„რა მოხდა, ხალხმა უნდა იცოდეს. წინა საღამოს, საპარლამენტო უმრავლესობის ფორმატში შეკრებილები ვიყავით, ვისაუბრეთ და ვთქვით, რომ ნინია კაკაბაძეს ხმას არ ვაძლევდით. ამაზე შევთანხმდით და ყველას ჩვენი არგუმენტები გვქონდა, _ ამის შესახებ საპარლამენტო უმრავლესობის წევრმა, გედევან ფოფხაძემ 1TV-სთან საუბრისას განაცხადა.
“შეიძლება ბევრი არ დავრჩით, მაგრამ თუ ვინმეს რაიმე პოზიციის გამოთქმა უნდოდა, მოსულიყო. თუ ვინმე „ჩატში“ რაიმეს კენჭისყრამდე 15 წუთით ადრე დადებს, ეს გუნდის პოლიტიკური პოზიციის მაჩვენებელი რატომ არის?“, – თქვა დეპუტატმა.
კანონმდებელი მიიჩნევს, რომ გასარკვევია ის საკითხი, უმრავლესობის ნაწილმა პოზიცია რატომ შეიცვალა და ნინია კაკაბაძეს ხმა რატომ მისცა.
„იმას კი ნუ ამბობენ, გედი ფოფხაძემ შეურაცხყოფა მოგვაყენაო, უმრავლესობა უნდა დაჯდეს ან ჩემთან ერთად, ან ჩემ გარეშე და ეს საკითხი განიხილოს. იმის პრობლემა სულ არ მაქვს, უმრავლესობა დავტოვო და ეს პროცედურები გავიარო, მაგრამ მაინტერესებს, ეს ყველაფერი რატომ მოხდა?! თუ გუნდის იმ წევრებს მიაჩნიათ, ვინც ნინია კაკაბაძეს ხმა მისცა, რომ მათ ჩემი გადაწყვეტილებით შეურაცხყოფა მივაყენე, ჩემს თავს შეურაცხყოფილად ვგრძნობ იმის გამო, რაც მოხდა და მინდა, პასუხები მივიღო“, – აღნიშნავს კანონმდებელი.
შეკითხვაზე – რამდენად არის შესაძლებელი ნინია კაკაბაძესთან დაკავშირებით „ევროპულ საქართველოსა“ და „ქართულ ოცნებას“ შორის პოლიტიკური შეთანხმება ყოფილიყო მიღწეული, ფოფხაძე პასუხობს, რომ მსგავსი ვარაუდის გამოთქმის საშუალება არსებობს.
„ამ ვარაუდის გამოთქმის უფლება გვაქვს. „ევროპული საქართველო“ პლენარულ სხდომებზე ამ რაოდენობის დეპუტატებით არ დადის და უცებ, სხდომაზე ყველა მოვიდა. შეიძლება, მათ იცოდნენ, რომ ჩვენგან ხმები უნდა მიეღოთ და ამიტომ მოვიდნენ. ამას ვერ დავადასტურებ, რადგან ამის მტკიცებულება არ მაქვს, თუმცა თუ ვინმემ ეს გააკეთა, ეს გასარკვევია“, – ამბობს ფოფხაძე.
გედევან ფოფხაძე იმ მიზეზებსაც ასახელებს, რის გამოც თავად ნინია კაკაბაძის წინააღმდეგ მისცა ხმა.
„თუ ვინმე ვინმეს რასისტული ნიშნით სცემს და ჩვენ ვიტყვით, რომ ეს ადამიანი არასწორად იქცევა, რადგან რასისტული ნიშნით ადამიანზე ძალადობს, ეს რატომ არის რასისტული ფაქტორით სპეკულირება? თუ ნინია კაკაბაძე ვინმეს რელიგიურ გრძნობებს შეურაცხყოფს და ამაზე ვიტყვით, რომ ეს არასწორია, ესეც არაა სპეკულაცია. ეს ფაქტის კონსტანტაციაა. თუ დეპუტატი ხმას ისეთ ადამიანს მისცემს და წაახალისებს, რომელიც სხვას რელიგიური ნიშნით შეურაცხყოფას აყენებს, აქ სპეკულაციაზე საუბარი არ უნდა იყოს. სახალხო დამცველმა კანდიდატი შემოგვთავაზა, რომელიც არ მოვიწონეთ და მის შესახებ უარყოფით მოსაზრება გამოითქვა, რადგან ქალებზე მოძალადედ ჩაითვალა. იმის იურიდიული დამადასტურებელი არ გვქონია, რომ ეს ადამიანი ასეთი იყო, მაგრამ საზოგადოებრივმა აზრმა სახალხო დამცველი აიძულა, სხვა კანდიდატი შემოეთავაზებინა. თუ ვინმეს მიაჩნია, რომ სხვისი რელიგიური გრძნობების შეურაცხყოფა ნაკლებად მნიშვნელოვანია, ვიდრე ქალზე ძალადობა, ცდება მიუხედავად იმისა, რომ ესეც დასაგმობია“, – აცხადებს ფოფხაძე.
შეგახსენებთ, რომ საქართველოს პარლამენტის წევრებმა ,,ევროული საქართველოს„ მიერ საზოგადოებრივი მაუწყებლის სამეურვეო საბჭოს წევრად წარდგენილი კანდიდატი 55 ხმით დაამტკიცა.
ნინია კაკაბაძის კანდიდატურა ,,ევროპულმა საქართველომ“ პარლამენტს მეორედ წარუდგინა, რადგან პირველ ჯერზე ,,ქართულმა ოცნებამ“ მის კადიდატურას მხარი არ დაუჭირა.
