“კვერცხის დეფიციტი არ არის, უბრალოდ, მიჩვეულები ვართ, რომ დახლები უნდა იყოს დახუნძლული“, – ამის შესახებ „ბიზნესპრესნიუსთან“ მეფრინველეობის განვითარების ასოციაციის ხელმძღვანელმა, ზურაბ უჩუმბეგაშვილმა ისაუბრა.
ცნობისთვის, ბოლო რამდენიმე დღეა, მოქალაქეები სხვადასხვა სასურსათო მაღაზიაში დახლებზე კვერცხის რაოდენობის შემცირებასთან დაკავშირებით საუბრობენ.
როგორც მეფრინველეობის განვითარების ასოციაციის ხელმძღვანელმა „ბიზნესპრესნიუსთან“ განმარტა, სარეალიზაციო კვერცხის რაოდენობის კლება ქვეყანაში იმპორტის მნიშვნელოვანი შემცირებით არის გამოწვეული.
„დახლები დახუნძლული აღარ არის რამდენიმე მიზეზის გამო. წელს ადგილობრივი წარმოება გაზრდილია, უფრო მეტს ვაწარმოებთ, ვიდრე შარშან, მაგრამ შემცირებულია იმპორტი. შესაბამისად, იმპორტის შევსებაც ადგილობრივ წარმოებას დააწვა. არც ერთი მაღაზია არაა, სადაც კვერცხი არ არის. უბრალოდ იმ რაოდენობით აღარ აწყვია თაროებზე, რამდენიც ეწყო და ესეც დროებითია. ადგილობრივ წარმოებას ვზრდით და იანვარ-თებერვლისთვის დახლები ალბათ, ისევ ისე დახუნძლული იქნება.
ეს რაოდენობა საკმარისია, თუ რაღაც პანიკური მოლოდინი არ იქნება და კვერცხის მარაგების გაკეთებას არ დაიწყებენ. თუ ეს არ მოხდება, არანაირ დეფიციტთან არ გვექნება საქმე. საქსტატის მონაცემებით, შარშან იყო 673 მილიონი წარმოება , წლევანდელი წარმოება კი სადღაც 700 000 მილიონამდე იქნება. გაიზრდება სადღაც 20 მილიონით“, – აცხადებს უჩუმბეგაშვილი.
„ბიზნესპრესნიუსის“ კითხვის საპასუხოდ, რას უკავშირდება ქვეყანაში კვერცხის იმპორტის შემცირება, მეფრინველეობის განვითარების ასოციაციის ხელმძღვანელი ამბობს, რომ მთავარი საიმპორტო პარტნიორისთვის საქართველოს დაბალბიუჯეტური ბაზარი აღარ არის საინტერესო.
„იმპორტის შემცირება გამოწვეულია იქიდან, რასაც დიდი ხანია ვიძახით და არ გვიჯერებდნენ. დადგა ის დღე, რომ თურქეთისთვის საქართველოს ბაზარი საინტერესო აღარ არის. ამერიკაში გზავნიან კვერცხის ძალიან დიდ რაოდენობას, იქ შექმნილი დეფიციტის გამო.
დროებითი შეზღუდვა გამოვიდა – თურქეთიდან სტანდარტული კვერცხის ექსპორტი აკრძალულია ნებისმიერი მიმართულებით. ეს მხოლოდ საქართველოს კი არ ეხება. მხოლოდ ამერიკაში გზავნიან მაქსიმალურ რაოდენობას და სხვა ქვეყნებზე უარი თქვეს. ჩვენი ბაზარი იაფიანია. ამერიკაში კი ისეთი ფასი ადევს კვერცხს და ისეთი რაოდენობით მოიხმარებენ, იქით არის მთელი თურქული წარმოება გადართული“, – აცხადებს ზურაბ უჩუმბეგაშვილი.
