ჩოხატაურის მუნიციპალიტეტის გენდერული თანასწორობის საბჭომ მაღალმთიან სოფელ ჩხაკოურაში შეხვედრა გამართა ადგილობრივ ქალებთან.
შეხვედრას, რომელიც 12 აპრილს ჩატარდა ესწრებოდნენ საბჭოს წევრები და მუნიციპალიტეტის ხელმძღვანელი პირები, რომლებმაც სიტყვით მიმართეს ჩხაკოურაში მცხოვრებ ქალებს და ისაუბრეს მნიშვნელოვან საკითხებზე.
შეხვედრაზე რამდენიმე პრეზენტაცია იქნა წარდგენილი, მათ შორის იყო ,,გენდერული ნიშნით ძალადობის გამომწვევი მიზეზები და პრევენციის ღონისძიებები“.
პრეზენტაციის მომხსენებელმა მარიტა მგალობლიშვილმა აღნიშნა, რომ გენდერული ნიშნით ძალადობა წარმოადგენს ფიზიკურ, ფსიქოლოგიურ და სექსუალური ხასიათის ძალადობას როგორც ქალების, ასევე მამაკაცების მიმართ.
ქალთა მიმართ ძალადობის შესახებ ახალი ეროვნული კვლევის მიხედვით, რომელიც გაეროს ქალთა ორგანიზაციამ და საქსტატმა ევროკავშირის ფინანსური დახმარებით ერთობლივად გამოსცეს, შვიდიდან ერთ ქალს ცხოვრების განმავლობაში ოჯახში ძალადობა განუცდია;
გაეროს ჯანდაცვის სააგენტოს ანგარიშის მიხედვით გლობალურად ფიზიკური ან სექსუალური ძალადობის მსხვერპლი, სულ ცოტა, სამიდან ერთი ქალია, ვინც ძალადობა ცხოვრებაში პარტნიორისგან ან მეუღლისგან ერთხელ მაინც გამოსცადა;
გენდერული ნიშნით ძალადობის ძირითადი გამოწვევი მიზეზები შეიძლება იყოს:
ფიზიკური გარემოს ფაქტორები: ფიზიკური უსაფრთხოების ნაკლებობა კანონისა და წესრიგის დარღვევის დროს, სიღარიბე, განათლებისა და ცხოვრებისეული შესაძლებლობების ნაკლებობა ზრდის გენდერული ნიშნით ძალადობის რისკებს; სოციალურ/კუტურულ/პოლიტიკური ფაქტორები: დისკრიმინაციული სოციალური, კუტურული და რელიგური ნორმები და პრაქტიკები, რომლებიც ქალებსა და გოგონებს ხდის მეტად მოწყვლადს ძალადობისადმი; დამაზიანებელი ურთიერთობები ოჯახის წევრებს შორის, რომლებიც ქალებს აყენებს ზიანის მაღალი რისკის ქვეშ და უზღუდავს მათ გამკლავების მექანიზმებს; ნდობის ნაკლებობა სოციალური ინსტიტუტების მიმართ, მაგ. აღმასრულებელი და სამართალდამცავი უწყებებისადმი, რაც ხელს უშლის მსხვერპლს, ეძიოს დახმარება.
სამართლებრივი ბარიერები: ხელმისაწვდომობის ნაკლებობა სამართლებრივ მექანიზმებსა და ინსტიტუტებზე.
ინდივიდუალური ბარიერები: არასათანადოდ მოპყრობის გამოცდილება მსგავს სიტუაციაში; სტიგმის, იზოლაციისა და სოციალური გარიყულობის შიში; განმეორებითი ან ახალი ძალადობის გამოწვევა მათ შორის შეიძლება იყოს თავისუფლების აღკვეთა, არასათანადოდ მოპყრობა, დასჯა და სხვა; ინფორმაციის ნაკლებობა ადამიანის უფლებებზე და იმ შესაძლებლობებზე, თუ სად და როგორ ეძიო დახმარება;
გენდერულ ძალადობას შეიძლება მოჰყვეს სერიოზული გრძელვადიანი და სიცოცხლისთვის სახიფათო შედეგები. ძალადობამ შეიძლება გამოიწვიოს ფიზიკური, ფსიქო-სოციალური და ჯანმრთლობასთან დაკავშირებული პრობლემები, რომელიც ხშირ შემთხვევაში ანადგურებს მსხვერპლის ღირსების განცდას, თვითშეფასებას, ცხოვრების ხარისხს და მოწყვლად ხდის მას სხვა ტიპის ძალადობისადმი.
სახელმწიფო ყოველგვარ ზომებს იღებს, ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარებისათვის.
ოჯახში ძალადობის მსხვერპლებს/სავარაუდო მსხვერპლებს, საკუთარი უფლებების დასაცავად, შეუძლიათ უფასოდ ისარგებლონ იურიდიული დახმარების სამსახურის როგორც პირადი, ასევე, სატელეფონო/ონლაინ კონსულტაციით (ცხელი ხაზი: 292 00 55, www.legalaid.ge, Skype: legalaid.ge, Facebook: legalaid.ge).
24 საათის განმავლობაში შეუძლიათ დარეკონ სსიპ ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდის ოჯახში ძალადობის მსხვერპლთა საკონსულტაციო ცხელი ხაზის ნომერზე: 116 006.
შეუძლიათ დარეკონ 112-ზე ან ისარგებლონ მობილური აპლიკაციის 112 Georgia ჩატით ან ზარით. თუ არ გაქვთ საუბრის ან ზარის განხორციელების საშუალება SOS ღილაკზე დაჭერით შესაძლებელია ჩუმი განგაშის გაგზავნა 112-ში. აპლიკაცია უფასოა და ხელმისაწვდომია ქართულ, ინგლისურ და რუსულ ენებზე.
შეხვედრაზე აღინიშნა, რომ ჩოხატაურის მუნიციპალიტეტის გენდერული თანასწორობის საბჭოს 2022-2023 წლების სამოქმედო გეგმით განსაზღვრული აქვს გენდერული ნიშნით ძალადობის პრევენციისათვის საინფორმაციო კამპანიების ჩატარება, ქალთა უფლებებსა და გენდერული თანასწორობის საკითხებზე სკოლის მოსწავლეების, ახალგაზრდების და სკოლის პედაგოგების ინფორმირებულობის გაზრდის მიზნით, საინფორმაციო შეხვედრების ჩატარება თემაზე – ქალთა უფლებები, ქალთა მიმართ და ოჯახში ძალადობა, ადრეული ქორწინება.
გენდერული ძალადობის წინააღმდეგ 16 დღიანი კამპანიის ფარგლებში ღონისძიებებისა და შეხვედრების ჩატარება.
ჩოხატაურის მუნიციპალიტეტის 2023 წლის ბიუჯეტიდან სოციალური დახმარების გაცემის წესით განსაზღვრულია ,,ქალთა მიმართ ძალადობის ან/და ოჯახში ძალადობის მსხვერპლთა ფინანსური დახმარება“.
შეხვედრაზე ასევე ყურადღება გამახვილდა ისეთ საკითხებზე როგორიცაა სოფლის მეურნეობის სახელმწიფო პროგრამებში ქალების უპირატესობისა და მიმდინარე პროგრამები, მუნიციპალიტეტის სოციალური პროგრამები. შეხვედრაზე მყოფებს ინფორმაცია მიეწოდათ ჩოხატაურის ზრდასრულთა განათლების ცენტრში არსებული უფასო პროფესიული გადამზადების კურსების შესახებ.
