დღეს მცხეთის რაიონული სასამართლო 19 წლის ფეხბურთელის, გიორგი შაქარაშვილის საქმეზე მსჯელობას განაახლებს. სამი წლის შემდეგ თავისუფლების უკანონო აღკვეთაში ბრალდებულების სასამართლო პროცესი გაიმართება.
საქმე ეხება თავისუფლების უკანონო აღკვეთის ეპიზოდზე ბრალდებულ სამ პირს – კერძოდ გური ამირხანაშვილის თბილისში ჩამოყვანას. დაცვის მხარე გამოძიების ხელახლა ჩატარებას ითხოვს. უფლებადამცველი არ გამორიცხავს დავა საქართველოს ფარგლებს გარეთაც გაგრძელდეს.
“ორი არასრულწლოვანის მიმართ მცხეთის რაიონულ სასამართლოს უკვე გამოტანილი აქვს უკანონო გამამტყუნებელი განაჩენი, ასევე თბილისის საქალაქო სასამართლოსაც, ამიტომ ჩვენ მოლოდინი, რომ მცხეთის რაიონული სასამართლო რაიმე განსხვავებულს იტყვის და იტყვის რომ ამ სამის პირს, 6 პირიდან, რომლებიც ტოიოტა ქამრიში ისხდნენ, იმათგან განსხვავებით არ ჩაუდენიათ დანაშაული, ამის მოლოდინი, რა თქმა უნდა, არ გვაქვს, თუმცა ჩვენ ვიღებთ მაინც მონაწილეობას ამ პროცესში, მივყვებით ამ სამართლებრივ გზას, გავივლით საქართველოში შიდა ეროვნულ ყველა ინსტანციას და შემდეგ მივიღებთ გადაწყვეტილებს უკვე გავაგრძელოთ თუ არა დავა საქართველოს ფარგლებს გარეთ”, – ამბობს ნიკოლოზ რევაზიშვილის ადვოკატი, შოთა კახიძე.
ცნობისთვის, გიორგი შაქარაშვილის საქმეზე დამამძიმებელ გარემოებებში ჯგუფურად ჩადენილ განზრახ მკვლელობის ბრალდებით 3 პირს სასჯელის სახედ 16-16 წლით თავისუფლების აღკვეთა აქვთ შეფარდებული, ხოლო ორს, როგორც არასრულწლოვნებს 10 წლით და 6 თვით პატიმრობა.
რაც შეეხება საქმის კიდევ ერთ ეპიზოდს, გამოძიება ამბობს, რომ ორჯერ თავდასხმის შემდეგ, გიორგი შაქარაშვილი და მასთან ერთად მყოფი პირები გაიქცნენ და არაგვის მიმდებარე ტერიტორიაზე მიიმალნენ. მსჯავრდებულებმა დამალული ერთ-ერთ დაზარალებული იპოვეს, მისი ნების საწინააღმდეგოდ ჩასვეს ავტომობილში და მეტროსადგურ დიდუბის მიმდებარე ტერიტორიაზე დატოვეს.
ორი ბრალდებული დამნაშავედ იქნა ცნობილი ჯგუფურ ძალადობაში მონაწილეობასა და თავისუფლების უკანონო აღკვეთაში, წინასწარი შეთანხმებით ჯგუფის მიერ. მათ, არასრულწლოვანთა მართლმსაჯულების კოდექსის საფუძველზე, 6 წლით და 9 თვით თავისუფლების აღკვეთა განესაზღვრათ.
სამი ბრალდებული დამნაშავედ იქნა ცნობილი სისხლის სამართლის კოდექსის 225-ე მუხლის პირველი და მეორე ნაწილებით (ჯგუფური ძალადობის ორგანიზება და მასში მონაწილეობა), ერთი 225-ე მუხლის მეორე ნაწილით (ჯგუფურ ძალადობაში მონაწილეობა). მათ საბოლოოდ 5 წლით და 3 თვით, ხოლო ერთს – 3 წლით და 9 თვით თავისუფლების აღკვეთა განესაზღვრა.
