საქართველოს კომპოზიტორთა კავშირის გამგეობის წევრი ბარამ ბარამიძე განცხადებას ავრცელებს, სადაც აღნიშნულია, რომ კომპოზიტორთა კავშირის შენობაში (დავით აღმაშენებლის გამზ. 123) ვითომდა არსებული საროსკიპოს არსებობის შესახებ გავრცელებულ ცრუ ინფორმაციამ შეცდომაში შეიყვანა. ამიტომ კომპოზიტორთა კავშირს მხარდაჭერას უცხადებს.
„მინდა განვაცხადო, რომ 2014 წელს პრესითა და ტელევიზიით გიორგი ბურჯანაძის მიერ გავრცელდა ინფორმაცია საქართველოს კომპოზიტორთა კავშირის შენობაში (დავით აღმაშენებლის გამზ. 123) ვითომდა არსებული საროსკიპოს არსებობის შესახებ, რამაც გამოიწვია ჩემი აღშფოთება და საჯარო გამოსვლები კომპოზიტორთა კავშირის ხელმძღვანელობის წინააღმდეგ. ეს გახდა იმის მიზეზი, რომ ჩემს სახელს დაუკავშირდა საქართველოს კომპოზიტორთა კავშირის დისკრედიტაციის მცდელობა.
ყოველივე ამის შემდეგ, სასამართლოში მიმდინარე პროცესმა, პოლიციიდან მიღებულმა დასკვნებმა და სხვა ვითარებებმა დამანახა, რომ საზოგადოების სხვა წევრებთან ერთად, ნამდვილად ვიყავი შეყვანილი შეცდომაში.
ამასთანავე ვაცხადებ, რომ ამ საქმის წარმოებასთან დაკავშირებით მხარს ვუჭერ კომპოზიტორთა კავშირის მიერ განხორციელებულ ყველა ქმედებას და მასთან ერთად ვემიჯნები მთელი საზოგადოებისათვის მიუღებელ ფაქტებს.
ვაძლევ უფლებას კომპოზიტორთა კავშირს აღნიშნული განცხადება გამოიყენოს საჭიროებისამებრ“, _ნათქვამია ბარამიძის განცხადებაში.
შეგახსენებთ, რომ პრესისა და ტელევიზიის საშუალებით, წინა წლებში რამდენჯერმე გავრცელდა ინფორმაცია, სანდრო ბრეგაძისა და გიორგი ბურჯანაძის მიერ, რომ კომპოზიტორთა სახლში საროსკიპოა გახსნილი, ამაზე კი სახლის ხელმძღვანელობა თვალს ხუჭავს.
“კომპოზიტორთა სახლში გახსნილი აქვთ ბორდელი, 16-17 წლის ბავშვებს ამუშავებენ, ღამე აუპატიურებენ ქალებს, ჯგუფურად ხვდებიან და უმოწყალოდ სცემენ ახალგაზრდა ბიჭებს,” – სანდრო ბრეგვაძის მიერ გამოქვეყნებულ ამ წერილს გაზეთში “საქართველო და მსოფლიო” კომპოზიტორთა სახლის ხელმძღვანელობა 2016 წლის მაისში განცხადებითაც გამოეხმაურა.
როგორც „გურია ნიუსს“ კომპოზიტორთა სახლიდან აცნობეს, ცილისმწამებლური ინფორმაციისთვის სასამართლოში გიორგი ბურჯანაძის წინააღმდეგ დავა მიმდინარეობს. პროცესები რამდენჯერმე გადაიდო და განხილვა დასრულებული არ არის.
ასევე, კომპოზიტორთა სახლმა გავრცელებულ ინფორმაციაზე დაყრდნობით ორჯერ მიმართა საგამოძიებო უწყებას, პოლიციას, თუმცა, მათ მიერ გაგზავნილ წერილზე პოლიციიდან უპასუხეს, რომ „ამ შენობაში კანონსაწინააღმდეგო არაფერი ხდება“.
„გურია ნიუსი“ აღნიშნულ საკითხს თვალყურს მიადევნებს და ვრცელ სტატიას მოგვიანებით შემოგთავაზებთ.
