20 მარტს, უმრავლესობის ლიდერი, ოზურგეთის მაჟორიტარი დეპუტატი არჩილ თალაკვაძე, ოზურგეთის დემოკრატიული ჩართულობის ცენტრში იმ მცირე მეწარმეებს შეხვდა, რომელთა პროექტები „აწარმოე საქართველოს“ ფარგლებში დაფინანსდა.
შეხვედრას ესწრებოდნენ დეპუტატის ბიუროს ხელმძღვანელი, დეპუტატები, ოზურგეთის მუნიციპალიტეტის მერი, საკრებულოს თავმჯდომარე და სხვადასხვა დარგის მეწარმეები, ჟურნალისტები.
არჩილ თალაკვაძე მეწარმეებს ბიზნესის და ეკონომიკის სფეროში მიმდინარე სიახლეებსა და სამომავლოდ დაგეგმილ რეფორმებზე ესაუბრა. მან მეწარმეებს უთხრა, რომ ფერმერთა ოჯახებში კიდევ მეტი ეკონომიკა უნდა შევიდეს და ამისთვის სახელმწიფოსგან გამოყოფილი ფული არ არის დაკარგული. მან, ასევე, ისაუბრა ეკონომიკის მინისტრის ძალისხმევაზე, რომ მეტი აქტიურობით იყოს წარმოდგენილი პროექტი „აწარმოე საქართველოში“.
არჩილ თალაკვაძემ, ასევე, დააანონსა მომავალ კვირაში ფინანსთა მინისტრის ოზურგეთში სტუმრობის შესახებ, რომელიც მრავალი ცვლილებების შესახებ ისაუბრებს მეწარმეებთან. კერძოდ, ეს იქნება მცირე მეწარმეებისთვის საავანსო გადასახადის გაუქმება და სხვა.
პროექტში გამარჯვებულებმა ისაუბრეს საკუთარ წარმატებულ საქმეებზე და მადლიერება გამოხატეს დაფინანსების გამო.
მცირე მეწარმემ ლავრენტი ტუღუშმა, რომელიც წლების განმავლობაში საათების შემკეთებლად მუშაობდა, პროექტში გაიმარჯვა, რასაც დარბაზმა ოვაციით უპასუხა, თვითონ კი მადლობა გადაუხადა უკლებლივ ყველას.
შეხვედრაზე „გურია ნიუსმა“ საკუთარი თვალსაზრისი გამოხატა სოფლის და ასევე სოფლის მეურნეობის განვითარებასთან დაკავშირებით, როგორი დახმარება სჭირდება ფერმერს, რაშიც უდიდესი წვლილი ენიჭება იაფ კრედიტს. კერძოდ: მიუხედავად იმისა, რომ არსებობს ერთი შეხედვით მომხიბლავი პროექტები, სადაც სახელმწიფო 15%-დან 12%-ს იხდის, სოფლის მცხოვრებთათვის ეს სახეირო მაინც არ არის. საქმე იმაშია, რომ ბანკები ითხოვენ ქონებრივ უზრუნველყოფას. მაგალითად, ძვირადღირებულ ბინას ზღვისპირეთში. გლეხს მიწის მეტი არაფერი გააჩნია. მიწა ბანკს ეს არ უნდა. ამიტომ, ფაქტობრივად, გრძელვადიანი იაფი სესხი მისთვის არ არსებობს. არსებობს მოტივირებულ ფერმერთა საკმაო ჯგუფები, რომელთა აზრს ამ მხრივ არავინ ითვალისწინებს. არადა, მათ აქვთ საინტერესო მოსაზრება გრძელვადიანი იაფი კრედიტის შესახებ, რასაც მთავრობამ უნდა მოუსმინოს, რომ სოფელი ფეხზე დადგეს. საკმაოდ ადვილია მონიტორინგის გაწევა, რამდენად მიზნობრივად და ეფექტურად წარმართავს ფერმერი სესხის აღების შემდეგ დაწყებულ საქმეს. დღევანდელ საბანკო შემოთავაზებებში კი, ერთი შეხედვით ჩანს, თითქოს, ყველაფერი კარგადაა და გლეხისთვის არსებობს იაფი კრედიტი. ფერმერებს იმ ადამიანებთან შეხვედრა სურთ, რომლებიც ასეთ ნორმებს უდგენს სოფელში მცხოვრებ, მიწასთან მომუშავე და მიწის მფლობელ ადამიანებს. კარგი იქნება მათთან მსგავსი შეხვედრის დაგეგმვა.
არჩილ თალაკვაძემ დახმარებისთვის მზადყოფნა გამოხატა.
_ მე მზად ვართ, დაგეხმაროთ, თუ ასეთ ფერმერთა შეხვედრა შედგება. ვიქონიოთ კომუნიკაცია, შევხვდები ეკონომიკის მინისტრს და დავგეგმოთ, _თქვა მან.
მეწარმეებთან შეხვედრაზე სიტყვა ითხოვა „ქართული ოცნების “ ერთ-ერთმა დამფუძნებელმა ოზურგეთში, მეწარმე ნუგზარ გიორგაძემ:
_ მეწარმეები არიან ის ადამიანები, რომლებსაც სჭირდებათ მცირეპროცენტიანი სესხები. ესენი არიან ადამიანები, რომლებიც მხარს უჭერდნენ „ქართულ ოცნებას“… დღეს რა ხდება ოზურგეთში? ყველაფერი უკან მიდის, იქცევა აქაურობა! მე ვიცი, რომ ეს ფორმატი არ ითვალისწინებს ასეთ გამოსვლას. კიდევ კარგი, რომ აქ არის ოზურგეთის მუნიციპალიტეტის მერი, კონსტანტინე შარაშენიძე. მერის მოადგილეები და კიდევ მისი მოადგილეები. თანაშემწეების დანიშვნა თუ იყო საჭირო, თუ ამდენია ბიუჯეტი, მაშინ რატომ ერეკებიან სამსახურებიდან „ქართული ოცნების“ მხარდამჭერებს. რატომ მიჯირყვნეს ყველა? _ იკითხა მან.
არჩილ თალაკვაძე: _ დღევანდელ შეხვედრაზე ჩვენ ვსაუბრობთ კეთილდღეობაზე, ეკონომიკის სწრაფ განვითარებაზე. წინასაარჩევნო შეხვედრებზე ჩვენ ვთქვით, რომ კეთილდღეობა და განვითარება იქნებოდა ყველასთვის, მიუხედავად მათი არჩევანისა.
ამიტომ, ამ საკითხს ახლა მცირე მეწარმეების საკითხთან ვერ ვაკავშირებ. იცით, არჩევნებზე მე ვიყავი მოწინააღმდეგე კანდიდატის შტაბში, თუმცა ოზურგეთის მუნიციპალიტეტის უმრავლესობამ აირჩია კონსტანტინე შარაშენიძე და მე ერთ-ერთი პირველი ვიყავი, ვინც განცხადება გააკეთა. თუ რატომ მოხდა ასე, ამაზე უნდა იფიქრონ და ისაუბრონ პოლიტიკურმა პარტიებმა. ეს არ არის დღევანდელი შეხვედრის თემა, _ უპასუხა დეპუტატმა.
ამის შემდეგ მეწარმეებმა კვლავ ისაუბრეს პრობლემებსა თუ ახალი იდეების დანერგვაზე. დასასრულ, არჩილ თალაკვაძემ შეხვედრის ყველა მონაწილეს მადლობა გადაუხადა.
