ოზურგეთს მუნიციპალიტეტის საკრებულო დეკემბრის პირველ რიცხვებში შეიკრიბება. მანამდე კი, როგორც „გურია ნიუსთან“ საუბრისას წყარო ამბობს, მმართველი გუნდის თავსატეხია, ვის კანდიდატურას დაუჭერენ მხარს საკრებულოს თავმჯდომარის პოსტზე დეპუტატები _ დავით დარჩიას თუ შოთა გოგიბერიძეს.
აღნიშნულთან დაკავშირებით, ორი დღის წინ, გვიან ღამით, ოზურგეთის მაჟორიტარი დეპუტატი არჩილ თალაკვაძე საკრებულოს იმ დეპუტატებს შეხვდა, ვინც ერთ გუნდად მოიაზრება.
როგორც უკვე არაერთმა წყარომ კონფიდენციალურად გვაცნობა, „მმართველ გუნდს საკრებულოს თემის დალაგებით სადავეების „ხელში დაჭერა“ სურს“ და ოზურგეთის ახალარჩეულ მერს კონსტანტინე შარაშენიძეს ძლიერი საკრებულოს იმედით, 6 თვის შემდეგ იმპიჩმენტს მოუწყობენ.
„მაინც არ გაახარებენ, გამორიცხულია, არ შეარჩენენ, 6 თვეში გადააყენებენ. მერის ხელახლა არჩევნები ჩატარდება. ვნახოთ, როგორ განვითარდება მოვლენები, ვინ გახდება საკრებულოს თავმჯდომარე, თუ დარჩიას დაუჭირეს მხარი, მაშინ გამოდის, რომ ეს ინფორმაცია სიმართლეს შეესაბამება, თუ გოგიბერიძე გახდება, მაშინ კოტე შარაშენიძე მისი გუნდით ძლიერდება, მანამდე კი ახალარჩეული მერიც, ასევე, ცდილობს ასევე, რომ როგორმე დაალაგოს ურთიერთობები და მეტი მომხრე ჰყავდეს საკრებულოში“, _ ამბობს ჩვენთან რამდენიმე დეპუტატი.
“გურია ნიუსისთვის“ თალაკვაძესთან შეხვედრის რამდენიმე დეტალი გახდა ცნობილი:
„მმართველი გუნდის პარტიული სიის მესამე ნომერი მარი ჩხიკვიშვილმა ითხოვა სიტყვა და თქვა, რახან ასეა, თავმჯდომარის არჩევნები ჩავატაროთ ღიად და გავიგოთ, ვინ არის ჩვენი, ანუ დარჩიას მომხრე და მოწინააღმდეგე დეპუტატები“, _ გვითხრა წყარომ.
ასევე, ჩვენთვის ხდება ცნობილი, რომ იმ დეპუტატებს, რომლებსაც ხელისუფლება ა(ა)იპ-ებში ასაქმებდა, აღარ დაასაქმებს, რომ შარაშენიძესთან რაიმე ვალდებულება არ ჰქონდეთ. ამიტომ ასეთი დეპუტატებისთვის საკრებულოში შეიქმნება ახალი შტატები _ ისინი კომისიის თავმჯდომარეების მოადგილეები გახდებიან, თუმცა, საქართველოს დემოკრატიული განვითარების კავშირის იურისტის ირაკლი პაპავას თქმით, კომისიის თავმჯდომარის მოადგილეს, როგორც თანამდებობის პირს.
“კანონი არ ცნობს, თვითონ საკრებულოს კომისიის დებულება იდეაში შეიძლება ითვალისწინებდეს კომისიის თავმჯდომარის მოადგილის არსებობას, მაგრამ ეს თანამდებობის პირი არ არის და აქედან გამომდინარე, მისი ანაზღაურება შეუძლებელია, ანუ ანაზღაურებადი არ არის”, _ გვითხრა პაპავამ.
როგორც უკვე ვწერდით, არჩილ თალაკვაძემ “გურია ნიუსთან“ შეხვედრის დეტალებზე საუბარი არ ისურვა და მხოლოდ სმს-ს შეტყობინება გამოგვიგზავნა, რომლითაც მან კომენტარისთვის შეხვედრის დამსწრე პირებითან _ დარჩიასა და ღურჯუმელიძესთან გადაგვამისამართა.
“გურია ნიუსთან“ “ქართული ოცნების“ პარტიული სიის მესამე ნომერი მარი ჩხიკვიშვილი არ ადასტურებს ინფორმაციას, რომ მან შეხვედრაზე კენჭისყრის ღიად ჩატარების შესახებ თქვა, თუმცა თავის პოზიციას აფიქსირებს. მისი თქმით, საკრებულოს თავმჯდომარის პოსტზე ის მხარს უჭერს დავით დარჩიას კანდიდატურას.
„ჩემი მხარდაჭერა ექნება დავით დარჩიას. ჩემი მოსაზრებით, საკრებულოს თავმჯდომარე უნდა იყოს “ქართული ოცნების“ წევრი და პარტიის თავმჯდომარე. მე მხარს შოთა გოგიბერიძეს არ დავუჭერ. რაც შეეხება კენჭისყრას, მე ეს არ მითქვამს, იმიტომ, რომ კანონი არ გვაძლევს ამის საშუალებას. ვერც მოადგილეების შტატებთან დაკავშირებით ვერ გეტყვით, რადგან მსგავსი საკითხები არ განხილულა. არც იმპიჩმენტთან დაკავშირებით მსმენია რაიმე. ჩვენ ვაპირებთ თანამშრომლობას“, _ ამბობს ჩხიკვიშვილი.
“გურია ნიუსი“ დაუკავშირდა კონსტანტინე შარაშენიძეს, რომელმაც განაცხადა, რომ მისი ფუნქცია არ არის საკრებულოს საქმიანობაში ჩარევა:
_ არანაირად არ არის ჩემი ფუნქცია საკრებულოს საკადრო პოლიტიკა. არ ვერევი და ამიტომ ვერ გაგცემთ პასუხს, დეპუტატებთან დაკავშირებით, რაც შეეხება იმპიჩმენტის საკითხს, ამაზე 6 თვის შემდეგ ვისაუბროთ, _ამბობს შარაშენიძე.
