ოზურგეთში, თენიეშვილის ქუჩაზე მდებარე ცხრასართულიან საცხოვრებელ კორპუსს, სადაც 45 ოჯახი ცხოვრობს, დიდი ხანია, საძირკველში წყალი აქვს ჩამდგარი.
აღნიშნულ პრობლემაზე , „გურია ნიუსი“ რამდენიმე წლის წინაც წერდა.
ადგილობრივი მცხოვრებლები ამბობდნენ, რომ კორპუსი 1989 წელს არის აშენებული და ამ ტერიტორიაზე მანამდე აბანოები არსებობდა. მიწიდან ამოდის გოგირდოვანი წყალი. სავარაუდოდ სწორედ ეს უნდა იყოს, მუდმივად რომ დგას კორპუსის სარდაფში.
აღნიშნული კორპუსის მცხოვრებლები: დარიკო ცეცხლაძე, ანა ტუიმაცენსკი, რიტა თოიძე, ნინო შანშიაშვილი „გურია ნიუსთან“ საუბრობენ და თავიანთ წუხილს გამოთქვამენ:
_აქ ორი კორპუსი ერთმანეთზეა მიდგმული ერთგვარი მართკუთხა ფორმით. მარჯვენა მხარეს, სარდაფი მუდამ წყლითაა სავსე. აუცილებელია, ეს სივრცე, სადაც წყალი დგება, ამოივსოს ქვიშით, მიწით, ღორღით -რითაც შესაძლებელი იქნება და დაიტკეპნოს. წყალი, დაახლოებით ნახევარი მეტრის სიმაღლეზე დგას. ამ კორპუსს მუნიციპალიტეტის ახლანდელმა ხელმძღვანელობამ მთლიანად გაუკეთა კედლების საფარი, შეიფუთა კედლები და ეს ძალიან კარგი საქმე გაკეთდა. კედლებს ჩამოშლის საფრთხე ემუქრებოდა. თუმცა უარესი საფრთხე შეიძლება დაგვემუქროს და ღმერთმა ნუ ქნას, კორპუსი თავზე დაგვემხოს. ამიტომ გვინდა, მუნიციპალიტეტის მერიამ ამ საქმის მოგვარებაშიც დაგვეხმაროს. ახლა არჩევნებია და როგორც დასრულდება, განცხადებით მივმართავთ, _გვითხრეს მათ.
იქვე, თენიეშვილის ქუჩის ათ ნომერში, სამსართულიან საცხოვრებელ ბინაში, რომელიც გაცილებით დიდი ხნის წინ აშენებულია, გვეუბნებიან, რომ სახლის წინა მხარეს, საძირკვლის ზემოთ, კედლის საფარი მთლიანად ჩამოშლილია, საძირკველში კი მუდმივად წყალი ამოდის, რასაც გადინების საშუალება რომ ჰქონოდა, ერთჯერადად მილი ჩასვეს.
_ეს საძირკველი, ალბათ მალე ჩაიშლება. რაც აქ ვცხოვრობთ, სულ წყალი ამოდის. კედლები დაბზარულია. სულ გვეშინოდა, მაგრამ ახლა უფრო დაზაფრული ვართ. პანიკას ნამდვილად არ ვთესავთ, ადამიანურად გეუბნებით, გვეშინია. ჭერზე არის ბზარები, წყალი ისეა ჩამდგარი, რაღაც ღონისძიების გატარებაა საჭირო. ჩვენთან იყო კოტე შარაშენიძე, მერი, როცა გვერდით მდებარე ცხრასართულიან კორპუსს საფარი შემოავლეს. გვითხრა, რომ განცხადება მიგვეტანა და დაგვპირდა დახმარებას. ერთხელ შევიტანეთ. ახლა არჩევნებია და ჩვენთვის ვის სცალია. არჩევნების შემდეგ კი შევიტანთ, _ გვითხრეს ქალბატონებმა.
_კოვიდპანდემიიდან გამომდინარე, ინფრასტრუქტურული სამუშაოები საკმაოდ შემცირდა, თორემ ვაპირებდით აღნიშნული პრობლემის მოგვარებას. ვიცით ამის შესახებ. როგორც კი საშუალება იქნება, ამ პრობლემის მოგვარებაში დავეხმარებით იქ მცხოვრებლებს. ზოგადად, კი, ადგილზე მივალ და კიდევ ერთხელ გავეცნობით, – თქვა „გურია ნიუსთან“ ოზურგეთის მუნიციპალიტეტის მერიის ინფრასტრუქტურის სამსახურის უფროსმა თემურ გიორგაძემ.
[sexy_author_bio]
