“შენით ვამაყობთ, მებრძოლო!“ _ ლიანა ჯოჯუამ ბრძოლა ტრავმის გამო დათმო

აბუ დაბიში, ,,მებრძოლთა კუნძულზე“, 24 ოქტომბერს გამართულ ტურნირზე ერთმანეთს დაუპირისპირდნენ UFC-ის ქართველი სპორტსმენი ლიანა ჯოჯუა და ამერიკელი სპორტსმენი მირანდა მავერიკი.

ჯოჯუა პირველივე რაუნდში დამარცხდა, _ ორთაბრძოლის დროს ცხვირის ძვალი გაუტყდა. მიყენებული ტრამვის გამო, ექიმების გადაწყვეტილებით, ლიანამ ვერ მოახერხა ბრძოლის გაგრძელება. ეს გადაწყვეტილება ლიანა ჯოჯუამ გააპროტესტა, მაგრამ არაფერი გამოუვიდა. პირველი რაუნდის დასრულების შემდეგ, ჯოჯუას ნაკერები დაადეს, მაგრამ ექიმმა ჩათვალა, რომ მისი რინგზე დაბრუნება უსაფრთხო არ იქნებოდა. “არა, არა, გთხოვთ, არა!”, – ყვიროდა ჯოჯუა, მაგრამ საბოლოოდ გადაწყვეტილება რეფერიმ მიიღო და ბრძოლა შეწყდა.

ლიანა ჯოჯუა დამარცხების შემდეგ, საკუთარ Instagram- გვერდზე ავრცელებს განცხადებას:

“მოგებაც და წაგებაც უფლის ნებაა. მზად ვიყავი, ბრძოლა გამეგრძელებინა, ვგრძნობდი, რომ ბრძოლა მიმყავდა, მაგრამ ექიმებმა ჭრილობის გამო, ამის შესაძლებლობა აღარ მომცეს. დღეს მას უფრო გაუმართლა, ვიდრე მე. ასეთია ჩვენი სპორტი. მსურს ყველას უდიდესი მადლობა გადავუხადო, ვინც მხარს მიჭერს. ვხედავ, რომ თქვენი გულებიც ისეა გატეხილი, როგორც ჩემი…“-  ჯოჯუა მადლობას უხდის გულშემატკივრებს და თავის კლუბს.

ქართველი მებრძოლი უამრავმა ადამიანმა გაამხნევა. მათ შორის UFC-ს ქართველმა მებრძოლებმა გიგა ჭიკაძემ და მერაბ დვალიშვილმა. ”შენით ვამაყობ, მებრძოლო”, – დაწერა დვალიშვილმა პოსტის კომენტარში.

25 წლის ლიანა ჯოჯუა UFC-ში, მას სამი ბრძოლა აქვს ჩატარებული, მეორედ დამარცხდა. მის ანგარიშზე ჯერჯერობით ერთი მოგებაა.