საქართველოში ინფიცირების შემთხვევების რაოდენობა მატულობს. ბოლო ერთი კვირის განმავლობაში, ქვეყანაში კოვიდინფიცირების 1058 ახალი შემთხვევა დაფიქსირდა.
ჯანდაცვის სფეროს ექსპერტები ზაფხულის სეზონის ბოლოს შემთხვევების კიდევ უფრო მატებას ელოდებიან და დაბალი ვაქცინაციის ფონზე, მოსახლოებას ვაქცინის გაკეთებისკენ მოუწოდებენ.
ქვეყანაში შექმნილი ეპიდმდგომარეობა და ნაბიჯები, რაც ვაქცინაციაში მოსახლეობის ჩასართავად უნდა გადაიდგას – ის საკითხებია, რაც გუშინ ოზურგეთის საზოგადოებრივი ჯანდაცვის ცენტრში გამართულ სემინარზე განიხილეს.
უფრო დეტალური ინფორმაციის მისაღებად, ოზურგეთის საზოგადოებრივი ჯანდაცვის ცენტრის ეპიდემილოგს, ელზა სიმონიშვილს ვესაუბრეთ.
“ბოლო რამდენიმე დღის განმავლობაში ქვეყანაში ინფიცირების ათასზე მეტი შემთხვევა დაფიქსირდა. ეს იძლევა იმის საფუძველს, რომ განსაკუთრებული ყურადღება მივაქციოთ ინფიცირების შემთხვევის დადგენას. პანდემიის დასაწყისიდანვე იყო ნათქვამი, რომ ოფიციალურად რაც ფიქსირდება რაოდენობა, როგორც წესი, სამზე მრავლდება რეალური სურათის საჩვენებლად. ანუ ჩვენთვის უკვე ნახტომისებური მატებაა ამ ბოლო პერიოდის განმავლობაში. გასათვალისწინებელია ისიც, რომ ტურისტული სეზონი გააქტიურებულია, ზაფხულის საკურორტო სეზონის დადგომასთან დაკავშირებით შემოდინება ხდება ტურისტების, განსაკუთრებით ჩვენი მეზობელი ქვეყნებიდან, სადაც მოსახლეობის უმრავლესობა კორონავირუსზე აუცრელია ან აცრილია ძალიან საეჭვო ვაქცინით, რომელსაც ჯანმო, ასევე მსოფლიოს ბევრი ქვეყანა არ ცნობს. ეს ფაქტორიც გასათვალისწინებელია. რეგულაციები მოხსნილია და მხოლოს სამედიცინო დაწესებულებებში არის აუცილებელი პირბადის ტარება. შესაბამისად, დახურულ სივრცეში მიმდინარე სხვადასხვა ღონიძიებები ვირუსის გავრცელების რისკფაქტორს წარმოადგენს“,_ ამბობს სიმონიშვილი და აღნიშნავს, რომ ზაფხულის ბოლოს ინფიცირების შემთხვევების კიდევ უფრო მატებაა მოსალოდნელი. არ არის გამორიცხული ქვეყანაში კორონავირუსის სხვა შტამების შემოტანაც, რის გამოც ვირუსისგან თავდაცვის ერთადერთ ეფექტურ საშუალებად ვაქცინა სახელდება.
სიმონიშვილი ჩვენთან საუბრისას განმარტავს, რა ზომების მიღება იგეგმება ოზურგეთში ვაქცინაციის ტემპის გასაზრდელად.
“მოგვეცა რეკომენდაციები, რომ ოჯახის, უბნის ექიმებთან ერთად ასევე სხვადასხვა ადგილობრივი ადმინისტრაციული ორგანოების ჩართულობით შევაფასოთ რისკები და პრობლემური ჯგუფები. განვახორციელოთ, დავგეგმოთ გზები აცრის პროცესის გასააქტიურებლად, რადგან სავარაუდოდ წინა წლების გამოცდილებიდან გამომდინარე, ზაფხულის ბოლოს ველოდებით სიტუაციის შეცვლას. რადგან საზღვრები ჩაკეტილი აღარ არის, ტესტირების შედეგებს აღარ ითხოვენ საზღვრის კვეთისას უმეტესი ქვეყნები, გარდა ამისა, ახალი შტამი, რომელიც უკვე ევროპის ქვეყნებში დადასტურდა, შეიძლება, ჩვენს ქვეყანაშიც შემოიტანონ. იმედი გვაქვს, შევძლებთ მოსახლოების გააქტიურებას და პროფილაქტიკური აცრების ჩატარებას”,_ ამბობს სიმონიშვილი.
რაც შეეხება ოზურგეთში არსებულ მდგომარეობას, გასული 24 საათის განმავლობაში კოვიდინფიცირების 6 ახალი შემთხვევა დაფიქსირდა. ამ დროისთვის აქტიურია ინფიცირების 13 შემთხვევა, საიდანაც 6 ინფიცირებული კოვიდკლინიკაში, 7 კი ბინაზე მკურნალობს.
პანდემიის დაწყებიდან დღემდე კი დაფიქსირებულია ინფიცირების 21807 შემთხვევა, გამოჯანმრთელებულია 21698 პაციენტი, გარდაცვლილია 96.
