“გურია ნიუსს” კაპროვანიდან (ნატანებიდან) მოქალაქე დღეს კიდევ ერთხელ დაუკავშირდა და ისევ შველას ითხოვს.
აკაკი მიქაძის თქმით, მეათე დღეა, მდგომარეობა მძიმეა_ გზები ჩახერგილი, სოფელს არ მიიწოდება ელექტროენერგია და არც ბუნებრივი აირი. მან ადგილობრივ ხელისუფლებას არაერთხელ მიმართა, თუმცა, უშედეგოდ. ამჯერად, მოქალაქე “გურია ნიუსის” მეშვეობით გურიის მაჟორიტარ დეპუტატს, ვასილ ჩიგოგიძეს მიმართავს.
“ბატონ ვასილ ჩიგოგიძეს!
ბატონო დეპუტატო, იძულებული გავხდი, მოგმართოთ დახმარების თხოვნით! ვითხოვ შველას, ნატანების უბანში, კაპროვანში, მეათე დღეა არ გვაქვს შუქი, გაზი, გზა ჩახერგილია წაქცეული ფიჭვებით, მიწაზე გდია სადენები ბოძებთან ერთად. უფრო მეტიც, როდის რას დაეცემა არავინ იცის. ორი ხე კი ჩემს სახლს უკვე დაეცა, ნებისმიერმა ნიავმა შეიძლება მოიტანოს უბედური შემთხვევა.
აქედან გამომდინარე, როგორც გურულთა რჩეულს, დეპუტატს, კატეგორიულად მოვითხოვ გამოიჩინოთ გულისხმიერება, დაუდექით გვერდით კაპროვანში და კაპროვანელებს!
მიუხედავად ჩემი უამრავი თხოვნისა შესაბამისი უწყებების მიმართ, უშედეგოდ მთავრდება. იმედი მაქვს თქვენი კაცობისა და ვაჟკაცობისა! პატივისცემით, აკაკი მიქაძე”, _ წერს მოქალაქე “გურია ნიუსის” მეშვეობით “ქართული ოცნების” დეპუტატს.
ჩვენ დავუკავშირდით გურიის მაჟორიტარი დეპუტატის პრესსამსახურს.
“გურია ნიუსი” საპასუხო კომენტარს მიღებისთანავე შემოგთავაზებთ.
