“შემხვდეს ივანიშვილი _ მონოპოლიების და ოლიგოპონიების მფარველი”

როგორც ბიძინა ივანიშვილის შეკვეთილის რეზიდენციასთან შეკრებილი ექიმები აანონსებდნენ, თუ ყოფილი პრემიერი, ბიძინა ივანიშვილი მათ არ შეხვდებოდა, დაიწყებდნენ შიმშილობას. ასეც მოხდა და ახლა იქ ბათუმის რესპუბლიკური საავადმყოფოს თერაპიული დეპარტამენტის უფროსი, ექიმი ბენიამინ ჭელიძე შიმშილობს.

ბენიამინ ჭელიძე “გურია ნიუსთან” ამბობს, რომ თვითონ, თავის თანამოაზრე მედიკოსებთან ერთად, უძღვებოდა აქციას, რომელიც ახლა შიმშილობაში გადაიზარდა და მათი მოთხოვნაა _ “ერთად გადავარჩინოთ რესპუბლიკური საავადმყოფო”:

_ შარშან, მაისში, როცა ბათუმის რესპუბლიკური საავადმყოფოს შენობის მშენებლობა დასრულდა, ეს არ იყო სრულყოფილი დამთავრება. ამ მშენებლობის სრულად დამთავრება გულისხმობს იმას, რომ გაცილებით ადრე, ასე ვთქვათ, ქაღალდზე მაინც უნდა ყოფილიყო გაწერილი კადრებით და ტექნიკით უზრუნველყოფის საკითხი. შარშანდელ ბიუჯეტში უკვე ჩადებული უნდა ყოფილიყო საამისო თანხები.

აჭარის ჯანდაცვის მინისტრმა მედიასთან განაცხადა, რომ ეს შენობა უნდა გაქირავდეს, მიზეზად კი აბსურდული რამ დაასახელა _ თითქოს, ბიუჯეტში ფული არ არის და ეს საავადმყოფო უნდა იყოს საუნივერსიტეტო. ჯერ ერთი, აჭარის ბიუჯეტში, 2017 წელს 95 მილიონი, ხოლო 2018 წელს 270 მილიონი დარჩა აუთვისებელი. გარდა ამისა, ეს საავადმყოფო საუნივერსიტეტო არის იმ მემორანდუმის თანახმად, რომელსაც ჩვენ ხელი მოვაწერეთ საავადმყოფოს გახსნისას. ეს ხომ იციან?

საქმე იმაშია, რომ მინისტრის გაცხადებული გაქირავების იდეა არის კორპორაცია “ევექსის” მიზანი, რომელსაც ნაციონალური ფესვები აქვს და ცდილობს, ამ საავადმყოფოს ხელში ჩაგდებას. თუმცა, დავანებოთ ყველას და ყველაფერს თავი _ ამ მოვლენების თავი და თავი არის ის, რომ ქვეყანაში მონოპოლიების და ოლიგოპონიების მფარველობაა, ბიძინა ივანიშვილი კი მათი მფარველია. თუ ეს ასე არ არის, უნდა შემხვდეს _ მხოლოდ 15 წუთს ვითხოვ. ეს არის ჩემი შიმშილობის მიზეზიც და მოთხოვნაც. ბათუმის საავადმყოფოს და ზოგადად, საქართველოს მედიცინას გადარჩენა სჭირდება. მონოპოლიების თარეში უნდა შეწყდეს, _ ამბობს ჭელიძე.

კითხვაზე სანამ აპირებს შიმშილობას, თუ ივანიშვილი ყურად არ იღებს მის თხოვნას და არ შეხვდება, მოშიმშილე ექიმი ამბობს, რომ ასეთ შემთხვევაში შიმშილობას უვადოდ გააგრძელებს:

_ მე მშრალ შიმშილობაზე არ ვარ. ხუთი დაავადება მაწუხებს. იქნებ, შევძლო და შედეგი გამოიღოს ჩემმა ბრძოლამ. მყავს თანამოაზრეები და საჭირო დროს მექნება მათი თანადგომა. მე, ასევე, ვითხოვ, ხადურის უწყებამ (კონკურენციის სააგენტო. რედ.), რომელიც დღისით ბუზებს ყლაპავს და საღამოს გოჭებს, ყური გამოიფხიკოს და მიხედოს ამ საქმეს. რომ ვშიმშილობ, უკვე ხომ იციან? ვეცდები, მალე გადავიდე უფრო ეფექტურ პერფომანსზე, _ გვითხრა მან.

ბენიამინ ჭელიძე ამბობს, რომ მას არ სიამოვნებს არავის გაქილიკება, განსაკუთრებით ბიძინა ივანიშვილის, მაგრამ საქართველოს ყოფილმა პრემიერმა, რომელიც მმართველი პარტიის ლიდერია და საქართველოში პოლიტიკურ ამინდს ქმნის, ყურად უნდა იღოს თუნდაც ერთი ექიმის თავგანწირული თხოვნა, რომ შეხვდეს.

_ 15 წუთით რომ შემხვდეს, სათქმელს სრულად ვეტყვი. მე ახლა სხვა არავინ და არაფერი მაინტერესებს. რატომ ვერ უნდა მოახერხოს ეს, ჩემთვის გაუგებარია. მე ვიცი, ფარმაცია და მედიცინა რა დღეშია ჩვენს ქვეყანაში. კატასტროფული მდგომარეობაა და მონოპოლიების და ოლიგოპონიების პარპაში თუ არ აღიკვეთა, არც ქვეყანას და აქედან გამომდინარე, არც მედიცინას არაფერი ეშველება. ბათუმის რესპუბლიკური საავადმყოფოს გადარჩენისთვის ბრძოლა, ბოროტსა და კეთილს შორის მარადიული ბრძოლის გამოხატულებაა. ამ ბრძოლაში კეთილის გამარჯვება რომ მოხდეს, ივანიშვილი უნდა შემხვდეს და მომისმინოს. რატომღაც, მაინც მგონია, რომ მას არ აქვს სრულყოფილი ინფორმაცია.

 ჩვენს მკითხველებს შევახსენებთ, რომ შეკვეთილში, ივანიშვილის რეზიდენციასთან, ბათუმელი ექიმების აქცია ერთდღიანი იყო. იმ შემთხვევაში თუ ივანიშვილი არ შეხვდებოდა მათ, დაიწყებოდა შიმშილობის აქცია.

ბათუმელმა ექიმებმა იმავე მოთხოვნით თებერვალშიც გამოხატეს პროტესტი.

ამჯერად, როგორც ბენიამინ ჭელიძე ამბობს, მოთხოვნა არის, რომ ბიუჯეტში სასწრაფოდ გამოიყოს ტექნიკის ფული და მიხედონ საავადმყოფოს. თუმცა, ის ამბობს იმასაც, რომ პრობლემა გლობალურია, სერიოზული ეჭვი არსებობს, რომ მონოპოლიებს, რომელთა შორის ერთ-ერთს სურს, ხელში ჩაიგდოს საავადმყოფო, მფარველობს ივანიშვილი და მასთან შეხვედრის შემდეგ, ეს უნდა გაირკვეს. მისივე თქმით, კარგი იყო, რომ საამისოდ შიმშილობის აქცია არ დაჭირდებოდა.