უკრაინაში ამჟამად არსებული მძიმე მოვლენების გავლენა გარკვეულწილად სპორტულ სფეროსაც შეეხო. ცნობილი გახდა რომ სანკტ-პეტერბურგში დანიშნული ჩემპიონთა ლიგის ფინალი შესაძლოა სხვა ქალაქში, კერძოდ კი ლონდონში გადაიტანონ. მსოფლიო ჩემპიონატის შესარჩევი მატჩის ჩასატარებლად პოლონეთის ნაკრები მოსკოვში ჩასვლას უარობს. რუსული გუნდები შეიძლება ევროპული საკლუბო ტურნირების გარეშე აღმოჩნდნენ. ეს მხოლოდ ორი დღის წინ გავრცელებული ცნობებია.
გუშინ კი ცნობილი გახდა რომ გელზენკირხენის „შალკეს“ ხელმძღვანელები „გაზპრომთან“ მრავალწლიან თანამშრომლობას გადახედავენ.
„შალკე“ ყურადღებით დააკვირდება მოვლენების განვითარებას, შექმნილ ვითარებას, არსებულ გარემოებებს შეაფასებს და კრიზისით დაზარალებული ადამიანების დასაცავად მშვიდობაზე იქნება ორიენტირებული. კლუბის ხელმძღვანელობა აღმოსავლეთ ევროპაში მიმდინარე მოვლენების გამო დიდად შეშფოთებულია. ამ კონტექსტში ჩვენს განსაკუთრებულ როლს ვაცნობიერებთ – „შალკეს“ „გაზპრომის“ გერმანულ ფილიალთან 15 წელზე დიდხნიანი პარტნიორობა აკავშირებს.” – გავრცელდა გუშინ გუნდის ოფიციალური განცხადება.
გელზენკირხენულ კლუბს რუსულ კომპანიასთან კონტრაქტი 2025 წლამდე აქვს გაფორმებული. ლევან კობიაშვილის ყოფილი გუნდი „გაზპრომისგან“ წელიწადში 9 მილიონ ევროს იღებს, რაც მეორე ბუნდესლიგის კლუბისთვის ძალიან სარფიანი გარიგებაა.
უკრაინული გამოცემა „Meta-ratings“-ის ცნობით, თუ რუსეთი უკრაინაში შეიჭრა, ფეხბურთში ამ ქვეყნის ეროვნული ჩემპიონატის განახლება გადაიდება.
ამავე გამოცემამ გუშინ კიევის „დინამოს“ პრეზიდენტი იგორ სურკისის განცხადება გაავრცელა:
„არსად წასვლას და გაქცევას არ ვაპირებ. ამ რთულ დროს საჭიროა სიმშვიდის შენარჩუნება. თუ პანიკაში ხარ, უკვე დამარცხდი. სისტემატურად კლუბის ოფისში ვიმყოფები. მოვლენების სხვადასხვა სახით განვითარებისთვის მზად ვართ. მჯერა, ჩვენს ქვეყანაში ყველაფერი კარგად იქნება და გულშემატკივრებს მატჩებზე ვეპატიჟები. ჩვენს გუნდებს მხარდაჭერა, ყურადღება და ენერგია სჭირდებათ”.
გუშინ კიევის ამჟამინდელმა მერმა და კრივში ყოფილმა მსოფლიო ჩემპიონმა ვიტალი კლიჩკომ რუსეთის მიერ ე.წ. დონბასისა და ლუგანსკის სახალხო რესპუბლიკების დამოუკიდებელ სახელმწიფოებად აღიარებაზე რეაგირება მოახდინა.
„უკრაინის პარტნიორებმა რუსეთის წინააღმდეგ სანქციები უნდა შემოიღონ! დაუყოვნებლივ. ზედმეტი განხილვისა და გადავადებების გარეშე. რუსეთმა ევროპის ცენტრში ქვეყნის კბენით საერთაშორისო სამართლის ყველა ნორმა დაარღვია და გაჩერებას არ აპირებს. კიდევ რა არგუმენტებია საჭირო ბოლოს და ბოლოს აგრესორის დასაშოშმინებლად?“, – განაცხადა ვიტალი კლიჩკომ.
გუშინ ცნობილი გახდა რომ საქართველოს ნაკრების მეკარე გიორგი ლორია კვიპროსულ „ანორთოსისთან“ კონტრაქტს გააგრძელებს.
ამის შესახებ 36 წლის ქართველი კარის დარაჯის მენეჯერმა ელიას ელიასმა განაცხადა: „კონტრაქტის განახლებასთან ძალიან ახლოსაა, რამდენიმე დღის წინ დაურეკეს, პოზიტიური მოლოდინი არსებობს“.
გიორგი ლორია ანორთოსისს 2019 წელს შეუერთდა და მას შემდეგ კვიპროსულ გუნდში 88 თამაში ჩაატარა. კონტრაქტი მიმდინარე სეზონის ბოლოს, 31 მაისს ეწურება. საქართველოს ნაკრებში ლორიას ანგარიშზე 71 თამაშია.
ტურინის „იუვენტუსის“ თავდამსხმელი პაულო დიბალა შესაძლოა მიმდინარე წლის ზაფხულში კატალონიურ „ბარსელონაში“ გადავიდეს. ესპანური სპორტული მასმედიის მტკიცებით არგენტინელი ფეხბურთელი მზადაა, „ბარსასთან“ კონტრაქტს ხელი დაუყოვნებლივ მოაწეროს.
დიბალას „იუვენტუსთან“ ხელშეკრულება მიმდინარე წლის 30 ივნისს ეწურება. მხარეებმა მის განახლებაზე შეთანხმებას ამ დრომდე ვერ მიაღწიეს. დიბალა სეზონში 10 მილიონ ევროს ითხოვს, მაგრამ ტურინელები მას მაქსიმუმ 7 მილიონ ევროს და ბონუსებს სთავაზობენ. იტალიური გრანდის ხელმძღვანელობას არგენტინელის მიმართ ბოლო დროს ეჭვები გაუჩნდა, რადგან ფეხბურთელი ტრავმებს ხშირად იღებს.
„ბარსელონა“ მზადაა დიბალა ზაფხულში უფასოდ დაიმატოს. კატალონიელები მას უსმან დემბელეს შემცვლელად განიხილავენ. აღსანიშნავია, რომ 28 წლის სამხრეთამერიკელს წინადადებები ლონდონის „ტოტენჰემიდან“ და მილანის „ინტერიდანაც“ აქვს, მაგრამ მას ესპანეთის ჩემპიონატში თამაში ურჩევნია.
გუშინ ჩემპიონთა ლიგის მერვედფინალური სტადიის ორი შეხვედრა გაიმართა:
„ბენფიკა“ – „აიაქსი“ 2:2
„ატლეტიკო“(მადრიდი) – „მანჩესტერ იუნაიტედი“ 1:1
[sexy_author_bio]
