ოზურგეთის ალექსანდრე წუწუნავას სახელობის პროფესიულ სახელმწიფო დრამატულ თეატრში უილიამ შექსპირის ტრაგედიის _ „მაკბეტის“ პრემიერა გაიმართა. რეჟისორმა გოჩა კაპანაძემ მაყურებელს კლასიკური ტექსტის ახალი, შთამბეჭდავი და ემოციურად დატვირთული ინტერპრეტაცია შესთავაზა.
უილიამ შექსპირის „მაკბეტი“ მარადიული ტრაგედიაა, რომელიც ძალაუფლების დაუოკებელი წყურვილით შეპყრობილი ადამიანის სულიერ დაცემას, საბედისწერო არჩევანსა და ამ არჩევანის გარდაუვალ, ტრაგიკულ შედეგებს ასახავს.
სპექტაკლის შემოქმედებითმა ჯგუფმა _ მხატვარმა ლომგულ მურუსიძემ, კოსტიუმების მხატვარმა ქეთი ციციშვილმა და ტექნიკურმა რეჟისორმა ეკატერინე ანთიამ — სცენაზე მისტიკური, დაძაბული და შთამბეჭდავი ატმოსფერო შექმნეს, რამაც შექსპირისეული დრამატიზმი კიდევ უფრო გაამძაფრა.
სპექტაკლის ერთ-ერთი მთავარი ღირსება მსახიობთა ანსამბლია. ლედი მაკბეტის რთული და მრავალშრიანი სახე მაყურებლის წინაშე ორ განსხვავებულ შემადგენლობაში საქართველოს სახალხო არტისტმა, რუსთაველის ეროვნული თეატრის მსახიობმა ნანა ფაჩუაშვილმა და ოზურგეთის თეატრის მსახიობმა თამარ მდინარაძემ გააცოცხლეს.
სპექტაკლში ასევე მონაწილეობენ: მაკბეტი _ გიორგი დოლიძე, ბენქო _ ლუკა მეგრელაძე, კუდიანები _ ბელა კიკვაძე, შორენა გვეტაძე და თეა შარვაშიძე.
გოჩა კაპანაძის მიერ ზუსტად შერჩეულმა მსახიობებმა თავიანთი პროფესიონალიზმით, ემოციური სიღრმითა და დამაჯერებელი შესრულებით მაყურებლის აღფრთოვანება დაიმსახურეს. პრემიერა სრული ანშლაგით გაიმართა და ხანგრძლივი ოვაციებით დასრულდა, რაც სპექტაკლის წარმატების კიდევ ერთი დასტური გახდა
ავტორი
