიერი წყურვილი, პირის სიმშრალე, შარდის შემცირება ან მისი მუქი ფერი, ძლიერი სისუსტე, თავბრუსხვევა, ჩაცვენილი თვალები (განსაკუთრებით ბავშვებში).
სისხლი ან ლორწო განავალში.
ძლიერი, შეუჩერებელი ღებინება.
დიარეა, რომელიც გრძელდება 2-3 დღეზე მეტ ხანს (ბავშვებში – 24 საათზე მეტ ხანს).
ძალიან მაღალი ტემპერატურა (40°C-ზე მეტი).
მუცლის ძლიერი, მუდმივი ტკივილი.
_ როგორ უნდა მოხდეს პრევენცია-თავდაცვა აღნიშნული ინფექციებიდან?
_ნაწლავური ინფექციების პრევენციისთვის უმნიშვნელოვანესია პირადი ჰიგიენის დაცვა, ხელების ხშირი დაბანა საპნით, განსაკუთრებით ტუალეტის გამოყენების შემდეგ და ჭამის წინ, ასევე საკვების სათანადოდ მომზადება-თერმული დამუშავება და შენახვა.
ასევე ძალიან მნიშვნელოვანია, რომ ზღვაზე დასვენებისას დაცული იქნეს გარკვეული ჰიგიენური ნორმები:
მოერიდეთ ზღვის წლის ჩაყლაპვას.
აუცილებლად მიიღეთ შხაპი ზღვიდან ამოსვლის შემდეგ.
არ მიიღოთ პლაჟზე დაყოვნებული საკვები და კრემიანი ნაწარმი.
მალფუჭებადი პროდუქტები გამოიყენეთ მითითებული ვადის ამოწურვამდე.
ყურადღება გაამახვილეთ საკვები პროდუქტების შეძენისას და შენახვისას საჭირო წესების დაცვასა და ტემპერატურული რეჟიმის შენარჩუნებაზე.
თუ გაქვთ ეჭვი ნაწლავურ ინფექციაზე, აუცილებლად მიმართეთ ექიმს ზუსტი დიაგნოზისა და შესაბამისი მკურნალობისთვის.
