ოზურგეთში, აგრარული ბაზრის შიდა ტერიტორიაზე, ერთ ახალ, კაპიტალურ შენობაზე, რომელიც ორიოდე წლის წინ ააგეს, აბრაა გაკრული, წარწერით: “ფრინველებით და ცხოველებით სავაჭრო”. შენობის წინ, ღია სივრცეში, შინაური ფრინველებით მოვაჭრე ქალბატონები კარგ ამინდში ყოველთვის გარეთ ვაჭრობენ _ გალიებით გამოყვანილია შინაური ფრინველები, კურდღლები, გოჭები, ციკნები.
მოვაჭრე ქალბატონები “გურია ნიუსთან” საუბრობენ დღევანდელ გასაჭირზე. როგორც თვითონ ამბობენ, ოზურგეთის მუნიციპალიტეტის მერიიდან შემოუთვალეს, რომ აღნიშნული შენობა 15 აპრილამდე უნდა დაცალონ.
მათი თქმით, როცა ქალაქის მერი ბეგლარ სიორიძე იყო, მისი ინიციატივით აშენდა ახალი შენობა, სადაც საღამოს, სამუშაო დღის დამთავრების შემდეგ, გალიები და სხვა საჭირო ნივთები შიგ შეაქვთ. ასევე, აქ ამწყვდევდნენ იმ ფრინველებს თუ ცხოველებს, რომლის გაყიდვაც ვერ მოასწრეს და მომდევნო დღეებისთვის გაჰყავთ ბაზარზე. მათ ეჭვი აქვთ, რომ შენობა, რომელიც სპეციალურად მათთვის გაკეთდა, ახლა ვიღაცისთვის უნდათ.
_ ეტყობა, დაადგეს თვალი. აბა, რატომ უნდა გამოვიდეთ, ან სად წავიდეთ? როცა წვიმს, შიგ შევდივართ. თუ აქედან გამოგვყარეს, რა ვქნათ? ცუდ ამინდში როგორ ვივაჭროთ? შემოღობილში ვიყავით ადრე და სიორიძემ ეს კი გააკეთა ლამაზად, _ ამბობენ ისინი.
ქეთევან რუსეიშვილი, ფრინველებით მოვაჭრე: _ არასდროს არავისთვის მიმიცია ხმა. მერის არჩევნებზე შარაშენიძეს დავუჭირე მხარი და ახლა ასე იქცევა! რამდენ რამეს დაგვპირდა არჩევნების წინ და ახლა გვითვლის, რომ ეს შენობა დავცალოთ. სიორიძემ პირდაპირ გვითხრა, აქედან ადექითო. ეს მოტყუებით მოდის, შეგვპირდა და ახლა უნდა “გადაგვაგდოს?!” არსად წავალთ! მოვიდეს აქ და დაგველაპარაკოს. აღდგომამდე ველოდებით ბაზარში _ “გადაგდება” არ იყოს, ასე გადაეცით. სამუშაო რომ იყოს, ამ ქათმის სკლინტში რა გვინდა? ასე უთხარით ზუსტად.
ნელი ჟღენტი, მოვაჭრე: _ ჩვენ ყველა მაგის გვერდით დავდექით და ახლა ამ შენობიდან რომ გვყრიან გარეთ, სად წავიდეთ? 15 აპრილამდე დაცალეთო, გვითხრეს. თურმე, აქ ვიღაცეებს სუნი აწუხებთ. ჩვენ ყოველ საღამოს ვასუფთავებთ და ისე მივდივართ. თუ უკეთესად უნდა იყოს, კეთილმოაწყონ თითონ. ჩვენ რაც შეგვიძლია, ვაკეთებთ. ბაზარია აქ და სუნი იქნება. სუნი ყველგან იქნება, თუ არ დაასუფთავე…
მაყვალა ახვლედიანი, მოვაჭრე: _ 18 წელია, რაც ამ ბაზარში ქათმებს ვყიდი. ვწვალობ. სამუშაო რომ იყოს, რა მინდა აქ? ახლა მოვიდნენ და გვითხრეს, იქეთ მხარეს ბახრამოვები ცხოვრობენ და სუნი აწუხებთო. სანამ აქ ააშენებდა სიორიძე ამ შენობას, ზუსტად მაგ მოსახლეობის სახლებში ვტოვებდით ჩვენს ფრინველებს თუ გოჭებს და ფულს ვიხდიდით. მაშინ არ ჰქონდა სუნი? ჩვენ, რაც შეგვიძლია, ვალაგებთ. ცოცხს ეძებს ვინმე თუ საპონს და ვედროს? სად უნდა წავიდეთ? გვეუბნებიან, რომ ივაჭრეთ დღისით და საღამოს თუ ვერ გაყიდით, სახლში წაიყვანეთ ეს ფრინველები, აქ არ დატოვოთო. როგორი მოსახერხებელია ეს?
ვიკა იმედაშვილი, მოვაჭრე: _ აუცილებლად მოვიდეს აღდგომამდე პატივცემული მერი და დაგვეხმაროს. ჩვენ პრეტენზიული ხალხი არ ვარ _ გვიჭირს და ვწვალობთ, რომ პურის ფული მაინც ვიშოვოთ. გვერდში რომ დავუდექით, ყველაფერი რომ შეგვპირდა, ახლა “პანღური”?! გაგვცეს პასუხი!
ნუნუ სიხარულიძე, მოვაჭრე: _ ეს შენობა ბეგი სიორიძემ აგვიშენა. მე მაგ კაცის უკმაყოფილო არ ვიყავი. გვითხრა, საღამოს შენობაში შეინახეთ თქვენი ქონება, დღისით კი გარეთ ივაჭრეთო. ერთ დღეში გაიყიდება, ეს ყველაფერი? ძალით ნუ გაგვიჭირვებენ და დაგველაპარაკონ წესიერად. საინტერესოა, სად უნდა წავიდეთ 15 აპრილის შემდეგ?
ფრინველებით მოვაჭრე ქალბატონები ამბობენ იმასაც, რომ ბაზარში წელს ქათმის ნაკლებობაა, რადგან არც ისე დიდი ხნის წინ გავრცელებული იყო ქათმის ჭირი და დღეისთვის კარგი დედალი 25 ლარი ღირს, ინდაურის ფასი კი 40 ლარიდან იწყება და 70 ლარამდე ადის.
_ მიუხედავად სიმცირისა, ფრინველებია თუ გოჭები, მაინც არ იყიდება. ხალხში ფული არ არის. ჩვენ, ყველა, აქ 15-20 წელია, ვმუშაობთ. ასეთი გასაჭირი კარგა ხანია, არ ყოფილა, _ ამბობენ ისინი.
“გურია ნიუსი” ოზურგეთის მუნიციპალიტეტის მერიის პრესსამსახურს დაუკავშირდა და აღნიშნულის შესახებ პასუხი მოითხოვა:
“მე მზად ვარ, ვითანამშრომლო ამ ადამიანებთან. აუცილებლად შევხვდები მათ და როგორც სჭირდებათ, ისე გადავწყვეტთ ყველაფერს. მზად ვარ, დავეხმარო”, _ ოზურგეთის მუნიციპალიტეტის მერის კონსტანტინე შარაშენიძის ეს კომენტარი მერიის პრესსამსახურის ხელმძღვანელმა, ეკა მგელაძემ მოგვაწოდა.
